|
|
|
دوستاغا سیغمایانلار ( قورتولوش اسیرلرینه ایتحاف )
شان شان تورپاغدیر آلیشان
دوم دورو هارایدیر زامانلا یاریشان
آنا امانتیدیر یاشاملا باریشان
دؤیونموش کؤکسونده دؤیونندیر
دیرچه لن اؤزلوگونه اؤیونندیر
گؤزلر گؤزله بیله بیله
الینی قوی اوره گینه
آغلاماسین گیله گیله
آلینماز ساتیلماز
تایسز سایسیز
گؤزه للر گؤزه لیدیر
آذربایجان غزلیدیر
گؤز گؤز اولان
آرزی دولو سئودا یولو
مین ناخیشی بیر ایز اولان
مین باخیشی بیر سؤز اولان
دایاغ اولان داغلاردیلار
یاز گؤزله ین باغلاردیلار
گاه کرم سیز یاد الینده باغیراندیر
دردین آچیر سازدا تئله
گاه سارادیر وفاسینی سوووناندیر
سئوگیسیندن وورور سئله
اینجی دولو دورو دنیزدیر
یارالی
قوجا تبریزدیر
بو سئودانین بو سئوگینین
وورغونلاری یئلمازدیلار
دوستاغلارا سیغمازدیلار
تاپشیر اسن ایلیق یئله
اسیب چاتسین اسیرلره
گله جگین موشتولوغون
وئرسین دیری شهیدلره
اسماعیل جمیلی
حسرت
یانار وولکان اوجاغیندا
اؤز کؤزونه کول حسرتده
سولماز باهار قوجاغیندا
اؤز باغینا گول حسرتده
تیکان ساریب سونبول یئرین
قارقا آلیب بولبول یئرین
چور بورویوب حاصل یئرین
داملا سویا چول حسرتده
سئوگی دوستاق سئوینج داردا
گول غونچه سی قالیب قاردا
شخته کسیر ایلک باهاردا
یازا موغان میل حسرتده
دومان اوسته دومان دوروب
قیزیل گوللر بوینون بوروب
قادا غصّه بساط قوروب
شن هاوایا تئل حسرتده
بودالانیب ساغ سولوموز
باغلانیبدیر دوز یولوموز
نیسگیل اولوب هر آرزوموز
اؤز دیلینه دیل حسرتده
بئله قالمار کوچر یامان
گله جکدیر وئره ن فرمان
بیر گون گولر آذربایجان
قالماز وطن ائل حسرتده اسماعیل جمیلی
بیرووزلار چمبرینده
یاشیللانان آرزولاردیر سو چیله ییر
حسرتلرین دیاریندا
قوراقلیغا باش ایمه ین اومودلارا
سؤنمز وارلیق گونشی دیر ایشیق سریر
دورو خیال باغلاریندا
گله جگین یاز نفسلی یوللارینا
سئوگیمیزین سئوینجینی تالایانلار
جنّت مغان جیرانینی بودویانلار
مارال گؤزلو گؤزللرین
سئوداسینی یاساقلاییب
کوف قاپسایان شکیللری
اورتالاردا گزدیره نلر
آدی باتمیش اؤلولری ازدیره نلر
چاغین چرخین یاواشلادیب
زمانه نی بئزدیره نلر
گون گون اورتا آل گونشی گؤرمه ینلر
یئنیلیگه ، دگیشیمه
بوش باشلارین ایمه ینلر
قادا قورخو های کویونده
یالنیشلارین دوز بیلنلر
دویانمازلار بیلنمرلر
بیرووزلار چمبرینده
سئودامیزین دیرچه لیشین
دورنالارین اؤز یوردونا قاییدیشین
ساوالانین طراوتین
ائلین قاینار محبّتین
دونگه لرده دولانانلار
یالانلاردان پای اومانلار
گؤره نمزلر اؤینمزلر
قیتمیر قیسیر گؤزلریله
پوهره وئرن کیملیگیمین چیچکلرین
سئوگیمیزله بوداغلانان
قورتولوشون اؤزه کلرین اسماعیل جمیلی
توفان یوخوسو
سانما یوخلاییبدیر سس سیز سمیر سیز
دئمه چؤکوب شهره اؤلوم قورخوسو
گئجه نی دالغا سیز یاشایان دنیز
