آبتامين سوروملوسو موهنديس آيدين صادقی ايله اؤزل دانيشيق
آراشديرمانين يئري و تأثيري ميلی حركتده
اؤن سوز:
هرحركتين ان اونملي ايشلريندن بيريسي آراشديريجي ايشلر گورمك دير.بللي دير كي آراشديريجي سيز،تحليل و آناليز اولونماميش ايشلرين ضررلري چوخ چوخ اولا بيلر.هر ايشي گورمه ميشدن اؤنجه او ايشي آناليز ائديب اونو گوج و ضعف نقطه لريني آچيغلاييب سونرا او ايشي گورمك هزينه ني آشاغي گتيررك اونون ائتگيسيني ده چوخالدار.
بئله ليكله آذربايجان ميلي حركتينده اؤنجول قروپلاردان بيريسي اولان آذربايجانلي بيلي يوردلولار توپلومو بيرآراشديرما مركزي قورماق ايله چاليشير الينده اولان آز مادي ايمكانات دان يارارلانيب و ميلي حركتده اولان چتين ليكلري آراشديريب و اونلارين حلي اوچون يول تاپسين.
آبتام اولا بيلر بو گون بوتون حركت اولان قروپلار اوچون بير اولگو اولسون،
بو مركز ايله چوخ تانيش اولوب و ميلي حركت اولان بعضي سورغولارين جاوابي تاپماق اوچون بو مركزين باشقاني موهنديس آيدين صادقي ايله بير معنوي اوتوروم دا دانيشق ائتديك
تهرانا ائتديگي سفر ده موهنديس صادقي نين قوللوغو چاتيب و باشينين شولوغ لوقونا باخماياراق بير بو ايسته گيميزي قبول ائتديلرو قرارا گلميش واقتدان چوخ، بيز ايله دانيشيقا داوام ائتديلر.
آراز: اؤزونوزو اوخوجولاريميزا تانيتديراسينيز.
اؤنجه ده سيزه و بوتون اوخوجولارينيزا سالام دئيب، هامينيزا باشي اوجاليق و اوغورلار آرزي ائديرم.
«آيدين صادقي» يم، 1353 جي ايلين باشاق (شهريور) آيي سينين ييرمي سينده تبريز شهرينده دونيايا گلميشم. آتام ايله آنام اوجان (بستان آباد) ين «سهند آوا» ماحاليندان اولموش، تبريزده ائولنميشديلر. ايلک اوخول ايله اورتا اوخولو تبريزده بيتيريب، 1372 جي ايلده کونکوردان قبول اولوب، دؤرد ايل اورمو بيلي يوردوندا تحصيل آلاندان سونرا، الکترونيک ريشته سينده موهنديس ليک آلميشام. هابئله 1377 جي ايلده يوکسک ليسانس کونکوروندا اوغور قازانيب، تهرانين تربيت مدرس بيلي يوردوندا تحصيله داوام وئريب، 1379 جي ايلين باليقلار (اسفند) آييندا الکترونيک ريشته سينده يوکسک ليسانس آلميشام. اوندان سونرادا 21 آي امريه شکلينده عسگرليک ائتميشم و ايندسه ده ايشه مشغولام.
آراز: بويوراسيز هاچاندان آذربايجان مسائيلي ايله ماراقلانيب سيز و بو اوغوردا نه ايشلر گؤروبسوز؟
شهرده ياشاديغيميز حالدا، آتام ايله آنام ين کندلي اولدوغو ايچين، اوشاقليق چاغلاريندان اؤز فولکولوروموزلا، شعرلريميزله، دب لريميزله و عاشيق موسيقيمزله بيرگه بوي آتميشام. راهنمايي اوخودوغوم چاغدا کوراوغلو ايله آتام و توکان قونشوموز اولان رحمت ليک آلماس عمي نين واسيطه سيله تانيش اولدوم. ائله هامان زاماندا آتام کوراوغلو کيتابيني منه آلدي و من دفعه لرجه اونو اوخودوم. هابئله دفعه لرجه كوراوغلو داستانينی اونلارين ديليندن دينله ديم. عاشيق ناوارلاري و تويلاريميزدا چالينان عاشيق موسيقي سي منيم روحومندا درين بير تأثير بوراخاردي. اورتا اوخولدا شهريارين تورکجه ديوانين دفعه لرجه اوخويوب باشا چيخديم. هابئله نئچه يوز صحيفه لي اولان امير ارسلان رومي نين تورکجه کيتابيني اوخودوم.
