|
|
|
|
آذربایجان ً فرزانهً سی نی انودمی یاجاق
2006 انجی ایلین دی آییندا( زانویه) سووق و قارلی بیر سحر وقتی، آذربایجان خلقی و انسانلیق ایچون چارپان بیر اورک دایاندی. ابدیین آرامیزدان آیریلدی. آجی خبر تز یاییلر، دکتر شکور بابازاده یاسلی بیر سسله خبری وردی، استاد محمد علی فرزانه دنیاسینی دگیشدی، دنیامیزی ترک الدی، بیزی ترک الدی، آذربایجانی ترک الدی، سون گوروشدوقوموزدا چوخ شیلر پلان لادیغینی، خاطره لرینی یازاجاق، ترک لغت نامه سینی تماملییاجاکدی. بیر آن فیکری و دهنی آذربایجاندان آیریلمادی، قلم الیندن، آدربایجان و انسان سوگیسی اورییندن و دیلیندن دوشمدی. استاد فرزانه ایله ایلک تانیشدیغیم ایل، 1997 گوتنبرگ شهرینده اولدی استاد صمد بهرنگی و اثرلری حقینده چوخ فایدالی معلومات وردی. قونوشما بیچیمی، دوروشو، وقاری، اینجلیغی و بونلاردان مهمی، گوزه چارپان کیشیلیغی و متواضع رفتاری هرکسی تأثیر آلتینا آلدیغی کیمی منی ده دوشونمیه یونلندیردی، اونا گوره همن دوستوم دکتر بابازاده دن خواهش الدیم استاد ایله گوروشمه امکانی حاضیرلاسین، الده اولدی بیر آخشام استادین یانینا و گوروشونه گیتدیم. آذربایجان دیلینه، کولتورونه، تاریخ و فولکلورونا مسلط و حاکم اولدوقونا ایناندیم. بو آرادا استادین سیاسی، اجتماعی آلاندا سوز صاحبی اولدوقونی اورگندیم. صمد بهرنگی حقینده ساعت لرجه تارتیشدوق، صمد و یازیلرینی اوخومیشدیم، امما بو قدر آیرینتلی و گنیش معلوماتا صاحب دگیلدیم. صمد بهرنگی نین ال یازمالارینی و تورکجه یازدیغینی اصرارلا گوستردی ، ایلک باشدا ادراک المدیم و حتی اوز اوزمدن سوردوم، ندن و نییه استاد، صمد بهرنگی، علیرضا نابدل، ساعدی و دیگر انقلابچیلارین آذربایجان کندلرینی تک تک دولاشیب، تاپماجا، ناقیل و فولکلورییغدیکلارینی و تورکجه یازدیکلارینی یورولمادان آنلادیر؟ ایللر سونرا بو ایشین نه قدر درین و اهمییتلی اولدوقونو اورگندیم. دیل، کولتور، ناقیل و اوشاق یاشدا اشیدیلن لای لای لار و دییملر کیملیک( هویت) ایچون چوخ بویوک بیر عنصر و اساس دیر. بو اساس دان اوزاق قالان انسان یرینه و یوردونا یابانجیلشیر( بیگانه) داها سونرا کیملبک بحرانی ایله اوزلشیر و قولایجه باشقا کیملیکلره بورونور و نهایت کیملیکسیزلشیر. اونا گوره اوشاق لیق دوره سینده انا دیلینده دانیشماق، مکتب ده انا ذیلینده اخوماق، دوشونمک و اوگرنیم گورماق غرور وریر و کیشینین فکری و ذهنی بنیه سینی ساغلاملاشدیریر. اونا گوره ده استاد فرزانه انا دیلینه چوخ اهمیت وریردی، حل بوکی فارس دیل و ادبیاتینی بیر دیل شناس کیمی چوخ یاخشی بیلیردی، امما انا دیلینه هر زمان باغلی قالدی و اونی اوستون تودی. زیرا بلی باشلی سیاست لرین آذربایجان دیلینی یوخ اتمگه چالیشدیغینی گوردی و او وضیته قارشی مجادله وردی. استاد فرزانه ده دیل قایغیسی واردی، ترک دیل و ادبیاتینین زنگین و قاپساملی دیل اولدوقونو بوتون آراشتیرمالاریندا اورتایا قویدی، اونا گوره دده قورقود دستانلاری، واحدین