سحره گؤرورو توفان یوخوسو
باخیشلار پایلاشیر مین بیر گیزلینی
دوداقلار سوسسادا کؤنوللر دویور
یوز ایللر بوکمه ییب ارکین بئلینی
هله ده وارلیغین ، ائلین قورویور
بوز گؤلون مورگولو گؤروب آلدانما
ساوالان کؤکسونده جوشان وولکاندیر
گؤردوگون قارا گون بو ائل بو تورپاق
ایگیردلر بئشیگی آذربایجان دیر
بو یئرده آرخانی گؤره ن گؤزلر وار
هامارلار اوچوروم دؤنوملر دوزدور
بو یئرده یایئنی چکن سازلارین
سنگری ماهنی لار اوخلاری سؤزدور
آتیلان قورشوندور هر بیر بایاتی
ستارخان توفنگی بو گون قلم دیر
بیلگی یاراقینا ساریلان اوزان
کؤکسونده قوپوزو قورقود ده ده م دیر
بو یئرده بئشیکده ن باشلانیر دؤیوش
گئچیلمز یوللاری آشیر لایلالار
قارانلیق گئجه لر قودوراندا قیش
اومود باغچاسیندا گول له نیر باهار
آزادلیق هایقیران بابک قالاسی
چاغلا ایاقلاشان سینماز اوردودور
سوسماز نسیمی سی سویوللارسا دا
بورا آذربایجان اودلار یوردودور
اسماعیل جمیلی
یئنی چاغین یئنیلمه ین بالاسی
سن یالواریش نسلیندن یوخ
قارا قارقیش فصلیندن یوخ
آیری دوشموش اصلیندن یوخ
یئی چاغین یئنیلمه ین بالاسی سان
وارلیغیمین کیملیگیمین قالاسی سان
گؤزلرینین آرخاسیندا اولدوزلاری صفه دوزن
گؤی قورشاغی قانادیندا اومودلارین باغین گزن
آرزیلاری سونا کیمی دورو خیاللاردا اوزن
یاساق سئودا سئوگیسینده سایسیز غمه درده دؤزن
دوشونجه نین باغچاسیندان
یابان شخته سزاغیندا دونانلارین الین اوزن
اؤزو اولوب اؤزون آشان
دالغالانیب جوشوب داشان
قورتولوشون شن هاواسین چالاسی سان
یئنی چاغین یئنیلمه ین بالاسی سان
سن اسگیمیش دوشونجه نین دیوارلارین شوملادارکن
آچیق اوفوقلر یارادان ئولچولرده یئنی بویلار یارادارکن
قورخو دوغان دورغونلوغون اؤرتوگون اوزدن سالار کن
دالانلاردا دالدالانان قارانلیغین پاسلی یاراغین آلار کن
گله جگین گول چیچکلی گلیشینی دیلدن دیله سالاسی سان
یئنی چاغین یئنیلمه ین بالاسی سان
سارسیلمایان قایالاردا آزادلیغین آدین یازان
وار اولمانین یاشیل بویلو باغلاریندا
قیسیرلیغین تاهین پوزان
قوراقلیقدا سئله دؤنن
یاز نفسلی یئله دؤنن
نغمه نغمه دیله گلن
قوپوزلاردا تئله دؤنن
دورو بولاغلار هاواسین باخیشیندا چالاسی سان
یئنی چاغین یئنیلمه ین بالاسی سان
وارلیغیمین کیملیگیمین قالاسی سان
اسماعیل جمیلی
یئنه اوخوللار آچیلیر
یئنه اوخوللار آچیلیر
یادلاشماغی اؤره تمه یه
یوردوموزون بالالاری
اؤزگه دیلده آغزین ایه
یئنه باشلیر گؤز اؤنونده
کیملیگیمیز تالان اولسون
فضولونون نسیمی نین
چیچک دولو باغی سولسون
دوغما دادلی یوخوموزو
یاد ایسته ییر خواب ائیله سین
آینا بولاغلارین سویون
بولاندیریب آب ائیله سین
باجی قارداش اونودولسون
عزیز آنام مادر اولسون
حیدر بابا قان آغلاسین
شهریارین گؤزو دولسون
خزان چاغی باغلار کیمی
