داداش قاراقويونلو قيزيلباش
شاه ختايى:
آتا، آنا، قوهوم، قارداش،
اولدوق حاق اهلى́ نه يولداش
خبرلرده بوگون شعبانين ١٥ى اولدوغونو اؤيره نديم· بو موناسيبت ايله علوى و شيعه وطنداشلاريميزين ١٥-شعبان بايرامينى تبريك دئيير و بو باره ده نئچه سؤز سؤيله مك ايسته ييره م:
بيليندييى كيمى "١٥ شعبان"، اينانان وطنداشلاريميزدان هم علوىلرين (بيزده گوران يا دا اهل-ى حق́ لر، علىآللاهى́ لر) و هم شيعه لرين موبارك سايديقلارى دينى بايراملارداندير· بو ايكى مذهبين موشترك ديگر اهممييتلى دينى گونلرى، "نووروز بايرامى"، "عاشورا گونو"، "غدير-ى خوم" و "قوربان بايرامى"دير· شيعه لر "رمضان بايرامي"نى توتدوقلارى حالدا، علوىلر اوروج توتماديقلارى اوچون بو بايرامى بيلمزلر· علوىلرين "خيدير بايرامى"نى ايسه شيعه لر توتماز·
بوگون بوتون علوىلر آلبانييادان افغانيستانا دك – ان چوخ ٢٠ ميليونلا توركييه ده- "جمع آيينى" مراسيمينى ايجرا ائله رلر· علوىلرده ناماز يوخدور، دينى عيبادتلرى جمع ائولرينده كى "جمع آيينى" و "سماه"دان تشكيل تاپير، علوىلرده مسجيد ده يوخدور، يئرينه "جمع ائوى" (جمعخانا) واردير·
مجليس يئددى بؤيوك پيرلرىنين- ولىلرينين باشى ساييلان شاه ايسماعيل́ ين شئعرلرى ايله باشلار· ديگر پير-ولىلرى آراسيندا نسيمى، فوضولى، حاجى بكتاش و پير سولطان آبدال واردير· علوىلييين دينى كيتابلارينين موقددس ديلى توركجه دير· ختايى، نسيمى، فوضولى و پير سولطان́ ين ديوانلارى، دينى كيتابلارى آراسيندادير·
تورك-ايسلامچىلارين اينفتيخار ائتديكلرى، فارسجا شئعر ديوانى يازان ياووز سولطان سليم، قيزيلباشلارين ميللى ديليميزه باغلىليغيندان عصبله نه رك، شاه ايسماعيل́ ه بئله يازيبدير: "····· من سولطان بايزيد اوغلو سولطان سليم، سن كى ائى ائشك تورك·····" (پروفئسور شهاب الددين تكين داغ́ ين سندلرى)· (ميللتيميزين ياراديجىسى شاه ايسماعيل́ دن فارس شووئنيستلرى و تورك-ايسلام سنتئزچىلرى عئينى درجه ده نئفرتلرى واردير· بيرينجىلر توركى ديلينى رسمى ائتدييى اوچون، ايكينجىلر ايسه عوثمانلىلارا بويون ايمه دييى اوچون، ايكىسى ده نه شيعه و نه سوننى اولماديغى، بلكه علوى اولدوغو اوچون)·
علوىليكده شراب موقددسدير، آيين-ى جمع́ ده هر ايمام اوچون بير "دولو" ايچيلر (اون ايكى دم)· علوىليكده كى دينى قايدالارين چوخو (شراب، سماه، ساز، ايقرار وئرمه، قيرخلار مئيدانى، دؤرد قاپى، سوفرا، پير، جمع، شاه-ى مردان و·س· نين هامىسى) شاه ايسماعيل طرفيندن بير بير سيستئمله لشديريلميش و سون حالينى آلميشدير·
آشاغىدا بو دينى مراسيمده اوخونان شئعرلردن ، ١٦-١٣ يوز ايللرى تورك قيزيلباشلارين دورو اينانج و جوشغون دويغولارينى عكس ائتديره ن بير ايكى شئعرى وئريره م:
١- شئعرلرده كى ايشله ديلن كلمه لرين هامىسى سمبوليك ميستيك-دينى معنالارى واردير يا دا حقيقى معنادا "اركان-يول"لا علاقه لىدير· ميثال اوچون "آسلان" على́ دير٫ "آسلان قانى" و "دولو" شراب́ دير· شراب سمبوليك معنا خاريجينده (آللاه́ ى تانيما ايسته يى، اونو تانيمانين وئردييى ذؤوق) حقيقى معنادا دا علوىليكده موقددسدير و هر جمع آييني ́ نده هر ايمام اوچون بير "دم –دولو" (هم آروادلار، هم كيشيلر) ايچيلير· جمع آيينى́ نه آروادلار دا قاتيلير، "سماه" آرواد-كيشى بيرليكده ايجرا اولونور· علوى آروادلاردا حيجاب-توربان-چاديرا-اؤرتونمه يوخدور·
٢-علوىليكده "على" بير كولتدور، تاريخده كى حض· على ايله علاقه لى دئييلدير· "على" آللاه́ ين تجللىسىدير، "شاه" على́ دير، "ختايى" شاه́ دير·
٣- عوثمانلىلار و گونوموزده كى داوامچىلارى، علوىلرى معنوى اولاراق ازمك اوچون، قيزيلباشليغى انسئست معناسيندا ايشله ديبلر·
٤- عومومى بيلگى اوچون ماراقلىلارا علوى آراشديرمالارى (توركجه-اينگيليزجه) آدرئسينه باخمالارينى تاكيدله تؤوصييه ائله ييره م: http://www.alevibektasi.com/
داداش قاراقويونلو قيزيلباش
شاه ختايى́ دن: اولدوق حاق اهلى́ نه يولداش
حقيقت گيزلى بير سيردير،
آچابيلرسن، گل برى!