غزللری، فضولینین شعرلری، میرزا جلیلین یازیلازی و شهریارین حیدر باباسی اونون ایچون مقدس ساییلیردی. جوان یاشدا دده قورقودون دستانلاریله یاشادی، هر زمان تکجه هدفی آذربایجان کیملییننی قوروماق، گلیشدیرماق، آذربایجان دیلینین مستقل و قاپساملی بیردیل اولدوغونی ایضاح اتمک و دنیایا تانیتماکدی. اورکدن اورگه یول وار، استاد فرزانه نین صداقتلی رفتاری، منده و منیم کیمی بیر چوخ آذربایجانلی ده تأثیرینی قویدی، آذربایجان دیل و ادبیاتینا باخیشیمیز دگیشدی، آذربایجان غرور قایناقیمیز اولدی. استادین گوتنبرگ شهرینه یرلشمسی دنیا گوروشوموزو دگیشتیردی و یاشانتیمیزا ینی رنگلر قاتدی. استادی یانیمیزدا گورماخ هامیمیزی سویندیردی، امما استادین قلبی و روحی آذربایجان و تبریز ده ایدی. اوز ایستگی ایله بوردا یرلشمیش دگیلدی، ینی بیر سورگون دوره سی ایدی، ایلک سورگونو آذربایجان و جانی کیمی سودیغی تبریز دن آیریلیشی و تهران دا یرلشمسیدی، بو دوره ایللرجه تبریزه قاییتماسی یاساخلانمیشدی. گرچی، داغدان، داشدان، دره دن گیدرک تبریز دن هیچ آیریلمادی، امما گینه ده تبریز ده اوز میلتی ایله یاشاماماسی هر زمان اورگینده بیر نیسگیل و یارا کیمی قالدی. بلکه ده اونا گوره تبریز ده باستیریلماسینی وصییت الدی و ایستدی. تبریز غرورلو، نیسگیلی، غیرتلی و قهرمان پرور بیر شهردی، بوتون اجتماعی حرکت لر بو شهر ده اولقونلاشیب ئولکه یه یاییلیبدی، بیر چوخ دفعه اشغال آلتیندا قالیب، اینلییب، دردلنیب امما سر وریب سیر ورمییب و بویون اگمییب. اونا گوره تبریز حقینده چوخلی حکایه، رومان، شعر و خاطره یازیلیب، آذربایجان لیلار و دیگر میلتلر اونا سایغی گوستریر. هله ده بوتون ایران خلق لری آزادلیق حرکتینین تبریز دن باشلییاجاقینا انانیر. استاد فرزانه گیدیغی یره برکت، دوسلوق و تشکیلاتلانما گوتورمشدور. ایله جده، گوتنبرگ، مالمو و استهکلم شهیرلرینده ینی درنک لر( انجمن) قورولدو، سیاسی و اجتماعی حرکت لر هیز قازاندی و گنیشلدی. مالمو دا درگی و گوتنبرگ دا رادیو پروگراملاری حاضیرلاندی. استاد فرزانه نین قوتلی و گوجلو سسی ایله شعرلر اوخوندی. استادین شعر دفتری گوستردی کی تورک دیلی بیر پارا فاشیست فارس ذهنییت و شوونیست دوشونگه نین ترسینه کی تورک دیلی شعر و ادبیات دیلی دگیل، چوخ دا شعر و ادبیاتا اویغون، مناسب و گوزل دیر و گنیش دیل اولدوقی ایچون اورک سوزی راحات دییلیر. اوناگوره ده دنیا ادبیات لیتراتورینه تورک دیلی چوخ شیلر قاتمیشدیر. ناظم حکمت، یاشار کمال، عزیز نسین، میرزا جلیل و نوبل ادبیات جایزه سینی قازانان اورهان پاموک بو دریایه توکیلن بیر ایرماق دیر. استاد فرزانه نین گوتنبرگ شهرینه یرلشمسی برکت قایناقی اولدی. شهره گلن و یا دعوت اولان یازیچی، سیاست آدامی،موزیکچی و دیگرلری ایلک اونجه استادی سوروشور و گوروشونه گدیر. استادین 80 انجی دوغوم گونو آذربایجانین تانینمیش سیمالاری بو شهره توپلاندی. استاد جواد هیئت، استاد صدرالاشراف، استاد مینویی و دیگرلری اشتراک ایلدیلر، چوخ محتشم و تانتانالی و استادا لایق بیر گجه ترتیب لندی. گوتنبرگ شهری آذربایجان لیلار آراسیندا چوخ مشهور اولدی، اونا گوره استاد فرزانه نی الدن ورماق بورا یاشیان آذربایجان لیلار ایچون داها آقیر و آجی اولوبدور. استاد فرزانه بیر چوخ آراشدیریجی و یازارا یول گوستردیغی کیمی منیم ایچون ده الهام قایناقیدی، یازدیغیم، آراشدیردیغیم و ایضاحا چالیشدیغیم تاریخی حادثه لراونون ایچون تازا بیر شیلر دگیلدی، امما صبیر و متانت له قولاغ آسار و یول گوستریردی. اونا گوره استاد دان خواهش الدیم سیاسی خاطره لرینی هیچ اولماسا بیر پارچه سینی منیمله اورتایا قویسون و من ده اونلاری قلمه آلیم. استاد قبول الدی، دوستوم دکتر بابازاده ایله نچه جلسه اتوردوق و استادین ددیکلرینی قلمه آلدیق، داها سونرا استاد اوزو اونلاری گوزدن کچیردی و بیر مقدمه( اون سوز) یازدی، بو خاطره لر 1320 ایله 1325 انجی ایللری آنلادیر، نتیجه ده بیر کتاب ً آذربایجان در گذرگاه تاریخ و گفتگویی با استاد م. ع. فرزانهً آدیله اورتایا چیخدی. بو کتاب 2006 انجی ایلده ایسوچ( سوئد) ده یایینلاندی. استاد فرزانه نین 82 ایل یاشام و مجادله سینی قیسا بیر یازی یا سیغدیرماق ممکن دگیل، یازدیقلاری مقاله، کتاب، آراشدیرما اوقدر چوخ ساییدادیر کی بیر گروپ و یا استیتو طرفیندن ایجلنیب و دگرلندیریلملیدیر. بو اسقامتده بیر کمیته تشکیل تاپیپ، امیدیمیز وار وقت گچمدن بو کمیته ایشینه باشلار و استادین داقینیک اثرلری ثوپلانیر. استاد فرزانه پداگوژی آلانیندا اولدوقو کیمی اجتماعی و سیاسی آلاندا دا گنیش فعلیت گوسترمیش، آنتی فاشیست فعالیت و صلح ایچون مبارزه ده اشتراک اله میشدیر. بونا گوره هم شاه رژیمی هم ده اسلام جمهوریتی رژیمی طرفیندن گوز آلتیندا توتولوب و کنترل اولونموشدور. استاد ایکی رژیمله هیچ بیر زمان باریشمادی. شاه زندان لاری، تشویق لری و تهدید لری اونو جایدیرمادیغی کیمی، اسلام جمهوریتی نین جنایت لری ده اونو آذربایجان عشق ایندن و خلقه باغلیلیغیندان اوزاق لاشدیرمادی، یولونون دوغرو اولدوقونا ایناندی و عمرونون سونونا قدر دیرندی. استاد فرزانه، 1357 انجی ایل و انقلاب دان سونرا بیر چوخ دوستی او جمله دن دکتر جواد هیئت، دکتر حمید نطقی، حسینقلی کاتبی و باشقا لاریله آذربایجان جمعیتی( انجمن آذربایجان) و انجمن اورگانی ساییلان وارلیق درگیسی ودیگر تورکجه کتاب و بوروشور لارین چیخماسیندا اشتراک ایتدی. وارلیق درگیسی آدینا اویغون اولاراک آذربایجان میلتینین اویانیشیندا و تاریخی بیلجی لنمسینده بویوک رول اوینادی. 1357 بهمن آییندان سونرا آذربایجان انجمنی طرفیندن منتشر اولان بیلدیری و اطلاعیه لر میلتین آیدین لانماسینی ساغلادی، بو اطلاعیه لرین بیرینده بیله یازیلمیشدی. ً این وظیفه را که ما آذربایجانیها همراه با همه مردم مبارز و آزادی خواه ایران نه امروز و نه دیروز و نه پارسال و پیرارسال بلکه از یک قرن پیش در سنگر ها و پایگاه های ملی با خلوص نیت و از اعماق دل و جان انجام داده و همواره