هر حالدا تورک مسائيليندن اؤترو توپلومسال ايشلر ايله ماراقلانماديم. راهنمايي اوخودوغوم زامانلاردا، اطرافيمدان اولان توپلومسال، ايقيصادي و فرهنگي چتين ليکلر منه تأثير بوراخيردي و مني بو چتين ليکلري آرادان چؤزدورمک ايچين چاليشماغا چاغيريردي. بو دويغو و دوشونجه گونو گوندن مني تحريک ائديردي. اليمدن گلن يول و هابئله او زامان دوشوندوگوم دوز يول درس اوخوماق ايدي. راهنمايي دؤوروندن بري بوتون خبرلري ايزلرديم، بو ايش منيم نجور فيکير ائتمه ييمده و دوشونمه ييمده داها آرتيق تأثير بوراخدي.
آنجاق اورتا مکتبين ايکينجي ايليندن بري داها آرتيق آذربايجان دردلرين دوشونمه يه ماراقلانديم. دئمک دوشوندوگوم دردلري داها آرتيق آذربايجاندا زوم ائيله ديم. بو دردلرده يالنيز ديل و فرهنگي دردلر دئييلدي. بلکه آذربيجانين بوتون دردلري، اؤزل ليکله فرهنگي، ايقتيصادي، توپلومسال و سياسي دردلري ايدي. هابئله قره باغ ساواشي منده اولان دويغو ايله دوشونجه ني آرتيردي.
دوغرو دئسم دويغوم اونلار قات دوشونجه مدن آرتيق ايدي. ائله بو دوشونجه و دويغو ايله اورمو بيلي يوردوندا تحصيله باشلاديم. بيزدن قاباق اورمو بيلي يوردوندا آذربايجان ديلي و فرهنگي حاقدا چاليشمالار واريدي، آنجاق او زامانين دورومونا گؤره اوقدر آچيق و آيدين دئييلدي. آز زاماندا اورادا چاليشان اوشاقلارلا تانيش اولدوم و دؤرد ايل اورمودا اولدوغوم زامان اليمدن گلن قدر چاليشديم. ائله اورادا سايين قارداشلاريم و يولداشلاريم دوكتور دباغ، دوكتور سلطاني، دوكتور عليزاده، موهنديس محمدپور، موهنديس امامي، دوكتور توحيد ملك زاده و باشقالاريلا تانيش اولوب، ايش بيرليك ائتديك. اورمودا اولان زامان ايلكين اؤيرنجي سل درگي اولان اوشاق ادبياتي حاقدا «بايرامليق» درگي سيني ايكي ساي چيخارتديق و سونرالار بو درگي نين ايكي سايي سيني تهراندا و توپلومدا يوخاري تيراژدا (4000 دنه) چيخارتديق. اورمودا اولان زامان چئشيدلي ايشلرده يوكسك سويه ده امكداشليق ائتديك. بونو دئمه لي يم منجه آذربايجان ميلي حركتينده اوگونلرده اورمو بيلي يوردوندا گئدن ايشلرين اؤنملي رولو اولموشدور.
تحصيلي بيتيرديكده يوكسك ليسانس سيناغيندا قبول اولوب، تهرانين تربيت مدرس بيلي يوردوندا تحصيله باشلاديم. ائله اورمو مجموعه سيندن سايين يولداشلاريم دوكتور دباغ، دوكتور سلطاني، موهنديس محمدپور، موهنديس امامي جنابلاري دا تهراندا يوكسك ليسانس اوخوماغا نائليت تاپديلار. تهرانا گيرن گوندن، بير ايلدن آز ياشلي اولان «آذربايجانلي بيلي يوردلولار توپلومو» نون اوشاقلاريلا تانيش اولوب، يورولمادان ايش بيرليگه باشلاديق. بيزده اولان ماراق و تجروبه، توپلوم اوشاقلاريندا اولان آچيق كؤنول لولوك سبب اولدو آز زاماندا ايشلرده و تصميم توتمالاردا سهيم اولاق و داها آرتيق جيديت له ايشلرله ياناشاق. دييه بيله رم توپلومون بوتون ايشلرينده باشقا يولداشلاريم، باجيلاريم و قارداشلاريملا بيرگه اولموشام و ايندي ده وارام. بير دؤنه (79 78 ايللرده) توپلومون مركزي شواراسيندان اولموشام. 1380 جي ايلده بير ساي چتين ليكلر اساسيندا توپلومون قوروجو هيئتي مسئوليت داشيماقدان عوذر ايسته ديگي ايچين، بير ساي يولداشلارلا بيرگه توپلومون قوروجو هيئت اولماسيلا ايچ ايشلر باخانليغي اؤنونده سوروملانديم. اينديسه ده ايل ياريم دير آذربايجانلي بيلي يوردلولار
توپلومو آراشديرما مركزي (آبتام) باشچيسي عونواندا چاليشيق آپاريرام. هابئله توپلومون گؤزتچي هيئتي نين اويه سي كيمي چاليشيرام.