وارلیغیمیز یارپاق توکور
اؤز دیلیمیز سوسدورولور
اؤزگه دیلی قولاق سؤکور
یئنه اوخوللار آچیلیر
وارلیغیمیز دوستاق اولا
تالان اولان یوردوموزدا
آنا دیلیم یاساق اولا
اسماعیل جمیلی
صمد بهرنگی نین نیسگیللی خاطره سینه اتحاف یاز 97
صمد عمی ناغیللارا قوشولدو
یوبانیردی سانکی گونش اوسحر اوفوقو توتموشدو قارا دومان چن
آراز بویو سوسان لال اولان قوشلار یاشیردیلار گلن آنلاری ارکن
آیریلیقدان آیری دوشه بیلمه ین لاله لرین باغری دولو قان ایدی
نرگیزین گؤزوندن سؤزن داملادا قایالار اوچوران بیر طوفان ایدی
کیم دئیردی سئللر سارادان سونرا خان چوبانین تله قویوب یولونا
آرازین گؤرونمز بوروخلاریندا صمدین حیاتی چاتاجاق سونا
اوگون گؤزو یولدا قالان سهندین دادینا چاتمادی ساوالان بابا
یوخسول اوشاغلارین اومود چراغی کند اوخوللاریندا یانمادی داها
اوغورلاندی چنلی بئلین قیر آتی مصری قلینج چیخماز اولدو قئنیندان
سارایلاردا ظالیم خانلار گولرکن بیر جنگی گلمه دی آشیق جنوندان
بیر شافتالی آیری دوشدو مینیندن خیردا قارا بالیق ایتیردی یولون
قار داناسی یالقیز قالیب اریدی سوسوزلوق قوروتدو تلخونون کولون
اؤلوملو سورگونلو ایللردن سونرا او بیر چراغ ایدی یولا نور ساچان
دیلی باغلی اسیر اولان ائللرین قورتولوش یولونون اؤنونو آچان
سئوگی دولو آرزی دولو بیر گونش آرازدا باتسادا او گون بیر آندا
صمد عمی ناغیللارا قوشولدو آدی اؤلمز اولدو آذربایجاندا
اسماعیل جمیلی
ستارخان
بویاسی گونشدن
نفسی باهاردان
تمیزلیگی سهندده قاردان
دایانیشی ساوالاندان
میشو تراوتلی ولکان حرارتلی
سئوگسیسی ائلدن گوجو آنا دیلدن
سئوداسی دوغما دیاردان .
تالانان تبریزین پوزولماز ووقاری
یاراشیغلی دوروشوغلو
اؤلکه مین یئنیلمز سرداری
خانلیغیله اؤزونو ائلینه قول سانان
دار گونونده عهده وفالی قالان
ستارخان
تاریخ سیناغیندا اونلو باشی اوجا
قوجامان ارک کیمی یارالی قوجا
قاراداغین غیرت قایناغی
دایانیشمانین اسن بایراغی
آغ علم لری ائندیرن ا ل
کؤنوللرده یوکسلن هیکل
ستارخان
آدینین کؤلگه سی بئله
تولکولرین توکون تؤکن
حسرت اولان نیسگیل قالان
تربتینین تورو بئله
دینازورلار قورقوسونو دیسکیندیرن
آپارتایدین قان قوخولو سارایلارین سیلکه له دن
قوللوقچولار سوروسونو ونگیلده دن
ستارخان
بابکین دوغما بالاسی
ائلین یئخیلماز قالاسی
آدی دیللرده دستان
یاشایان قهرمان
یاشانان آذربایجان
ستارخان ......
اسماعیل جمیلی
ستارخانین بایراغی اسماعیل جمیلی
دان یئری قارانلیق
بولاغ باشی بولانلیق
یوخسوللوق ، بوغونتو ، فریا د
ئولوم کولگه لی استبداد
غم غصه قالاخ قالاخ
درد ظولوم زولاخ زولاخ
داغ داغ ائشیدیلمز هارای
حقسیزلیک گونده لیک اولای
سو یئرینه آخان قان
امر ائدن ظلمکار خان
قدرته اویونجاق دین ، ایمان .....
