|
|
|
|
عزيز و چوخ حؤرمتلي رهبر! سوروجو " عزيز يولچولار، اوسلو-بئرگئن سفريني بيزيمله ائتديگينيز اوچون چوخ شاديق. 8 ساعاتليق يول مودتينده هر بيري 15 دقيقه اولماقلا 3 دفعه داياناجاغيق. آوتوبوسوموزون آرخا حيصه سينده توالئتله ياناشي پولسوز چاي و کوفئدن يولبويو يارارلانا بيلرسينيز... " دئينده آرخا اوتوراجاقلارين بيرينده من يئريمي راحاتلاييرديم. اليمده کنوت هامسونون " آجليق " روماني اولسا دا پينکين " دئار مر پرئزيدئنت " ماهنيسي اوزاقلارا آپاريردي مني. يول کنارلارينداکي چيراقبانلارين نئجه بير-بيريلريني عوض ائتديگينه باخسام دا اؤزومو پينکين يئرينده هيسس ائديرديم...
* * * اوسلو اولليوال ستاديونو تيکليم-تيکليم دولودور. ستاديونون مرکزينده قوراشديريلميش بؤيوک صحنهده پينک دينلگيجيلره سسله نير: " ايندي اوخوياجاغيميز ماهنيني بيرگه ايفا ائتمک اوچون صحنهيه لاسسئ کيلوري دعوت ائديريک " . من ياريمچيلپاق حالدا صحنهيه قالخيرام. چوخ گورولتولو آلقيشلار. هامي اؤزوندن چيخيب... بيليرلر بيز نه اوخوياجاغيق: " دئار مر پريمئر مينيستئر " . ايللر بويو ديليميزي بوغازيميزدا کسن حاکيميت رهبري ايله وطنيميزي قاريش-قاريش گزه جگيک... (يسپان گيتاراسي سسله نير، ماهني باشلايير، بيز اوخويوروق) عزيز و چوخ حؤرمتلي رهبر، گل بير آز گزک شهريميزي قاريش-قاريش تصوور ائدک کي، هر اوچوموز ساده اينسانلاريق يولبويو صميمي سواللار وئره جگم آخي سن مونارخ دئييلسن... (خور: سني بيز سئچميشيک، بيز سئچميشيک، بيز سئچميشيک)
نئجه هيسس ائديرسن اؤزونو کوچه لرده ائوسيز اينسانلارين اوزلرينده قيريشلاري گؤررکن؟ نئجه هيسس ائديرسن اؤزونو گئجه لر کؤرپه اوشاقلارين کوچه لردن بوتولکا توپلاديغينا باخارکن؟ نئجه هيسس ائديرسن اؤزونو گنج آنالارين کؤرپه بالاسيني ساخلاماق اوچون فاحيشه ليگه قورشانديغيني بيلرکن؟ بو اؤلکهني بو کؤکه قويدوغون اوچون فخر ائده بيليرسنمي؟ (خور: فخر ائده بيليرسنمي، بيليرسنمي، بيليرسنمي؟ )
صحنه نين آرخاسينداکي دئو ائکراندا دؤولت باشچيسي کارليوهان کوچه سينه گزينتييه چيخيب. هامي ايله حال-احوال توتور. قفيلدن بير گنج موعليم بير اوشاغين اليندن توتوب اونا ياخينلاشير: " جناب رهبر، بو اوشاغا باخين! باخين اوشاغا! باخين بو کير-پاساق ايچينده اوشاقليغيني قورويوب ساخلايان اوشاغا! آياققابيسي اولماسا دا او، اوشاقليغيني ياشايير. باخين اونون اوزونده کي تبسسومه، حالبوکي بو اوشاقجيغاز نئچه گوندو يئمک يئمير، آجدير. توتون اونون کيرلي اللريندن، اللريندن توتون، هيسس ائدين اونون اورگي نين پاکليغيني. باخين اونون گؤزلرينده چاخان شيمشه يه، آخان لئيسان ياغيشا... هارداسان، آللاه، گيزلنمه، چيخ اوزه، سن ده باخ بو اوشاغين گؤزلري نين ايچينه. بيرليکده باخين بدبخت ائيديگينيز بو اوشاقجيغازين گؤزلرينده کي عشقه...(مولليم و اوشاق آغلاشيرلار... هامي گولور... قورويوجولار هر ايکيسيني سورويوب آپاريرلار)
عزيز و چوخ حؤرمتلي رهبر بيزلر آغلارکن سن گئجه لر نئجه ياتا بيليرسن؟ گئجه آتالار صاباح اوشاغينا نئجه چؤرک آلاجاغيني دوشونرکن سن نئجه يوخو گؤره بيليرسن؟ سن ياتارکن آنالارين اوشاغي اوچون ياد کيشيلرين قوينوندا ياتديقلاريني بيليرسن؟ و هر سحر گوزگويه باخاندا نه هيسس ائديرسن؟ (خور: دئ، نه هيسس ائديرسن، نه هيسس ائديرسن، نه هيسس ائديرسن؟)