آنجاق بو ايشلرله برابر ژورناليستي چاليشيقلاريمدا اولوبدور. دؤرد ايل دير اؤيرنجي درگي سينين يازارلار هيئتي عونواندا بو درگي ده چاليشيب، قلم چاليرام. هابئله بير مودت «اؤيرنجي باخيشي» درگي سينين باش يازاري اولموشام. چئشيدلي هفته ليك و درگي لرده او جومله دن «نويد آذربايجان»، «مبين»، «اميد زنجان»، «آبتام» ين اؤزل سايلاريندا و اؤيرنجي درگي لرينده مطلبيم چاپ اولوبدور. هابئله چئشيدلي قورولتايلاردا، تؤرنلرده و اينترنت
دوشرگه لرينده چيخيشيم اولوبدور.
آراز: آبتام ين نئجه يارانماسي حاقدا ايضاح وئرمه يينيزي ايسته ييرديك.
- آذربايجان ميلي حركتينين گليشمه سي ايله برابر، اوندا طرح اولونان ايستك لر و ايستك لره چاتماق ايچين نظره آلينان يوللار، توتولان تصميم لر، ايستيراتژي و تاكتيك لر، و هر زاددان اؤنملي بو حركتين آماجي و هدفي نين نه اولدوغو حاقدا چئشيدلي سورغولار اورتايا چيخيردي. هابئله حركتده اولان فرد و ياخود گروهلارين بعضي لرينين اؤز فيكيرلريني لاپ دوغرو فيكير عونواندا بوتون حركته تحميل ائتمه يينه شاهيد اولوردوق. طرح اولونان سورغولارا جاواب وئرمك گركلي ايدي. جاميعه ده، اؤزل ليكله بيلي يوردلاردا گئدن آغير بحث لر و طرح اولونان مسائيل لر آذربايجان ميلي حركتي ني گوجلو بير مئيدانا و ياريشا چاغيريردي. بئله مئيدانا داها دويغولو سؤزلر و مظلوميت حربه سي ايله گيرمك اولمازدي. يئني نسل داها خيالي و ايده آل وعده لرله يوخ، بلكه علمي و رئال سؤزلر و دوشونجه لرله ماراقلانير. بئله بير سورغولارا جاواب تاپماق، هابله چئشيدلي يوللاري آراشديريب، ياخشي يوللاري و تاكتيك لري سئچمك داها آرتيق دانيشگاهلي طئيف دن اومولوردو. «آذربايجانلي بيلي يوردلولار توپلومو» دا دانيشگاهلي طئيفي ايله آرتيق ايلگيلنديگي ايچين داها چوخ گؤرولنيردي. بو مسئله آيلارجا توپلومون چئشيدلي قوللاريندا بحث اولوندو و نهايتده مركزي شورا آبتام ين اساسنامه سيني تصويب ائتمكله، يارانماسينا ايذن وئردي.
آراز: اولورسا آبتام ين يارانماسيندان اولان آماج و هدفلري ده آچيقلاياسيز.
دئديگيم كيمي آبتام آذربايجان ميلي حركتينده طرح اولونان مسائيل لرله علمي ياناشماق ايچين ياراندي و ايندييه كيمي ده بو اساسدا عمل ائديب دير. آبتام ين اساسنامه سينده گلديكي كيمي آبتام آذربايجان ميلي حرکتينده فيکري ديرچه ليش اوغروندا آدديم آتاجاق و بو يولدا بوتون شخص لر، درگي لر، اوستادلاردان فايدالانيب، يئني يئتمه قلم چالانلارا يارديم ائدجک.
آنجاق بو هدفلره چاتماق ايچين و هابئله طرح اولونان سورغولارا جاواب تاپيب، فيكيرلرله ياخشي ياناشماق ايچين، تشكيلاتلارين محدوديت لريندن اوزاق اولماق گركلي دير. بو مسئله توپلومون مركزي شوراسيندا بحث اولوندو و اونون اساسنامه سيندن تشكيلاتي محدوديت حذف اولوندو. بئله كي، آبتام دا اويه اولماق، توپلومدا اويه اولماق آنلاميندا دئييل. يعني اولا بيلر بير كيمسه آبتام ايله امكداشليق ائتسين، آبتام ا اويه اولسون، آنجاق توپومدا اويه اولماسين. هابئله آبتام دا چاپ اولونان و طرح اولونان مسائيل الزاملا توپومون دوشونجه سي و باخيشي ساييلمير. آنجاق طبيعي دير كي توپلومون آبتام دا گئدن آراشديرمالاردان و فيكيرلردن آرتيق يارارلانديغي ايچين، فيكير ياخينليغي داها گؤزه چارپسين.
