انقلاب شعري
دكتر رضا براهني
اللي ايلدن بري سن يومماميسان گؤزلريني
دئميسن يئر-گؤيه آغلار گؤزونون سؤزلريني
دئرماشيب اوز يوخاريِ, يئر گونشين قارشئسئنا
كولون آلتيندا نيه ساخلاميسان كؤزلريني
چاتيب آفاق طبيعت اؤزونون مقصدينه
چاتمايب ليك بو زائر اؤزونون معبدينه
شفقين رنگ لري تيره له نيب پوزغون اولوب
قوش تاپيبدير يوواسين, تام يووالار قوشلا دولوب
گونشين قانلا دولو شيپوري صبحي اوياديب
اي سحردن ده گؤزه ل! گول دوداغين نيه سولوب
چاتيب آفاق طبيعت اؤزونون مقصدينه
چاتمايب ليك بو زائر اؤزونون معبدينه
داشدا يئرتيب ياخاسين سينه سينه گوللر آچيب
ائلدئريم تك سو كسيب تپه له ري, سئلله ر آچيب
دئقت ايله گؤزه ليم, گؤر! نئجه تاريخ بويي
ظلمتين قاپلارين آيدينليغا, ائلله ر آچيب
چاتيب آفاق طبيعت اؤزونون مقصدينه
چاتمايب ليك بو زائر اؤزونون معبدينه
قارتاليم قالخ قانادين وور ساوالان كله سينه
كؤلگه ني سال او بياز باشلي داغين قلله سينه
سير آفاق ائله بو تپه ده ن او تپه يه سن
يان قاتيش آذريمين ميللي يانان شعله سينه
چاتيب آفاق طبيعت اؤزونون مقصدينه
چاتمايب ليك بو زائر اؤزونون معبدينه
خالقيمين بايراغيني قويما دوشه الده ن -اله
گئت دوشوندور بو ائلين سؤزله ريني ائلده ن-ائله
بو ائلين گل هله تاپشيرديقلاريني دينله هله
چؤكمه سين يوردوما ظلمت, اوبامي آيدين ائله
چاتيب آفاق طبيعت اؤزونون مقصدينه
چاتاجاق زائريميزده اؤزونون معبدينه