اومودسوزلوک گویه ره نده
آرزی یئلی دیره ننده
انسانلیغین ده یه رلری
کفن کفن بوروننده
همّت سؤزو غیرت سؤزو
آزادلیغلا ملّت سؤزو
ستارخانلا ، باغیر خانلا
ائلده دیلدن دیله دوشدو
قانادلاندی هاوالاندی
نغمه اولدو تئله دوشدو
ائل سیغیندی آزادلیغین اوجاغینا
ائل گووه ندی ستارخانین بایراغینا
گولوش قوندو قادا قورخو بوداغینا
یئنی آچان چیچکلرین دوداغینا
یئلماز سردار
قورخماز سالار
یوخسوللارا دایاغ اولدو
اومود یایان چراغ اولدو
آذربایجان آزادلیغا بایراغ اولدو
آرزی اومود سئوگی سئوینج
شار شار آخان بولاغ اولدو
اون بیر آیلیق قوشاتمادا
قوجا تبریز سنگرینده
آذربایجان ایگیردلری
قهرمانجا دویوشدولر
اؤلوم قالیم ساواشیندا
وار یوخلارین بؤلوشدولر
آددیم آددیم اؤلوم ایله گؤروشدولر
سینمادیلار دایاندیلار
قیزیل قانا بویاندیلار
یاشادیلار یاشاددیلار
ائل شرفین ائل غیرتین
عزّتینی قایتاردیلار شاها شیخه
قول تک ساتیلمیش ملّتین.......
یاندی واردیر سؤندو یوخدور
بولودلارین قانادیندا سال قایالار قوجاغیندا
ائلین سؤنمز اوجاغیندا قوجا قارتال یوواسیدیر
شانلی بابک قالاسیدیر
قایا قایا اولو داغلار سئویجیندن گؤزو آغلار
گول چیچکدن چلنگ باغلار گلن دوغما بالاسیدیر
ائل هارایین سالاسیدیر
قوناقلاری آیدین اویاق قورخماز یئلماز ائله دایاق
قئزی اوغلو قئوراق قوچاق ستارید یر ساراسیدیر
اولو بابک بالاسیدیر
دینمزلیگین باغرین یاران وارلیغینا آرخا دوران
گله جگین سازین چالان کوراوغلو نون هاواسیدیر
بابک یولو قالاسیدیر
هارای اولوب دیله گلن نغمه اولو ب تئله گلن
هر ایشی مشگله گلن ائلین سایسیز یاراسیدیر
ال بیرلیگی چاراسیدیر
کیمی کیمدن اؤندو یوخدور یاندی واردیر سؤندو یوخدور
اؤلدو واردیر دؤندو یوخدور اؤلوم قالیم داوا سیدیر
بورا بابک قالاسیدیر
اسماعیل جمیلی
آذربایجان – آذربایجان
اولو بابک وئریر فرمان
دالغالانیر قوجا ولکان
وارلیغینی هایغیریری
اودلار یوردو آذربایجان - آذربایجان
ایگیرد قیزلار قوچ اوغلانلار
گله جگه اینانانلار
یئنی دوران یارادانلار
یورویورلر سانکی اسلان - آذربایجان
پولاد کیمی بیلک ایله
خوش آرزویلا دیلک ایله
سئوگی دولو اورک ایله
هره یئلماز بیر قهرمان - آذربایجان
وقتسیز سولان گولوموزه
دوستاق اولان دیلیمیزه
قارا گونلو ائلیمیزه
شانلی بابک اولوب عنوان - آذربایجان
ده ده قورقود نفسی دیر
کور اوغلونون نعره سی دیر
ستارخانین گّوّله سی دیر
بذ قالاسی اولوب میدان- آذربایجان
مین اللرین سلطانی سان
قورتولوشون فرمانی سان
آزادلیغین عنوانی سان
آذربایجان ، آذربایجان – آذربایجان
اسماعیل جمیلی
جانیمدا جانلانیر آذربایجانیم
آرزو قانادیله گزن خیالیم
سوفره سینه قوناق اولور ائلیمین
توکنمز واریندان آز پای آلسادا
بال دادین دادیزیر شیرین دیلیمین