آراز: آبتام ين تشكيلاتي چارتي حاقدا اوخوجولاريميزا بيلگي وئره سيز.
آبتام ين چارتي حاقدا دئمه لي يم كي آبتام باشچي سي توپلومون مركزي شوراسي طرفيندن سئچيلير و يالنيز او آبتام ين اساسنامه سي چرچيوه سي اساسدا شورانين قاباغيندا سوروملودور. آبتام ين اساسنامه سينده آذربايجان ميلي حركتينده اولان مسائيلي نظره آلاراق، آلتي آراشديرما كوميته سي يارانمالي دير. آلتي كوميته بوندان عيبارت ديلر: ديل و ادبيات فرهنگ و فولكولور توپلومسال و سياسي ايقتيصاد ايلاي (تاريخ) چئويرمه و كؤچورمه. آنجاق بير تبصيره ايله باشقا كوميته لرين يارانماسينادا ايذن وئريليب دير. تانري دييه ن اولسا، تخصوصو علمي كوميته لرين، اؤرنك ايچين عومران الكترونيك شيمي مكانيك و ... كوميته لرين يا آراشديرما گروهلارينين يارانماسينادا جان آتيلاجاقدير. آلتي كوميته نين باشچي سي ايله آبتام ين باشچي سينين حوضورو ايله بيرگه آبتام ين شوراسي يارانير و آبتام ين بوتون سياست لري بو شورا طرفيندن تعيين اولونور.
آبتام دا اوچ نوع اويه وار: عادي اويه چاليشقان اويه امكداش اويه. بو اوچ نوع اويه ليك بوتون گئرچك لري نظره آلماقلا قويولوبدور. اوستادلارين و هابئله بعضي فردلرين تشكيلاتي باغلانتيا اولان معذوريت لرين نظره آلاراق، «امكداش اويه» عونواندا ايش بيرليك ايمكاني وار. هر كيمسه يالنيز بير فورم دولدورماقلا «عادي اويه» اولا بيلر. آنجاق «چاليشقان اويه» اولماق ايچين، گرك آبتام ين بير كوميته سينده ان آزي بير ايل چاليشيق آپارسين. آبتام كوميته لرينين باشچي لاري يالنيز چاليشقان اويه لرين ايچيندن و آبتام باشچي سي طرفيندن سئچيلير.
آراز: آبتام يارانان گوندن بري نه ايشلر گؤروبدور؟
آبتام ين اساسنامه سي تصويب اولاندان سونرا، فورم لار حاضيرلانيب، حركتيميزده چاليشان لار آراسيندا ياييلدي. چوخلو شخصيت لر، يازيچي لار، فردلر و درگي لر بو فورم لاري دولدوردولار و اؤز حاضيرليقلاريني آبتام ايله امكداشليق ائتمه يه بيلديرديلر. هابئله بو فورم لاردا اؤنر وئريلن آراشديرما قونولاري توپلانيب، سيرالانديريلدي و گؤزل بير توپلو آراشديرما قونولاريندان، بوتون ساحه لرده، حاضيرلاندي. بو قونولار جوزوه فورماسيندا چاپ اولونوب، اينترنت دوشرگه ميزه ده قويولوبدور. منجه آذربايجان مسائيلينده آراشديرما آپارماق ايسته ينلر بو قونولاردان داها گؤزل فايدالانا بيلرلر. دئمك بو ايشلر آبتام ين قاباقكي باشچي سي اولان «خانيم مقدم» باشچيليغي دؤورونده گؤروندو و يئري بورادا اونلارداندا چكديكلري زحمت لره گؤره تشكور ائدم.