كوفر ايچينده ايمان واردير،
سئچه بيلرسن، گل برى!
جانيميز ملك جانىدير،
تنيميز سلمان تنىدير،
ايچديييم آسلان قانىدير،
ايچه بيلرسن، گل برى!
من باخچالارين گولويم،
آيين-ى جمع بولبولويم،
قيرخ قاپىنين كيليدىيم،
آچابيلرسن گل برى!
شوبهه گتيرمه كؤنلونه!
حاق پرده چكر اؤنونه،
اوددان بير كؤينه ك اينينه،
بيچه بيلرسن٫ گل برى!
آتا، آنا قوهوم، قارداش،
اولدوق حاق اهلي́ نه يولداش
جان ايله باشدان ائى نورداش،
گئچه بيلرسن، گل برى!
شاه ختايى́ م، آييدير همان،
داغلارى بورودو دومان،
ايشته اينجيل، ايشته قورآن
سئچه بيلرسن، گل برى!
من داها نسنه بيلمزم،
آللاه بير محممد على́ دير·
اؤزوم غوربتده سالمازام،
آللاه بير محممد على́ دير·
اونلار بيردير، بير اولوبدور
يئردن گؤيه نور اولوبدور،
دؤرد گوشه ده سيرر اولوبدور،
آللاه بير محممد على́ دير·
ختايى بو يولدا سردير،
سرين وئره نلر ده اردير،
آيدا سيريدر، گونده نوردور،
آللاه بير محممد على́ دير·
(تورك خالق قهرمانى، اصلى خوى شهريندندير)
گده يئزيد، بيزه قيزيلباش دئميش
مگر شاه́ ى سئوميش دئسه، يئرىدير·
يئتميش ايكى ميللت سئومزلر شاه́ ى
بيز سئوه ريك، شاه-ى مردان على́ دير·
قيرخيميز دا بير قاتارا دوزولدوك
حاق محممد اوممتينه يازيلديق،
حقيقت شربتى اولدوق، ازيلديك
بيز ايچه ريك، پئيمان سونان على́ دير·
گده يئزيد! بيزلر حرام يئمه ديك،
باطينداكى گؤردويوموز دئمه ديك،
ايقرار بيردير دئديك، گئرى دؤنمه ديك،
يئددىلريك، بيرينجىميز على́ دير·
پيرسولطان́ ام، نسيمى́ دير پيريميز،
اوول قوربان ائتديك شاه́ ها سريميز،
اونكى ايمام مئيدانيندا داريميز،
بيز شهيديك، سرداريميز على́ دير·
بيزيم ايچديييميز دولو
دولولارين دولوسودور،
عوممانلارا داليب چيخان
اره نلرين گمىسىدير·
هئچ عوممانا دالمادين مى؟
داليب گؤوهر بولمادين مى؟
طاليب يولا گلمه دين مى؟
يئنه كؤنول دولوسودور·
كيمدير بونو بئله دييه ن؟
اره نلردن اؤيود آلان؟
ياشيل علم چكيب گلن؟
پيريم على كندىسىدير·
پير سولطان́ ام، ديدارا باخ!
منصور ايپين بوينونا تاخ!
نسيمى اولدو حاق́ لا حاق٫
اول اوزولن٫ درىسىدير·