سرسخت و پیشگام بوده ایم، اینک نیز ادامه همین وظیفه ملی را در پایگاه اجتماعی و سیاسی و فرهنگی و انجمن آذربایجان که تاریخ آن با تاریخ درخشان آزادی ایران توامان است اعلام می داریمً بو یازی استاد فرزانه و دیگر آذربایجان آیدین لارینین دمکراسی و انسان حقلرینه باغلی اولدوقلارینی و بوتون ایران دا دمکراسی نین یاییلما آرزوسوندا اولدوقلارینی گوستریر، یازینین باشقا بولمسینده بیله گلیر ً ...بدینسان ما فرزندان آذربایجان... با اتکا به نیروی سر سختی و پایداری و سجیه شور و حمیت آذربایجان، همه آزادی خواهان و رزمندگان این سامان را در سراسر ایران به همکاری و کوشش در راه احیاء دمکراسی و استقرار نظام مترقی فرا می خوانیمً یازی سیاسی قوه لره یول گوستریر و ملی مسئله نین چوخ حساس اولدوغونی و معقول بیر شکیلده حل اولماسا بویوک بحران لار اورتایا چیخاجاقینی بیلدیریر، زمان بو فیکرین و دوشونجه نین دوغرو اولدوقونی گوستردی، اعلامیه نین باشقا یرینده بیله گلیرً اگر مسئله ملی حل نگردد، تشخص و هویت همه ایرانیان و حق تعیین سرنوشت خلق های ایران قطع نظر از اختلاف زبان، مذهب، تمدن، شیوه زندگی و سایر ویژهگی ها در قاموس هیأت حاکمه پذیرفته نشود، مبارزه ضد امپریالیستی و استقرارحاکمیت ملی و حفظ اتحاد و یگانگی امکان پذیر نخواهد بودً ( اعلامیه انجمن آذربایجان، وارلیق، شماره 1 ، اردیبهشت 1358). اعلامیه انجمن آدینا وریلسه ده ، یازی استاد فرزانه نین دوشونجه سی و قلمی دیر. اونا گوره ایران اسلام جمهوریتی و اونون اطلاعات و امنیت تشکیلاتی استاد فرزانه دن گوزینی آییرمادی و بوتون فعالیت لرینی نظارت آلتینا آلدی. بو وضعیت استادین دیریلیغینده اولدیغی کیمی اولیمینده ده سوردی. استاذین تورپاغا تاپیشیریلما سرمونی سی و تعزیه سوره سی انتظامی و امنیتی قوه لر طزفیندن کنترل ادیلدی . امما آذربایجان تورک میلتی، خصوصأ جوان لار و ایران دا یاشیان باشقا میلت لرین آیدین لاری و دمکراسی طرف دارلاری استاد فرزانه ایچون یاس تودولار و انون تعزیه سینده اشتراک الدیلر. استاد فرزانه بیر ایل اونجه آرامیزدان آیریلدی. بو مدت ایچینده یری، عظمتی، شخصیتی و یوخلیغی داها چوخ آنلاشیلدی، انسان بیر داغین دیبینده دورسا، اونون نه قدر عظمتلی اولدوقونی ادراک ایلمز، اونا گوره بیر آز اوزاخلاشیب اونا باخارسا، انون چوخ عظمتلی اولدوقونی گورمیه باشلار، استاد فرزانه نین عظمتی و بویوک بیر عالم اولدوغی ایندی داها چوخ آنلاشیلیر. استاد فرزانه تاریخین ایچینده یاشادی، مترقی دنیا گوروشو واردی، هیچ بیر زمان گجمیشه ساپلانیب قالمادی، دمکراسی، انسان حقلری، سوسیال عدالت( عدالت اجتماعی)، سکولاریزم، باشقا میلت لره سایغی و بیرلیکته صلح ایچینده یاشاما مجادله سی وردی. اونا گوره آذربایجان و تورک دنیاسی اوز فرزانه سینی اونود می یاجاق و انون گوستردیغی یولدا یورولمادان ایلرلیه جاقدیر... سوئد. دکتر محمد حسین یحیایی
|
||
|
|
|
Materiallardan istifadə zamanı qaynağa istinad
vacibdir |