آنجاق كئچن ايلين اؤلچن (مهر) آييندان بري، يئني مركزي شورا طرفيندن آبتام ين باشچيليغي منه تاپيشيريلدي و منده بوتون يولداشلاريملا بيرگه يارانان فضادان يارارلانماقلا، آبتام ي توتدوغو آماج اوغروندا چاليشماغا و حركت ائتمه يه موديريت ائتديم. تئزليكه آلتي نفر آبتام كوميته لرينين سوروملولوغو ايچين سئچيلدي و آبتام شوراسي تشكيل اولوندو. هابئله ايشلرين ياخشي قاباغا گئتمه يي ايچين بير موديريت «ايجرائي و گئنل ايليشگي لر» (مديريت اجرائي و روابط عمومي) آددا آبتام ين چرچيوه سينده ياراندي و آبتام باشچي سينين بير ساي ايختياراتيندان بو مودورلوگه تاپشيريلدي. موشاريكتي موديريته و هابئله سوروملونون ايختياراتي اولماسينا ايناملي اولدوغوم ايچين، بوتون كوميته باشچي لارينا كوميته لرينين ايشلري چرچيوه ده يوكسك سويه ده ايختيار وئريلدي و اونلارين اللري ايش تعريف ائديب، ايشله مكده آچيق قويولدو. بو ايل ياريم بويوندا چوخلو ايشلر گؤروندو و يئري وار بورادا آبتام كوميته باشچي لاريندان، ايجرائي و گئنل ايليشگي لر مودوروندن و بوتون درگي لر، اوستادلار و شخص لردن بيزه ائتديكلري يارديملار ايچين تشكور ائدم. هابئله يئري وار اؤز سايغي و تشكورومو توپلومون مركزي شوراسيندان منه و يولداشلاريما آچيق كؤنول لوكله ايشلرده ياناشديقلاري ايچين بيلديرم.
آبتام دا چاپ اولونان و چاپ ايچين حاضيرلانان اؤزل ساييلاري كوميته لر اساسيندا بئله سيرالانديرماق اولار:
1-توپلومسال و سياسي كوميته:
حقوق اقوام و اقليتها در قوانين و كنوانسيونهاي بين المللي آذربايجان قادينلاري 1 (دونيا قادين گونو موناسيبتينه) بحران عراق و تأثير آن بر آذربايجان فدراليسم در ايران ائرمني لرين آذربايجاندا ائتديكلري سوي قيريم - آذربايجان قاديني 2 (دونيا قادين گونو موناسيبتينه)
2-فرهنگ و فولكولور:
صمد بهرنگي و اوشاق ادبياتي - قاري ننه (اردم تهران بيلي يوردو اؤيرنجي لری درگي سينين امكداشليغي ايله اوشاق لار اوچون اؤزل سايی) سئوينج گؤيرچين ( اردبيل ين «گؤيرچين» و اورمو نون «سئوينج» اوشاق گروپلاري نين امكداشليغي ايله) خالخال اؤزل سايي سي (بو اؤزل سايي «آذربايجان شهرلري ايله تانيشليق» سيراسيندان اولان اؤزل سايلارين بيرينجي سي دير و خالخال شهرينين يازارلاري و چاليشقانلاري نين امكداشليغي ايله حاضيرلانيب دير) آذربايجاندا يئر آدلاري نين ده ييشيمي- ائل ديلی و ادبياتی اوجاغی امکداش ليغی ايله فولکلور ساحه سينده چاليشمالار.
3- ايلاي (تاريخ):
تاريخ بيزي گؤزله مه يه جك آذربايجان تاريخي (توركجه و فارسجا بو توپلولار درسليك فورماسيندا حاضيرلانير)
4- ايقتيصاد:
فرش آذربايجان/ تاريخچه و اقتصاد - پتانسيلهاي اقتصادي آذربايجان
5-چئويرمه و كؤچورمه:
امير تيمور كيتابي (وامبئري نين اثري)
بونلارلا ياناشي آبتام دا ايشله نيلميش اونلارجا مقاله چئشيدلي درگي لره، اؤزل ليكله اؤيرنجي سل درگي لره وئريليب و اونلاردا چاپ اولونوبدور. نرم افزاري شكيلده كيتاب ائوي يارانيب دير و هله ليك 1600 جيلد كيتاب اورادا فايدالانماق ايچين نظره آلينيب دير. آبتام ايچين توپلومون سايتيندا اؤزل صحيفه حاضيرلانيب و اورادا چاپ اولونان اؤزل ساييلار، وئريلن بيلديريش لر، اؤيرنجي سل درگي لر، ايشله نيلن مقاله لر و آبتام آراشديرما باشليقلاري قويولوبدور. هابئله آبتام ايچين بير وبلاگ حاضيرلانماقدادير و بايراما كيمي توپلوم سايتينا لينك اولوناجاق. بو وبلاگ دا چوخلو آراشديرما مركزلري، بيلي يوردلار، درگي لر، علمي فرهنگي شخصيت لرين سايتي لينك اولوناجاق. تزه چيخان كيتاب و درگي لره تانيتيم ايمكاني اولاجاق. آذربايجان حاقدا سورغولارا چئشيدلي زمينه لرده طرح اولونما ايمكاني ياراناجاق و بو سورغولارا اوستادلار و يازيچي لارين امكداشليغي ايله جاواب وئريله جك.
