Durna

گونئی آذربایجان میلی حرکتینده اولان تهدید ائدیجی آفت لره قیساجا بیر باخیش

بو گونلر گونئی آذربایجان اولای لاری دونیا سیاستچی لرینین دیقت مرکزینده دیر. ان آزی 15-16 ایل بوندان اول میلی حرکتین ان صادیق و ان ائتگین قوللاریندان ساییلان اویره نجی لر ین ایلکین فعالیتلری ایله مئیدانا گلن بو حرکت سون دونم لرده گلیشمه یه باشلامیش و ان باشاریلی نوقطالاریندان بیریسینه یئتیشمیشدیر. حرکت ایلرله دیکجه اونو تهدید ائده ن آفت لرده بیره ر بیره ر اوزونو گوسترمه یه باشلامیشدیر. طبیعی اولاراق بو گنج حرکت گئت گئده زامان بویوندا گلیشمک زوروندادیر. آذربایجان تورکلری سون 50 ایل ایچینده میللی تشکیلاتلار یوخ بلکه ساغ، سول و ایسلام ایدئولوژی لارینا مالیک اولان ایرانین بوتونلوگون نظره آلان تشکیلاتلارا اویه اولموشلار. آنجاق بلکه بو سون 15-16 ایلین ایچینده ایرانین آغیر باسقی سوردوگو بیر اورتامدا ایلک اونجه کولتوره ل اورتامدا و سون ایللرده سیاسی آلانا داشینماغا جهد گوستره ن گنجلر یاردیمی و تشبوثو ایله آذربایجان میلی حرکتی یارانماغا باشلامیشدیر. دولایسی ایله بئله بیر گنج حرکتین ائتدیگی سهو لر تماما دوغال اولارق قبول ائدیله بیلیر.

حرکت گوجلندیکجه باشقا بیر نده نلر حرکتین یولونو جایدیرماغا و اونون ائتگی سی نی آزالتماغا یونه لیک چالیشمالار مئیدانا چیخمیشدیر. بونلارین بعضی لری یئنه دوغال اولاراق اینسانلارین فرقلی دوشونجه لرینده ن قایناقلانیرسادا بعضی لری بیلینجلی اولاراق رسما ایران حاکمیتی اورگانلاری طرفینده ن اورگانیزه ائدیلمکده دیر.

چوخ طبیعی اولاراق ملی حرکتین ایچینده فدرال و استقلال دوشونجه سی آراسیندا اولان بنزرلیک لره راغما تشکیلاتلانما آچیسیندا آیریلیق لار گوزه چارپماقدادیر. فدرالیسم و استقلال ایستک لرینی سون اولاراق دیرلندیره ن آذربایجان میلتی هر ایکی دوشونجه یه احتیلج دویماقدادیر. بو ایکی فیکیر بیر بیرینین قارشیسندا یوخ بلکه اصلینده بیر بیرینی بوتونلشدیرمه ده دیر. بونلار هر بیریسی نین آرادان گئتمه سی ایله آذربایجان میلی حرکتی بویوک بیر بوشلوق ایچینه دوشه بیلیر. اونملی اولان بو ایکی تمل فیکیرین عینی جبهه ده فارس شونیزمینه قارشی دویوشمه سینده دیر. بو نو حرکت آیدینلاری تماما حیس ائتمکده دیرلر. آنجاق دویغوساللیقلا داورانان بعضی حرکتچی لر بیر بیرینین علیهینه اتهام وورماقلا بیر بوتون اولان آذربایجان میلی حرکتینی ضعیفله مک ده دیرلر. بونلار بیله ره ک و یا بیلمه یه ره ک فارس شونیزمینین گوجلنمه سینه زمین یارادیرلار. دمکراتیک پرنسیپلره اینان هر بیر میلتچی ایستر فدرالیست و ایستر ایستقلالچی اولسون بیر بیرینه باغرینا باساراق بللی بیر نوقطایا قده ر موباریزه لرینی دوام ائتدیره بیلرلر. بیر بیرینه خیانت دامغاسی ووران اینسانلار اصلینده آذربایجانی یوخ بلکه اوز ایستک لرینی هر بیر قیمته اولورسا اولسون ماسا نین اوزه رینده تک باشینا گورمک ایسته ییرلر. بو دوشونجه گونئی آذربایجان حرکتینده اولان ان اونملی آفت لر ده ن بیریسی اولا بیله ر.