باشیم ساوالان تک قارلی قرولو
سهندیم سینمده آلیشیر یانیر
ائلیمدن یوردومدان اوزاق اولسامدا
شیرین خیالیله روحوم جانلنیر
سئوگی وورور میضراب دینله نیر کؤنول
شرابلا ر سوزولور قدحلر دولور
کمانلی قارمانلی تارلی قاواللی
سازلی بالابانلی یغوا قورولور
سوزور کهلیک کیمی یاشیل باش سونا
نازلا بری باخیر سئوگیلی جانان
اوجا داغ باشیندان انیب دوزلره
آلیب باشین گئدیر موغانا جیران
قارا قیز داراییر تئللرین یانا
یار قاداسین آلان یئنه یار اولور
اوچ تئللی دورد تئللی بئش تئللی دورنا
آیریلیق سونوندا وصالی بولور
چوبان بایاتیسین چالیر توتکده
کرمیندن یانیق باغریم قان اولور
گرایلینین آهین دردین دیلقمین
گؤزل لمه گؤزه چکیر بیر به بیر
قیزیلدان ناللاییر نبی بوز آتین
خان چوبان سارانی سئللردن آلیر
آشیق جونون تویون توتور نیگارین
کور اوغلو آت اوسته سازینی چالیر
کؤنلوم شورا گلیر نی لی نوالی
بمدن زیله قالخیر نغمه قاتاری
زابولدا سیزلایان شکسته کؤنلوم
کسمه یولدا دوروب گؤزله ییر یاری
شاه نازی گؤرسه ده بسته نیگاریم
یتیم سه گاهیمین سوزولور گؤزو
هومایون هیجردن بیداد ائتسه ده
گولور راست گله سی مخالف اوزو
چاهارگاه یول وئریر سما دا شمسه
ماهور ایاقلانسین آشسین حصارین
حیراتی ضربینه حیران قیلسادا
دریر منصوریه آرازین بارین
یاشلا دولان گؤز و گولور آنامین
چالیر واغزالینی تاریم کمانیم
سئوینجیله دولور کؤنول دنیاسی
جانیمدا جانلانیر آذربایجانیم
اسماعیل جمیلی
غربت آخشامی آذربایجان
قارانلیق قیجیدیر قاراجا دیشین غربتین آخشامی بوزور دوداغین
یخیق دیواریندان خیال ائوینین آرزو کؤلگه لری کسیر ایاقین
بوز باخیشلار اؤگی اؤگی پئچیلدیر دیاز گولوشلرین آغلاییر گؤزو
یالنیزلیق دئدیگین ایشینی گؤرور آنلامین گوستریر یازیقلیق سؤزو
چن بوروین سئودا دوشرگه سیندن قریق بیر خاطره اوزالدیر الین
آیریلیق چؤلونده آچیر باشیما آیریلماز گووه نین سرین کؤلگه سین
آیلارجا ایللرجه سورن سئودالار بیر آندا جانلانیر گؤزوم اؤنونده
حسرتین نیسگیلین دؤنمین آشیر وصال دیر یاشانیر هجران گونونده
جانیمدا جانلانان دوغما دویغولار تالیر غمه دولموش حسرت تارلاسین
ساوالاندان یولا دوشن بولودلار سئوگیله سوواریر کؤنول باغچاسین
آرزو تومورجوغو جان بوداغیندا یازین سئوداسیله گولور گول آچیر
میشودان بویلانان بختین اولدوزو سونوندا یوردونا دؤنوب نور ساجیر
تورپاغین عطریله آنا سئوگیسی تورزلو پرده لری وورور بیر یانا
خیال قانادیندا وورغون کؤنلومو بیر آن قوووشدورور آذربایجانا
اسماعیل جمیلی
Xeberde varidi ki, tebrizin aynali daginda pasdarlar saz chalanlari tehqir etmish chalmalarinin qabagini almishdilar:
چالین سازیم
چالین سازیم چالین سازیم
سنله یئتر چوخوم آزیم
چالین سئوگی دیاریندا