نظره آلينان باشقا ايشلردن «تورك ديلي نين ايراندا اؤيرتيم چتين ليگي» عونواندا بير علمي و تخصوصو سمينار كئچيرمه يه ايشاره ائتمك اولار. ديل اوستادلاري و اوزمانلاري ايله دانيشيق آپاريريق و گلن اوچ آيدا بو سميناري كئچيرمه قرارينداييق.
هابئله چوخلو ايشلري گؤرمك ايچين برنامه لر حاضيرلانير و نؤبه ايله اونلاري يئرينه يئتيرمه يه چاليشاجاييق.
آراز: يقين بو حجم ده ايشلري يئرينه يئتيرمك ايچين چتين ليكلرله اوز به اوز سوز. بو چتين ليكلر حاقدا دانيشاسيز و اونلاري آرادان قالديرماق ايچين اولان برنامه لريزي آچيقلاياسيز.
آبتام سوروملولوغونو قبول ائتديگيم زاماندان ائله بير ايمكاناتين اولماديغيني بيليرديم. نييه كي توپلومون بير قوروجوسو و چاليشقان اويه سي اولدوغوم ايچين، داها آرتيق چتين ليك لري بيليرديم. آنجاق نئچه ايل ليك ايجرائي شكيلده حركتده ايشله ديگيم تجروبه لردن يارارلاناراق، كوميته سوروملولارينا تام ايختيار وئرمكله اونلارين ياراديجيليقلاريندان آرتيق فايدالانديق. ايشلري قاباغا آپارماق ايچين چاليشقان و ايش بيلن كادر ياراتماغا و اولان كادرلاردان فايدالانماغا جان آتديق. اؤزل سايلاريميزي چاپ ائتمك ايچين چئشيدلي يوللاري آراشديريب، عمل ائتديك.
منجه مودورون هونري يوخ اليله و آز ايمكانات ايله ايشله مكدير. يوخسا ايمكانات ايله هامي ايشليه بيلر. بيز ميلي بير حركت اوغروندا موباريزه ائديريك، موباريز چتين ليكلر قاباغيندا تسليم اولمامالي دير. نييه كي قوتسال بير يولا اينانجي واردير و بو اينانج اونون ايمكاناتي و سرمايه سي دير. البته بو سؤزلر ايمكاناتين ده يريني آزاتما آنلاميندا دئييل. ايمكاناتيميز نه قدر آرتيق اولسايدي، دوغال شكيلده داها آرتيق ايش گؤره بيله رديك. منجه يئر چتين ليگي داها چوخ آراشديرما ايشلرينه تأثير بوراخير. نييه كي بيز دانيشيق و بحث اوتوروملاريندان قوروب، اونلاردان فايدالانا بيلميريك. كيتاب ائوي و آرشيولريميزدن گئنل شكيلده يارارلانا بيلميريك.
آنجاق اساس چتين ليگيميز فيكري قولدا چاليشانلارين و موطاليعه نين آز اولدوغودور. بوگون آلتميشا ياخين موجويزي اولان اؤيرنجي سل درگي لرين اصلي چتين ليگي مطلب آزليغي دير. بيز بونو درگي لرله داها آرتيق ايلگي لنديگيميز ايچين بيليرك. بو يولدا جان آتمالي ييق و هر زاددان اؤنجه فرهنگيني ياراتمالي ييق.
چتين ليكلريميزي آرادان قالديرماق ايچين برنامه لريميز وار و حركتيميزده اولانلارين هامي سينين يارديمي ايله اونلاري ايجرا ائتمه يه جان آتاجاييق. اولورسا داها آرتيق بو قونودا بحثه داوام وئرمييه ك، نييه كي ايشلر گؤرونندن سونرا راحات دانيشماق اولار و اولا بيلر بئله شكيلده طرح اولونسا، شوعار آنلامي داشيسين.
آراز: بير يازيچي كيمي و هابئله بير آراشديرما مركزي نين سوروملوسو اولدوغوز ايچين، آراشديرمانين يئريني و تأثيريني حركتده نجور گؤروسونوز؟
اوچ ايل بوندان اؤنجه حركتميزده جنجانلي بير بحث آچيلدي، آنجاق بير ايل شانتاژ و جنجانلي فضادان سونرا بحث يئريني آلدي و اينديسه او زامان بحثه قارشي چيخانلارين اؤز يازيلاريندا، طرح اولونان دوشونجه دن ديفاع ائتمه يه و او آچيدان چيخيش ائتمه يه شاهيديك. او بحث بو ايدي: «آذربايجان ميلي حركتي نه ايسته يير؟» و «آذربايجان ميلي حركتي نين آماجي و هدفي نه دير؟». بير ساي يولداشلار بو بحث و سورغونو يوز ايلليك تاريخي كؤكه ماليك اولان بير حركته و اون ايل گئنيش سويه ده يارانان بير حركت ايچين طرح ائتمه يي اينحيراف و بؤلوجولوك ياراتما بيليب، جنجال قوپارديلار. هامي، آذربايجان ميلي حركتينده چاليشانلارين هاميسي بو سورغويا جاواب وئرمه لي ديرلر، اؤزوده آيدين جاسينا. گيزلين پالانج اويناميريق، بير ميلتين طالعي ايله اوز به اوزوك.