باشقا بیر آفت لرده ن اولان حرکت ایچینه نفوذ ائتمیش و اونو ایچه ریده ن چورویه چیخاران یالانچی میللیتچی و بللی اورگانلار طرفینده ن اورگانیزه ائدیلن لر دیر. بونلارین سایی و چالیشدیقلاری آلانلا ایلگیلی چوخ بیلگی متاسفانه موجود دئیلدیر. آنجاق بعضا بونلارین ایزینی بعضی اینترنت سیته لرینده و تشکیلاتلاردا گورمک مومکون اولابیلیر. سون واختلاردا تبریزده چالیشانلارا چامورآتماغا چالیشانلارین بعضی لری بو جرگه ده اولا بیلر.

لمپنیزم، حرکتی مصادره ائتمک، پهلوان پنبه تمثیللی لیدرلرین یارادیلماسی ایسه باشقا بیر آفت اولا بیلر. دایما یالان دانیشیب، هر بیر شئی یی اوز اوزه رینه آلان، گونده بیر دونا دوشن و اخلاقی ایلکه لری راحتجاسینا پوزا بیله نلر ایسه بو گروپا عایددیرلر. بونلارین بیر قویروغو تبریزده ایسه او بیری قویروغو سوئد ده ن توتموش آمئریکا و کانادایا قده ر اوزانماقدادیر. گئت گئده ایلکین سایقی لارینی ایتیره ن بو اینسانلار ساییسی آز اولماسینا باخمایاراق هر زامان اختلاف قایناغی دیرلار. بونلار هر بیر توپلانتیدا اولسالاراورانی قاریشدیرماغا جهد گوستریرلر. بونلارین اساس آماجی اوز فیکیرلرین و دوشونجه لرین هر قیمته اولورسا اولسون باشقالارینا تحمیل ائتمکدیر. بونلار منتقدلرینه قارشی هر زامان خیانت سوچو و باشقا یاراماز صیفت لر ایستفاده ائده ر لر. هر کیم بونلارین گوزلوگو ایله دونیایا باخمازسا او زامان کافر سایلیب و حرکتده ن ائشیگه آتیلمالی دیر. بو دوشونجه هر بیر توپلانتی و چیخیشی منیمسه مه یه چالیشیر. آرتیق بونلاریا زامان ایچینده اینزوایا دوغرو گئتملی و یا ساغلام دوشونجه و اخلاق پرنسیب لرینه سایقیلی اولوب حرکت ده یارارلی اولا بیلر لر. آنجاق بونلار بعضی لری هئچ زامان و هئچ قیمته اوز یوللاریندان و اخلاقلاریندان ال اوزه بیلمزلر. نیئه کی آرتیق بئلنچی بیر رفتارلار اونلارین آییریلماز اوزه للیکلرینه چئوریلمیش آرتیق بیر پسیکولوژیک عارضه اولاراق دیرلندیریله بیلیر.

گونوموزده ان چوخ احتیاج دویولان بیر شئی آیری آیری گروپلار و فیکیلرله برابر بیر یومروق کیمی بیر یئره توپلانیب بیر جبهه ده موباریزه ائتمک دیر. منفی منم منم لیک لر میلی حرکتیمیز مدرن بیر اورتامدان ارتجاعی بیر اورتاما دوشوره بیلیر و بو گونئی آذربایجان میلی حرکتینین دونیا مقیاسیندا پرستیژینه ضربه وورا بیلر.

اینانیریق کی بو قوتسال حرکت و موباریزه آییق و آیدین اینسانلاریمیزین همتی ایله قیمتلی و ده یرلی سونوجلار الده ائده جک دیر.

عشق اولسون آذربایجان گنجلیگینه، اونوتمایالیم کی کله جک بیزیمدیر.

احسان تبریزلی

16 خرداد 1385