چیچکلنسین آرزی یازیم
یامان گوندور چالین سازیم
سنسیز الیم یالین سازیم
دینلن سسین ساز ائیله سین
ائل اوبانین حالین سازیم
سسلن ائله دایاق دوراق
چنلی بئلده یغوا قوراق
سئوگی دولو هاوالاردا
غم غصّه نین بوینون بوراق
میضراب قیلسین کرم یئنه
چالسین یانیق کرم یئنه
تئل تئل اولسون غم داغیمیز
درد اولماسین وره م یئنه
نه لر اولور سؤیله بیر بیر
قارا یئللر هاردان اسیر
چک هارایین دونیا دویسون
دیلیم باغلی ائلیم اسیر
چال قارانلیق ایتیب باتسین
اؤزگه لیگی آلیب آتسین
گولگز دؤنسون توفارقانا
عاشیق کؤنلوم وصله چاتسین
چال سئوگلیم چال قاداسی
اؤزه دوشسون جان یاراسی
چال اوخشاسین کؤنلوموزو
آذربایجان ائل هاواسی
اسماعیل جمیلی
گلمز
جان آلسادا هر بیر باخیشا یار اوزه گلمز
یوزلر جان آلار بو قورو جانیم گؤزه گلمز
اغیار اؤزون گؤزده توتار یار گزه ر اونلا
گؤزلر گؤزوم آغلار گؤزه لیم بیر بیزه گلمز
کؤنلومده نه لر وار دیله گلسه م فلک آغلار
عشقین چکیلر دردی دئیلمز دیله گلمز
بختیم قوشو یاد ائلده اسیر اولدوغو گوندن
هجران گئجه سی هی اوزایار گوندوزه گلمز
دنیانی اودا چکسه ده دیمز داشا باشی
زاهد قایئدیب ایری یولوندان دوزه گلمز
چاتمیش عواما جهل یوکون هی گله بیزلیر
شرم آیه سی بیلمم نیه بو اوزسوزه گلمز
دینین ائوی ویراندی بو دیندارلار الیندن
ایمان ایله تزویر اوتوروب دیز دیزه گلمز
گوندن گونه آرتیر غمی یوخسوللارین امّا
شیشمان آغالار پارتلاسادا پرهیزه گلمز
بوش وعده لره سؤزلره بیر کیمسه اینانمیر
بال زهره دئسنده آغیزا خوش مزه گلمز
یئرتیق یاماق ایلن یئنیلشمز متیل اولموش
کوفلنسه سؤزون یورما اؤزون سؤز تزه گلمز
دوران دگیشیر کیمسه قاباقیندا دورانماز
آیدین گله جک اسگی قالان دؤنمزه گلمز
زورلا نئچه گون دوشسه ده ظالیم لره فرصت
ظلم ایله عدالت باریشیب اوز اوزه گلمز
بیر گون گله جک آرزی یازی ائل گوله جکدیر
دؤز یانمیش اوره ک سویله مه کی تبریزه گلمز
اولسون گووه نین اؤز ائلینه یوردونا کؤنلوم
یاددان یارامیز بس کی دریندیر اوزه گلمز
سئودالی کؤنول سئوگیلی آزادلیقی گؤزلور
گلسه گؤرونر وصفی او یارین سؤزه گلمز
اسماعیل جمیلی
بویلو بولودلار
بویلانا بویلانا بویلو بولودلار
دولغون دولغون یئردن اوزاق گزمه یین
دخی آرتیق
گؤزله مه یین دؤزمه یین
سوتول سونبوللری اوشاقلار اؤزلور
بادام چیچکلرین باغچالار گؤزلور
دولو دولو دولانمایین اوزاقلاردا
اؤزه کلری بیر دوشونون دوزا قلاردا
بیر ایلدریم
بیر پاتلاییش
سونرا شدیرقی بیر یاغیش
آردینجا پارلایان گونش
گوی قورشاغی
سوزه سیغماز الوان ناخیش
داغلار دؤشو بولاغ بولاغ
یام یاماجدا
یابان گوللر چراغ چراغ
ساغین سودون سینه نیزین
دنیزلره قوناغ ائدین بو تورپاغی
یویون حسرت ایزلرینی
قادا بلالی قوراغی
اورک سیخان گؤرونتونو