بو سورغويا چئشيدلي جاوابلار وئريليردي:
بيزيم هدفيميز باغيمسيزليق دير، بيزيم هدفيميز فئدراليسم دير، بيزيم هدفيميز 19 جو اصلين ايجراسي دير، بيزيم هدفيميز 15 جي اصلين ايجراسي دير، بيزيم هدفيميز اؤز ديليميزده يازيب اوخوماق دير و ... .
فرض ائدك آماجيميز باغيمسيزليق دير، بو سورغولار مطرح اولور:
هانسي قيمته؟ هانسي يول ايله؟ اؤلكه و منطقه نين ائتنيك دورومونو نظره آلديقدا نئچه يوز مين اينسانين جانينين قيمتي ايله؟ باغيمسيز اولدوغوموز اؤلكه ده نجور ياشاماق ايسته ييريك؟ بشر حاقلاريني نجور دوشونوروك؟ فردي آزادليقلارا نه قدر دير وئريريك؟ قهرمان دوشونورك يا قهرمانلار يا هئچ بيري؟ دئموكراسي يا باخيش نه دير؟ نجور ايقتيصادي ميلتيميز ايچين ياخشي گؤروروك؟ و ...
فرض ائدك آماجيميز فئدراليسم دير، بو سورغولار مطرح اولور؟
هانسي فئدراليسم؟ سياسي فئدراليسم، فرهنگي فئدراليسم، ايقتيصادي فئدراليسم و يا بونلارين قاتيشيغي؟ فدرال لارين سينيرلاري نجور بللي اولمالي دير؟ بو قومي داغينيق ليغين و كؤچمه لرين قاباغيني نجور آلمالي ييق و بو مسئله ني نجور چؤزدورمه لي ييك؟ اؤلكه نين بئله بير دوروموندا، دئموكراسي يئريني تاپمايان بو اؤلكه ده فئدراليسمي يئرينه قويماق اولارمي؟ و ...
فرض ائدك هدفيميز 15- جي اصل دير، بو سورغولار مطرح اولونور:
آيا آذربايجانين دردي يالنيز ديل دير و باشقا دردي او جومله دن ايقتيصادي، توپلومسال و سياسي دردي يوخدور؟ 15- جي اصلين 19 جو اصل ايله تضادي يوخدور؟ 15 جي اصل 35 ميليون لوق نفوسا ماليك اولان چوخلوغون حاقلاريني اؤده يه بيلر؟ و ...
گؤروروك كي بونلارين هانسي سيني نظره آلساق، چوخلو سورغولار طرح اولونا بيلر و بو سورغولارا جاواب وئرمك گركلي دير. بوگون بيزيم حركتيميز ميلي آدلانير، ميلي بير حركتده ميلتين بوتون قشرلري ايشتيراك ائتمه لي دير. هر قشرين اؤزونه گؤره اؤزل ايستكلري واردير و بونلارلا ياناشي ميلي بير ايستك لرده هاميميز اورتاغيق. آنجاق بو اؤزل ايستك لري نظره آلمادان، ميلي بير سطحده اوغور قازانا بيلمه ريك.
بو سورغولارا جاواب تاپماق ايچين، موطاليعه و آراشديرما گركلي دير. دويغوسال شكيلده بير ايده آلي و بير ايسته يي اؤزوموزه آماج توتوب، يولا دوشمكله و بوندان بتر بير ميلتي سونوجو ايچين فيكير ائتمه ديگيميز يولا آپارماق دوز دئييل و منجه ده بو حاققيميز يوخدور. باغيمسيزليق، فئدراليسم، 19 جو و 15 جي اصل هدف اولا بيلمز، نييه كي هدفه چاتماقلا برابر، حركتده چاليشانلارين ايشي قورتولار و دوروم آدي اولار. حالكي گؤروروك بونلارين هانسي سينا چاتساق، ايشيميز قورتولمور. منجه بونلار هدف دئييل، بلكه بونلار هاميسي آراج و وسيله دير. هدف ميلتيميزين «سعادت» له ياشاماغي دير. بو سعادته چاتماق ايچين «ميلي منافع» يميزي دوشونمك گركلي دير و يالنيز ميلي منافعيميزين چرچيوه سينده بو سعادته چاتماق اولار. سعادت و ميلي منافع اؤزو درين بحث لر آپارير و منجه بورا و موصاحيبه يئري دئييل و مقاله شكيلده طرح اولونمالي دير.
