Bu kitabda ölkənin 500 tanınmış qadını haqqında məlumat verilir
AİDA / AYNA
"Azərbaycan qadınları" ensiklopedik toplusunun ikinci kitabı işıq üzü gördü. Bu
münasibətlə "Azərbaycan" mehmanxanasının "Taverna" restoranında "Mir jenşinı" -
"Qadın dünyası" qəzeti redaksiyası tərəfindən hazırlanmış bu ensiklopedik
toplunun və onun baş redaktoru Lalə Nikbinin bəstələdiyi mahnıların və bu
günlərdə işıq üzü görmüş rusca ilk şerlər və hekayələr toplusunun ("Duymaq
istəyirəm") təqdimatı keçirildi.
Gecənin açılışı Azərbaycanın himninin oxunuşu ilə başlandı. Aparıcılar Firuzə
Nadir və Vüqar İmanov "Azərbaycan qadınları" kitabı haqqında məlumat verdikdən
sonra bədii hissə başlandı. Sənət ustaları: Niyaməddin Musayev, Fidan Hacıyeva,
Elmira Ələkbərzadə, Almaz Ələsgərzadə iştirak etdilər. Milli Məclisin üzvü Asya
Manafova, şairə Xuraman Vəfa, filoloq-alim Leyla Gərayzadə və başqaları
L.Abbasovanın bu ensiklopedik topluları işıq üzünə çıxarmaqla mədəniyyətimiz
qarşısında nə qədər mühüm bir xidmət göstərdiyini söylədilər. Mərasimin müxtəlif
telekanallar tərəfindən çəkilişlərinin aparılması da bu faktın diqqəti cəlb
etdiyini göstərirdi.
Xatırladaq ki, keçən il bu ensiklopedik toplunun I kitabı çapdan çıxmışdı.
Türkiyədə çap olunmuş bu toplunun poliqrafik səviyyəsi çox yüksəkdir, ilk
səhifələrində Azərbaycan tarixində rol oynamış qadınlarımız haqqında məlumat
verilir, sonra isə Azərbaycanda yaşayan və elmin, incəsənətin, ictimai həyatın
müxtəlif sahələrində yüksəlmiş və fərqlənmiş qadınlar barəsində Azərbaycan, rus
və ingilis dilində məlumat verilir. Lalə Abbasova dedi: "Məqsədim Azərbaycan
qadınlarını bütün dünyaya tanıtmaqdır. Axı bizim çox qeyri-adi qadınlarımız var,
onların bir çox müsbət cəhətləri var".
I kitab baş redaktorun təşəbbüsü ilə dünyanın bir çox ölkələrinə göndərilib. Bu
kitablar Azərbaycan haqqında təsəvvürü olmayanlar və ya yanlış təsəvvürü olanlar
üçün xalqımız və ölkəmiz barədə yaxşı tanışlıqdır. Kitabların bir hissəsi Bakıda
yerləşən səfirliklər vasitəsilə, bir hissəsi də Xarici İşlər Nazirliyinin köməyi
ilə bir çox ölkələrin birinci xanımlarına hədiyyə olaraq göndərilib.
Bu vacib işə cavab olaraq bir neçə ölkədən - Polşa prezidentinin xanımı İolanta
Kvasnevska, İspaniya kraliçasından, Quzey Kıbrısdan, Avstriyadan və başqa
ölkələrdən minnətdarlıq məktubları gəlmişdir.
II kitabın məzmun tərtibində bir az dəyişikliklər var. Bu kitabda elmlər
namizədləri, doktorları, əməkdar pedaqoqlar, həkimlər, qadınlarla birlikdə
həyatda böyük nailiyyətlər əldə etmiş övladlar böyütmüş çoxuşaqlı analar da var.
Kitablar Azərbaycanın bayrağı rəngində - I kitab - qırmızı, II kitab - göy, III
kitab - yaşıl rəngdə olacaq.
İxtisasca jurnalist olan L.Abbasovanın musiqi istedadı isə, əlbəttə, ayrıca
söhbət mövzusudur. Hər halda, onun musiqi təhsili mahnı yaradıcılığı ilə məşğul
olmağa imkan verir və bu gün Lalə Abbasovanın bəstələdiyi mahnılar E.Ələkbərzadə,
N.Qasımova, A.Ələsgərzadə, F.Kərimova tərəfindən ifa olunur və yaxşı qarşılanır.
Gecədə həmin mahnıların bir neçəsi səsləndi. "Duymaq istəyirəm" adını verdiyi
şerlər və hekayələr toplusu da yaxşı qarşılandı.