ائکراندا جناب رهبر " گرؤنلاند " مئترو ستانسيياسيندان " دؤولت باشچيسي يانيندا دؤولت ايداره چيليک آکادئميياسي " طرفه آدديملايير. هر طرفدن سسلر گلير: " جناب رهبر، عشق اولسون سيزه! " ، " آللاه منيم عؤمرومدن کسيب سيزه جالاسين " ، " سيزه قوربان اولوم " ... جناب رهبر گولور، هاوادا ال يئلله يير... بير طلبه ياخينلاشير: " جناب رهبر، بو اينسانلارا باخين، سيزه نئجه ده ال چاليرلار، اونوتمايين کي، صاباح سيزي آساندا دا بونلار بئله ال چالاجاق. بيليرسينيز نييه؟ چونکي بو اؤلکهده سيزي هئچ کيم سئومير. من طلبيم، بو آکادئمييادا اوخويورام. سيز بو آکادئمييادا منيم سوسيال-تحصيل حاقلاريمي محو ائتدينيز. باخين بو تحصيل اوجاغينا، ياخشي باخين. کيتابخاناسيندا بوتون کيتابلار سيزه يازيليب، موعليملرين موهازيره لري سيزدن بهس ائدير، ديوارلار سيزدن دانيشير، يئر-گؤي سيزي تعريف ائدير. بو آکادئمييادا بيز طلبه لر اوچون جمعي 2 کومپوتئر وار، اونون دا بيري نين ميشکاسي ايشلمير. بونا گؤره سيزي سئوميريک... 2 ايل اؤنجه منيم طلبه دوستوم اؤزونو آسدي، بلي سيز قاتيلسينيز، عزيز باش نازير مر ستولتئنبئرگ... سيز هئچ اينتيحار باره ده دوشونموسونوز؟ حياتينيزدا 1 دفعه ده اولسون اينتيحارا جهد ائتميسينيز؟ بس نييه بيزي اينتيحارا سوروکله ييرسيز؟ آخي من ياشاماق ايسته ييرم. آخي من سئومک، کيمه سه عاشيق اولماق ايسته ييرم... (تلبه آرتيق باغيرير) سيز قاتيلسينيز، بيز گنجلرين اوميدلريني اؤلدورن قاتيل. بيزيم آرزولاريميزي چالان اوغروسونوز... " قورويوجولار بو گنجين ساچلاريندان توتوب سورويه رک آپاريرلار... يئنيدن اطرافدان سس اوجالير: " سيزي مين ياشايين! " ، " عشق اولسون سيزه! " ...
عزيز و چوخ حؤرمتلي رهبر سيز کيمين رهبريسيز؟ اوميدي توکنميش، اؤلمه يه، اينتيحارا حاضير گنجلرينمي؟ دئپرئسسيو، يالقيز، تنها اينتئللئکتواللارينمي؟ ديزه قدر پالچيغين ايچينده ياشايان، ايشيقسيز، ياناجاقسيز، آج-يالاواج کندليلرينمي؟ بورجلا دوغولان، بورجلا بؤيوين، کيمه سه بورجلو اولان اوشاقلارينمي؟ بس کيمين، جاواب وئرين، کيمين رهبريسيز؟ (خور: جاواب وئرين، کيمين رهبريسيز، کيمين؟)
جاواب وئره بيلميرسن، سوسورسان، دينميرسن بونا گؤره ده سن هئچ واخت بيزيمله شهري گزمه يه چيخماياجاقسان... يوخ، سيز دوزله سي دئييلسيز...
ماهني نين بو حيصه سينده حزين مئلودييانين سسي آزالاراق روکا چئوريلير. توفان قالخير، هامي بير-بيرينه قاريشير. ائکراندا رهبر گولور. هامي باغيرير. تاماشاچيلارين ايچيندن افسانوي " يوخو " صحنهيه قالخير، هامي ائکرانا اوز چئويره رک اوخويور: " سن شرسن، سن شر! " صحنه قاريشير بير-بيرينه. اوززي اوسبوورنئ " جامئ اوووونننن، فوجکينگ روووولئس، فوجک يوو! " باغيراراق سول طرفدن الينده سويلا دولو وئدره ايله صحنهيه قالخير، سويو دينلگيجيلره آتير، هامي آياغا قالخير، پينک فلويد آرخاسيندا کيلسه زنگي ايله صحنهيه چيخير، دينق-دينق-دينق. زنگين سسلري بوتون شهري لرزه يه سالير... هامي، داويد گيلموور، اوززي، روللينگ ستونئس، پينک، کورت جوباين، من و سيز - هاميميز باغيريريق. هامي سئوينجيندن آغلايير... ائکراندا فرقلي منظر: کوچه دؤيوشلري، پوليسله البياخا، روشوتخور موعليملر آياق آلتيندا تاپدانير، 1 قيز طلبه ديا-نين رئکتورو آدولف قنديلسئنين اوزونه توپورور، اونون اوستونه هوجوم ائدير... ائکئبئرق زيروه سيندن اوسلو قارا توستو ايچينده گؤرسه نير. سوندا ائکراندا تورپاق سيلکله نير، اونون آلتيندان بير گول کولو قالخير و گول آچير - قيرميزي قيزيلگول...
* * * " باغيشلايين، 15 دقيقه چؤلده هاوا آلمانيز سيزين اوچون ياخشي اولار، داها 4 ساعات يولوموز وار. " گؤزلريمي اوووشدوروردوم. بدنيمدن قان-تر گئديردي. " بو نه ايدي من يوخودا گؤروردوم؟ يوخ، بئرگئنه چاتانا قدر ياتماياجاغام " دئينده آرتيق سيقارئتيم توستوله نيردي...
Abbas
|
||
|
|
|
Materiallardan istifadə zamanı qaynağa istinad
vacibdir |