بيزيم حركتيميز ميلي و ناسيوناليستي اولدوغو حالدا اؤزونه گؤره اؤزل ليكلري واردير. بيلديگينيز كيمي ناسيوناليستي حركتلر 19 جو عصره و 20 جي عصرين اول لرينه قاييدير. آنجاق بيزيم اولوسوموزون دورومونا گؤره و كئچميش بين المللي دوروما گؤره بو حركت يوبانيليب دير. ميلي و ناسيوناليستي حركتلرين و موباريزه لرين اؤزونه گؤره يوللاري واريميش، آنجاق بوگون گليشميش دونيادا او يوللاردان فايدالانماق اوقدر يئرلي گؤرونمور. بيزيم ميلتيميز گليشميش بير ميلت دير، عشيره اي ياشامير، يئني و مدرن ياشاييش و دوشونجه لرله ياشايير و اونلاري دوشونور، اونا گؤره اسكي ناسيوناليستي يوللارلا عمل ائتمك اولماز. بوگون بيزيم اؤنوموزده گلوبالايزيشين (جهاني شدن)، قادين حاقلاري، دئموكراسي، بشر حاقلاري، چئشيدلي ايقتيصادي يوللار و ... واردير و بيز يالنيز دوشونمكله اوغور قازانا بيله ريك و ميلتيميزي اؤزوموزله يول بير ائديب، حركته گتيره بيله ريك. اويانيش لازيم دير و دوغال و دوزگون اويانيش ايچين فيكير و دوشونجه گركلي دير و بودا يالنيز اوخوماق، آراشديرماق و بيلگي ايله اولا بيلر.
آراز: فيكير ائديرسيز آبتام توتدوغو هدف اساسيندا نه قدر اوغور قازانا بيليب دير؟
آبتام و هئچ كيمسه يوزه يوز توتدوغو آماجلارا و تؤكدوگو برنامه لره چاتديغيني ايديعا ائده بيلمز و بيزده بو ايديعاني ائتميريك. آنجاق الده اولان ايمكانلار و ياشاديغيميز دورومو گؤز اؤنونه آلساق، منجه اوغورلو شكيلده چاليشميشيق. «ديل و ادبيات» ايله «چئويرمه و كؤچورمه» كوميته سينده گؤزه چارپان دوشگونلوك گؤرونور و تئزليكله كوميته لرين سوروملولارينين ده ييشيلمه سي ايله بو دوشگونلوگو آرادان آپارماق ايچين جان آتاجاييق. باشقا كوميته لريميز گؤزل ايشله ييب لر و يئري وار بورا دوكتور محمد بدلي (توپلومسال و سياسي كوميته نين سوروملوسو)، موهنديس تايماز نظمي (فرهنگ و فولكولور كوميته سينين سوروملوسو)، موهنديس احمد والايي (تاريخ كوميته سينين سوروملوسو)، حميد والايي (ايجرائي و گئنل ايليشگي لر مودورو) و دوكتور حسين سلطاني (اؤيرنجي باخيشي درگي سينين سوروملو مودورو) جنابلارينين آدلاريني چكم و اونلاردان اؤز مينت دارليغيمي بيلديرم. هابئله توپلومون مركزي شوراسيندان، درگي لردن، اوستادلاردان و يازارلاردان و فني كادريميزدان (طراح لاردان، تايپ ائدن لردن، اينترنت دوشرگه سينده چاليشانلاردان) بيزه ائتديكلري يارديملار ايچين تشكور ائدم.
آراز: سونوج ايچين سؤزوز و ساويز اولسا بويورون.
- يئري وار سيزه مني دينله ديگينيز ايچين يورولموياسيز دييه م و ميلتيميز اوغروندا چكديگينيز زحمتلردن تشكور ائدم. شهيد رجائي بيلي يوردوندا كئچميشدن گؤزل چاليشمالار اولوب و ايندي ده داوامي واردير. هامي يولداشلارا اللرينيز آغريماسين دئييرم و هامينيزا ياشاييشينيزدا و حركتيميزده اوغورلار آرزي ائديرم.
آرازدرگيسی