بوغونتونو
یاغین آرزی ، اومود عطرین
ایلیق یئللر پایلاسینلار
موشتولوغون آلسین نیسان کولکلری
یوز ایللرین سوسوز قالان دوداغیندان
آینالینین " ککلیک اوتو" بولاغیندان
شاخان اوفوقده ایلدریم
دینمزلیگین دوستاغینی سارسیتمادان
نور تاتاری
قوسون قارا قورخو هه نیلتیسین
قوجا موغان بیر دینلنسین
دینله دیکجه سویون سسین
حسرت بیتسین
تورپاغ دویسون
نازلی گونش تئل تئل ایشیق ساچلارینی
سرسین اسگی داخمالارا
ساوالانین اتگینده
گنج اوزانلار جوقا قورسون
یاشیل یوردون قوجا دامی
ارک قالاسی
دمیر دوستاقدان قورتولسون
گولون گولسون کلبکلر
گولون آچیلسین اوره کلر
یاغین دویسون حسرت گؤزو
سؤنسون اومودسوزلوق کوزو
بویلانا بویلانا
بویلو بولودلار
گؤزله مه یین دؤزمه یین
سسسیز سؤز سوز گزمه یین
اسماعیل جمیلی
گؤزل وطن آذربایجان
هاردا اولسام کؤنلومده سن
سنسیز بیر آن اولمارام من
هئچ یاشارمی جانسیز بدن
ائل اوباسی قدیر بیلن
گؤزل وطن آذربایجان
گؤزه للری دسته دسته
اوجا بویلو بویو بسته
مارال کیمی مغان اوسته
هریئرچیچک هر یئر چمن
گؤزل وطن آذربایجان
آرزوموزون دوراغی سان
سئوگیمیزین اوجاغی سان
آزادلیغین بایراغی سان
عصیرلره سینه گرن
گؤزل وطن آذربایجان
داغلارینین بئلی چنده
یاغیلاری دوشن بنده
ساوالانین سینه سینده
سینه داغلی لاله بیتن
گؤزل وطن آذربایجان
آراز آدلی چایی آخان
آیریلیقدان یانیب یاخان
گله جگه آیدین باخان
ائولادینا گؤزون تیکن
گؤزل وطن آذربایجان
نظامی وار خاقانی وار
صائبی وار قطرانی وار
شهریاری ، حیرانی وار
هر بولبولو نغمه دئین
گؤزل وطن آذربایجان
بابک لری قلعه قوران
اؤز یوردونا صاحب دوران
یاغی یادین بوینون بوران
ایگیرلره اولان مسکن
گؤزل وطن آذربایجان
بیر گون بیتر سایسیز یاران
تخته چیخار خان ساوالان
اؤز ائلینه سهند ساطان
اولار یئنه بهره وئرن
گؤزل وطن آذربایجان
بئشیگیمین سؤزو سنده
اوجاغیمین کؤزو سنده
جمیلین وار گؤزو سنده
حیاتیما نور چیله ین
گؤزل وطن آذربایجان
اسماعیل جمیلی
بیز واریق
آیردیلار یول یاریه چاتمادان
آیریمچیلار یولوموزدان بیزلری
بیز دوز یولون دوزلوگونه وارمادان
ایری یولون بیتیردیلر اؤزلری
بیز گووندیک دوز ایناما دوز یولا
بیر باخمادیق تله قوران ساغ سولا
چاتدیرمادان یولو باشا قول قولا
بیزه دشمن گؤرستدیلر بیزلری
آلچاقلاری شیشیتدیلر داغ اولدو
مزارلاری بزه دیلر باغ اولدو
بیز قارا گون ، کؤمور اوزو آغ اولدو
یئنه بیزی گؤرنمه دی گؤزلری
دوشونمه دن یول کیمیندیر آتلاندیق
بیزه غنیم اولانلارلا یوللاندیق
یاری یولدا یولداشلارا تالاندیق
آختاراندا دؤنوملرده دوزلری
بیر گون باشا چاتاجاقدیر آیریلیق
یوبانسادا گله جکدیر آزادلیق
بؤلونساقدا ، تالانساقدا بیز واریق
کول آلتیندا ساخلامیشیق کؤزلری
اسماعیل جمیلی
 |
||||