|
آذري ميللي دئموکراتيک حرکتي
قايناق: اينترنت – داداش.ق.ق
کؤچوره ن : فراهم کاظمي
تبريز بيلي يوردو اؤيرنجي سي
ايصفاهان- دان اولدوزو- سايى ٨
ايرانداکي ائتنيک مساله نين جؤوهري ايران دؤولتينين بو اؤلکه نين چوخ ميللتلي، چوخ
ائتنيلي بير اؤلکه اولدوغونو اؤز قانون و حوقوق سيستئمينده قبول و تثبيت ائتمه
سيدير. بو قانوني و حوقوقي تثبيتين طبيعي نتيجه سي ايکي شکيلده تجللي ائده جکدير:
1- ميللي ديللر مساله سي و
2- سووئره ن((suveren
حاکيمييت لر مساله سي.
"ميللي ديللر مساله سي" ندن قصد، عومومي اولاراق بو اؤلکه ده کي ميللي ديللرين
هاميسينين و ايستيثناسيز٫ "رسمي ديل" ايستاتوسو قازانمالاري (مئدىيا، تحصيل و
ايداري سيستئملرده) و خوصوصي اولاراق آذري (تورك) ديلينين ايرانين ايکينجي "دؤولت
ديلي" اولونماسيدير. بو دئموکراتيک ايستکلر بوتون پلاتفورملاردا، ايرانين ايچينده
ده، آچيقجا و ايصرارلي شکيلده ديله گتيريلمه لي و ياييلماليدير.
"سووئره ن حاکيمييت لر مساله سي" ندن قصد، عومومي معنادا بو اؤلکه ده کومپاکت حالدا
ياشايان بوتون ميللت- خالق – ائتنيک قوروبلارين٫ خوصوصي معنادا دا آذري لرين
کومپاکت شکيلده ياشاديقلاري بؤلگه لرده -شراييطه گؤره- اوتونوم، فئدئرال،
کونفئدئرال فورملارين بيرينده اؤز سووئره ن حاکيمييت لريني قورمالاريدير.
ايراندا آذري (تورك) لر اؤلکه نين هر طرفينه داغيلسالار دا، بونلار اساس اولاراق
اوچ کومپاکت بؤلگه ده ياشاييرلار: جنوبي (ائتنيك) آذربايجان، ايرانين گونئيينده
قاشقاييستان (قاشقاى ائلى) و خوراسانين شيماليندا افشار ائكسكيلاوي (افشار ائلى)
ندا. دئمک آذري مساله سي دييه نده (سووئره ن دؤولتله علاقه لي) بو اوچ آلت مساله ده
ن يعنى ائتنيك (جنوبى) آذربايجان٫ قاشقاييستان (قاشقاى ائلى) و خوراسانين
شيمالينداكى افشار ائكسكيلاويندان (افشار ائلى) سؤز گئدير.
ائتنيک (جنوبي) آذربايجان و قاشقاييستاندا (قاشقاى ائلى) ياشايان آذري (تورك)
قوروبلار عئيني ديل يعني آذريجه نين (توركجه نين)عئيني لهجه سينده يعني
آذربايجانجادا (فرقلي آغيز، شيوه لرينده) دانيشديقلاري حالدا خوراساندا افشار
ائکسکيلاويندا (افشار ائلى) ياشايان آذريلر (توركلر) عئيني ديلين يعني آذريجه نين
(توركجه نين) بير آز فرقلي اولان آيري بير لهجه سينده يعني خوراسانجادا دانيشيرلار.
بو اوچ آذري (تورك) بؤلگه سينده کي اينانان آذري لرين هاميسي اساسن شيعه و علوي
مذهبلرينه اينانيرلار.
آذري ميللت لشمه حرکتي "ديل بيرلييي" اساسيندا اولماليدير. آمما بورادا تاکيد
ائديلمه ليدير کي بو ديل بيرليييندن قصد، "ايندي وار اولان ديل بيرلييي" يعني جنوبي
آذربايجان، گونئي ايراندا قاشقاييستاندا و خوراسانداکي افشار ائکسکيلاويندا ياشايان
آذري (تورك)لرين ديلي کيمي و نه گله جکده ياراديلاجاق اولان ديل بيرلييي دير.
معلومدور کي ايراندا آذري لردن باشقا اوچ تورکي ميللت – خالق – قوروپ داها ياشايير:
تورکمن لر، خلج لر، قازاقلار (و بير سيرا قايناقلارا گؤره آز سايىدا اويغورلار).
بونلاردان ايرانين شيمال شرقينده ائتنيک تورکمنيستاندا ياشايان تورکمن لرين و جنوبي
آذربايجانين جنوبي منطقه سينده يئرلشميش خلجيستاندا ياشايان خلج لرين اؤز کومپاکت
بؤلگه لري واردير. قازاق لار ايسه ائتنيک تورکمنيستاندا ياشايير و کومپاکت بؤلگه يه
صاحيب دئييلديرلر. تورکمن ديلي آذريجه کيمي، تورکي ديللرينين اوغوز قوروبونا داخيل
اولسا دا بيزيم ديلين بير لهجه سي، شيوه سي و يا آغيزي ساييلماز. خلج ديلي ايسه تک
باشينا تورکي ديللرينين موستقيل بير شاخه سيني تشکيل وئرير. بو ايکي قوروبلا بيزيم
ديل بيرليييميز يوخدور. اساسن بو ايکي خالق بيرر آيري خالق اولدوقلاري اوچون بيزيم
اونلارلا بيرلشمه ميز (ديل بيرلييي) ياراتماغيميز مومکون دئييلدير.
بيزيم تورکمن و خلج لرله اولان موناسيبتيميز، اونلارين دا٫ ايرانداکي ديگر بوتون
خالقلار کيمي٫ ديللرينين رسمي لشمه سينى و کومپاکت اولاراق ياشاديقلاري بؤلگه لرده
اؤز ميللي حاکيمييت لريني قورما ايستک لريني مودافيعه ائتمکده ن عيبارتدير. دوروم
ييغجام شكيلده خولاصه لنيرسه٫ بئله ليکله:
- آذري (تورك) ميللي دئموکراتيک حرکتي، آذريجه (توركجه) نين ايرانين ايکينجي "دؤولت
ديلي" اولماسيني طلب ائدير. ايراندا دانيشيلان بوتون ديللرين (و بو آرادا تورکمنجه
و خلج جه نين ده) ايستيثناسيز رسمي ديل ايستاتوسو الده ائتمه لريني (مئدىيا، تحصيل،
ايداري سيستئم لرده) دستکله يير.
- آذري (تورك) ميللي دئموکراتيک حرکتي، آذريلرين (توركلرين) کومپاکت اولاراق
ياشـاديقـلـاري بؤلـگـه لـرده، يعنىائتنيك (جنوبى) آذربايجان٫ قاشقاى ائكسكيلاوى
(قاشقاييستان=قاشقاى ائلى) و خوراساندا افشار ائكسكيلاوى (افشار ائلى) اوچون٫ اؤز
ميللي حاکيمييت لريني قورما حاققيني (شراييطه گؤره اوتونوم، فئدئره، کونفئدئره) طلب
ائدير. ايراندا ياشايان و کومپاکت بؤلگه يه صاحيب اولان ديگر ميللت – خالقلارين دا
(بو آرادا خلج و تورکمن لرين) هاميسينين ايستـيثناسيز بو حاقدان فايدالانمالاريني
دستکله يير. و خلجيستانين گله جک فئدئرال آذربايجان ترکيبينده قالماسيني اويغون
گؤرور (اصيل قرار صاحيبى خلج خالقىدير).
|
|