منده شهادت وئریرم

 
سید حیدر بیات

بیر دؤنه همشهری وئبلاگچی لارین بیریسی گلیب وئبلاگیما کامینت قویموشدو: «آقا ما شنیدیم شما زنجانی هستید واقعیت دارد؟ اگر زنجانی هستید به این آدرس سربزنید و بنویسید» بو وئبلاگچی همشهری دئمه لی بوتون زنگانلیلاری مجازی دونیادا بیر یئره توپلاماق ایسته ییردی. من ایسه جاوابیندا یازدیم: «بلی درست است زنجانی هستم اما قبل از زنجانی بودن یک تورک هستم امیدوارم شما به این موضوع عنایت داشته باشید.» بو جاوابی یازماقدا زنگانلی اولدوغوم تورک اولدوغومجا اؤنملی دئییل دئمک ایسته میشدیم.

والی گؤزتن دن بیر کیتاب کؤچورموشدوم، اوردا دا اؤن سؤز یئرینه یازدیم: «اوغوزلار اسکی زامانلار هر یئره گئتدیکده یاشادیقلاری اؤلکه دن یئنی اؤلکه یه  تورپاق آپاریردیلار، ایندی ایسه داها تورپاق یوخ سؤزجوک آپارمالی ییق، والی گؤزتن ده غوربت ائلده یاشایارکن اؤزو ایله سؤزجوک، تورکجه سؤزجوک آپاریب دیر»(مضمونونو نقل ائدیرم)

آنجاق بئله بیر باخیشلا باخاندا زنگان منیم خاطیریمده آرتیق یئر آلمامالی دیر. آمما نئچه یولداشین اورادا یاشاماسی زنگانی هر گون منه خاطیرلادیر و اونودا بیلمه ییرم کی او شهرده بیر شئی لریم،  هله قالیب دیر.

زنگانا فیکرلشنده همیشه اولدوزلو سرین گئجه لرینه و داراشلیق گوندوزلرینه، اؤزلجه سایخاش قدیمی کوچه لرینه فیکیرلشردیم. آمما ایندی نئچه گوندور تانیمادیغیم قارانلیق، داراشلیق و داریخدیرجی بیر یئره فیکیرلشیرم.

همیشه بئله سانیرام کی بیر اؤزگور روحو بئله بیر قفسه سالیبدیرلار.

اوره ییم دوتولاندا اونا زنگ آچاردیم، داها دقیق دئسم ذهنی مین قارانلیغیندان ایشیقلیغا دوغرو آخان بیر شئی لری سئزه نده اونا زنگ آچاردیم، آخی زنگان سعید موغانلی دئمیشکن: «پیچاق و فلسفه شهری دیر،» و شیخ اشراق و حکیم هیدجی کیمی فیلسوفلار اورادان قالخیبلار. سعید ده فلسفه اوخویوبدور، سعید مینم ذهنیمه بیر فلسفی کود ایله تاپشریلیبدیر،

نه ایسه سعیدی من فلسفه و دویغو ایله تانیمیشام،* سؤزلری حیساب کیتاب اوزره، پلورالیسمه اینانان، دموکراسی نی اؤیه ن و هامیدان آرتیق اینسانا اینسانلیغا اینانان.

او دؤنه لرله اینسانلیغدان یازدی، دؤنه لرله یازدی: کاش بیزه قارشی دورانلار اینسانی دوشونه ایدیلر.

سعید آرتیق غریب دیر. اونو تانییان اینسانلار اولدوقجا آزدیلار. بلکه ده دوشمن اونو هامیمیزدان یاخشی تانیییر. ایشینی الدن وئرمیش سعید، بو ایل لرده ایکی یؤندن عذاب چکیردی، بیریسی حاق تاپدایانلارین الیندن بیریسی ایسه حاق ایسته ینلرین. شوبهه سیز حرکتچی لریمیزین اجتماعی داورانیشلاریندا و ها بئله یازیلاریندا هر نده ن آز عقلانیته یئر وئریلیر، آمما یازیق سعید تام عقلانی فیکیرلشن بیر اینساندیر. منجه اونون آز سایلی یازیلاری بیزیم یازیلارین ان اؤنملی و دیرلی اؤرنکلریندن دیر. او دونیادا گئدن سیاست و دوشونجه آخینلارینی چوخ یاخشی تانیییر و هئچ گئجه ایراندا یاییملانان درگی لرین اؤنملی لریندن بیریسینی اوخومامیش باش یاستیغا قویمازایدی، شرق قاپاناندا سعید نعیمی یازدی: «بیزده شرقین باغلانماسیندان اوزگونوک» امینم کی سعید متین پور دا اوزگون ایدی. نییه کی او شرقی آرتیق بیر شوونیست تریبونو یوخ بلکه بیر دوشونجه تریبونو بیلیردی.

سعید اؤزو دوستاق دا اولسادا یازیلاری ائشیکده الده دیرلر، اونو آرتیق تانیماغا چالیشاق و بیر دؤنه داها اونون یازیلارینی گؤز اؤنوندن کئچیریب و باشقا یازارلارین یازی لاری ایله توتوشدوراق، و حاق ایسته یه ن نئجه یازمالی دیر سورغوسونا، اساسن بئله سورغو ذهنیمیزده وارسا، جاواب آختاراق. سعید حاقدا ان اؤنملی گؤردویوموز ایش اونو تانیماق دیر.**

و سون سؤز: ایلقار مرندلی نین یازیسینا منده قول چکیب و شهادت وئریرم.***

--------

*آمما او منی شعر ایله آرتیق تانییا سانیرام. نییه کی بیر یول بلکه بئش ایل بوندان اؤنجه دئدی: شعرلرینین بعضی سینی زنگان  درگی لرینده اوخویورام، اونلاری بیر کیتاب کیمی چاپ ائله، سونرا دا بیر یول زنگ آچدیقدا دئدی: دونن براهنی نین تورکجه شعرینه قولاق آساندا سنین یادینا دوشدوم.

** سعیدن یازیلارینی بو ایزلمدن الده ائده بیلرسینیز: www.zenganli.blogfa.com

*** http://www.millishura.com/Farsi/yeniler/sehadet.htm