گونئی آذربايجان مساله سين
آکادئميک لشديرمک
بوگون دونيادا اومساله کی آکادئميک سويه ده اونون باره سينده ايش گورونمسه سياستچيلر و دولتللر تشکيلاتی طرفيندن ياخشی قارشيلانمير و بير مساله کی آکادئميک سويه ده اونا قيمت وئره لر او مساله دولتللر طرفيندن اوزونه ياخشی و اوزه ل باخيش قازاناجاقدير.
گونئی آذربايجان مساله سی اوچون ايللر بويودور کی آذربايجان ميللتی مبارزه ائدير و چوخلاری 80 ايلين عرضينده جانلارين و ماللارين بو يولدا فدا ائديبلر ولی هله آذربايجان مساله سی دوزگون و کسرلی شکيلده دونيا اجتماعيتی طرفيندن تانينماييب نييه؟
گونئی مساله سی باره سينده اينديه جک آکادئميک ايشلر و تحقيقاتلار چوخ آز گورونوب و بو مساله بيزيم اوزوموزه قايدير کی بيز غربی آکادئميک مرکزلرينه نفوذ ائتمه ميشيک و ميدانی پان آريانيستلره بوراخميشيق و اونلاردا اروپا و غربی شرق شناسی مرکزلرده نفوذ ائديب و هر نجور ايستيبلر کسيب و بيچيبلر.
گونئی مساله سی باره سينده فقط بو نئچه ايلده بير آز بير نئچه کيتاب و مقاله "براندا شافر" طرفيندن چاپ اولوب و دونيا علمی مرکزلرينده اوزونه يئر تاپيب و تزه ليکده ده آمريکا دا بير سئمينار گونئی مساله سی باره سينده گئچيريلدی کی اوزونه گوره چوخ گوجلی و تاثير بوراخان بير سئميناريدی.
ولی ترکيه کوردلری سيلاحلی مبارزه کنارينده اروپانين علمی و ائستراتئژيک مرکزلرينه نفوذ ائديب و اونلارين تدقيقاتچلارينان ايلگی قوروبلار و ترکيه کوردلری باره سينده نئچه کيتاب ياييبلار و نئچه سی ده گله چکده حاضيرلاناجاق بودور کی اونلارين مساله سی اروپا آکادئميلرينه گيريب و اونلارين سوزلرين ايندی تئز قبول ائديرلر تا بيزيم سوزوموزو. نييه کی اينديه جان بير ژورناليست و يا بير علمی مرکز، گونئی مساله سی باره سينده بير کيتاب يا مقاله ياييماييب. و اونون باره سينده دوزگون تدقيق اولونماييب و اونون حللينه يول گوسترمه لييب ولی آلماندا نئچه هقته بوندان قاباق بير تحقيقی مرکز ترکيه کوردلرينين مساله سينين حللينين باره سينده بير کيتاب بوراخيلدی و سياستچيلرده بو مرکزلرده ن فيکری تغذيه اولونورلار و بو مرکزلر دولت آداملارينا يول گوستريلر.
بيز اگر ايسته سک قالارقی ايشلر گوره ک و آذربايجان مساله سی دوزگون دولتچيلر فيکيرينه گيرسين و اونلارين مساله سی اولسون لازيمدير کی سياسی ايشلر کناريندا اروپانين تحقيقی مرکزلرينده نفوذ ائديب و اوز پولوموزوناندا اولمالي اولسادا اونلارين آديينان کيتاب و مقاله چاپ ائده ک. او زامان گونئی مساله سی آکادئميک سويه ده اروپادا اوزونه يئر توتاجاق.
سوئده اولان آذربايجانليلارين ايشلری آذربايجانا چوخ اوغور قازانيب و گئدير کی آذربايجانا اروپادا بيوک بير داياخ قازانا و بونلارين ايشلری آيری اولکه ده ياشايان آذربايجانليلارين طرفيندن لازيمدير کی داليسی توتولسون. بونلار سوئدين علمی و رسانه ای مرکزلرينه نفوذ ائديبلر و گونئی آذربايجان مساله سين آکادئميک شکلينده قاباغا آپاريبلار و اوندان علاوه سياست عرصه سينده بوشلامييبلار بودور کی اونلار آيری اولکه لرده ياشايانلاردان چوخ موفق اولوبلار. و بونلارين سعی و تلاش لارينين نتيجه سين بيز سوئدين خاريجی ايشلرينين بشر حاققی راپورتوندا گوره بيلريک که آذربايجان مساله سينه بير خاص يئر وئريلميشدير.
اوميد کی خاريجده ياشايان آذربايجانليلار سياسی ايشلرين کناريندا علمی و تحقيقی ايشلرده گونئی مساله سی باره سينده گورسونلر و بو ساحه نيده اونوتماسينلار کی بو عرصه چوخ تاثيرلی بير عرصه دی.
احسان آستارالی