آذربایجانلی پارتیالار و گروهلار قابیق سالمالیدیرلار
دونیادا و اورتا دوغودا ده ییشیکلر او قدر سرعت گوتوربدور کی هر بیر پارتی و گروه مجبور اولور کی اوز گوروشون، مبارزه شیوه سین ، تاکتیکلرین ده ییشسین و یئنی بیر شیوه و یولداش توتماغینان اوزونو اویونون ایچینده ساخلاسین. بو ده ییشیکلیکلرین چوخو اجباری و بعضی سیده انتخابی اولورلار ولی هر گروه کی اوز مبارزه شیوه سین و تاکتیکلرین ده ییشمه سه سیاست صحنه سیندن دیلیت اولور.
هر بیر پارتی گره ک زمانه نین ده ییشمه سین بیلیب وچاغداش مبارزه شیوه لیرینی سئچیب و یئنی تاکتیکلرینن مبارزه سین دوام ائتدیرسین. ایندی اورتادوغودا چوخلو قدیمی سیلاحلی گروهلار زمانه نین ایسته کلرین درک ائدیب و زمانیه قوشولوبلار و اوز آماجلارینین دالیسینی توتوبلار. پ.ک.ک. ایندی قابیق سالیب و اصلی کادرلاری مجبور اولوبلار زمانه نین ایسته کلری اساسیندا حرکت ائتسنلر و اوز هدفلرینی ایستیرلر "دیالوق" یولوینان اله گتیرسینلر و ایرلندیده "شین فئن" گروهونون سیلاحلی شاخه سی اسلحه لرین یئره قویوب و سیاست یولونو سئچدیرلر.
کئچن نئچه ایلین عرضینده شخصلر و گروهلار آراسیندا بعضی تارتیشمالار و بعضی سوز صوحبتلر گئتدی کی سیاسی فعالاریمیزدا اعتمادسیزلیق و سوسقونلوغا باعث اولدو و گوروندو کی آذربایجانلی گروهلار و شخصلر مدرن سیاسی ادبیاتدان ابدا فایدالانمیرلار و بیر بیرینی اووجون آچیرلار و بیربیرلرینه سندسیز تهمت و افترا یاپیرلار. بوجور ایشلر و شیوه لر بیزیم سیاست دونیاسندا نقدر آماتور اولماغیمیزی گوستردی. و الیمیزی دوشمانلاریمیزا اوخوتدوق. آذربایجانلی گروهلارین و شخصلرین بعضی پیس تاکتیک و شیوه لرینه کی بو ایکی ایلده بیر بیرلرینین علیهینه ایشله دیلدی بورادا ایشاره اولونور.
1. سندسیز تهمتلر: بو شیوه دن چوخلی شخصلر و گروهلار داورانیبلار تا اوز رقیب و یا آیری گروهلاری میداندان چیخاردیب و اوزلرین بیرینجی گروه گوسترسینلر. بو چیرکین عمل باعث اولوبدور کی چوخلی صادق شخصلر و فردلر میللی حرکتی بوشلایا و اوز یاشاییشنین دالیسینجا گئتسینلر، همیده میللتیمیزده میللی فعالارا اعتمادسزلیق یارادیب. بو شیوه چوخ قدیمی شیوه لردندیر کی دشمن گروهلار و شخصلر بیر بیرلرینین علیهینه ایشله درلر نه پارالل و بیر جیبهه ده اولان شخص و گروهلار. بو شیوه نین یئرینه بیر مدرن تاکتیکدن فایدالانماق اولار اودا"اتحاد-انتقاد" شیوه سیدیر کی گره ک انتقادلاریمیزدا منطقی و علمی شکیلده اولوب و یول گوسترن و اصلاحا چاغیران اولسون نه میداندان چیخارتماق اوچون.
2. اوزلرین شیشیرتمک: چوخلی شخصلر و گروهلار اوزلرینی غیر واقعی خبر و یازیلارینان ایسته ییبلر بویودوب و شیشیرتسینلر. دیشاریدا اولان گروهلار بو شیوه دن چوخ فایدالانیبلار. بو دوستلاری بیر مساله ارجاع وئره بیله ره م کی ایندی خبر و اطلاعات پاتلاییش زامانیندا چوخ چتیندیر کی بیر یالان مساله نی میللته یئدیردک. بوجور خبرلره چوخ ظرافت و دیقت و گوجلو رسانه لر ایستیر کی بیزیم گروهلارین هئچ بیرینده بو امتیازلار یوخدور. بو جور خبرلری بی.بی.سی و سی.ان.ان. یاییب و ییغیشدیرا بیلر. بیز هله او گوجه مالیک ده ییریک. و بو قونودا همیده بعضی گروهلار ایچریده زندانا دوشن فعالاری اوز گروهوندان یازیب و چوخلو تارتیشمالارا باعث اولوبلار. "گاموح" سایتیندا چالیشان دوستلار بوجور تارتیشمالارا چوخ باعث اولوبلار و بعضی خبرلر یازیبلار کی دوزلوقلاری تایید اولونماییب. همیده بعضی دوستاغا دوشن دوستلاری اوز گروهلاریندان اعلام ائدیبلرو چوخلی تارتیشمالارا باعث اولوبلار. "گاموح" دا اولان یولداشلارا دئمه لییم کی"گاموح" گروهونون وزنی قالادا 83 نجو ایلده بللی اولدو و اکثریت 18 و 19 نجو گونلر قالایا یورودولر و نیازی یوخدور بعضی خبرلرینن گاموح گروهونون وزنین آشاغا گتیریب و بعضی یئرسیز تارتیشمالارا باعث اولاسیز، تاغی ، کاظیم، قاسیم... بیزدندیر مساله سین کنارا قویوب ساده و تائید اولونموش خبرلری یایین.
3. شانتاژ: بعضی فرد و گروهلار بو شیوه دن بعضی خاص وضعیتلرده فایدالانیبلار. بعضا فیزیکی شانتاژلار و قلمی شانتاژلار گورونوبدور.
4. یامان یووز: بو شیوه دن شخصیتلری ضعیف فردلر و گروهلار چوخ فایدالانیبلار.
بونلاردان علاوه شایعه و آیری شیوه لردنده استفاده اولونوبدور کی بورادا اونلارا ایشاره ایتمکی لازیم گورموره م.
بیر ساده باخیشدا آذربایجانلی گروهلارین میللی مساله یه و آیری قونولارا تئوریک نظریندن ضعیف باخیشلاری گوز اونونه گلیر. بو گروهلارین هیچ بیرینین حرفه ای کادریلارینی اولماماسی و علمی بیر مرکزلری و آراشدیرما مرکزلرینین اولماماسی بونلارین بویوک ضعفلریندندیر. بیز اونلار کی ادعا ائدیرلر نئچه تمثیلچیلری مختلف اولکه لرده وارلاردیرلار هله بونلاردان بیر علمی مطلب او اولکه نین دیلینده و یا بیر وئبلاگ و یا بی گوجلو سایت بین المللی دیلرده گورمه میشیک.
آذربایجانلی گروهلارین بعضی سی دیپلماتیک اصول و پرینسپلرین آیاغ آلتینا سالیب و رسمی سایتلاریندا ممالیک محروسه ده یاشایان بعضی ملی گروهلارینا و دیللرینه توهین ائدیبلر کی بو مساله بیز مباریزه میزین کیلاسینی آشاغا گتیریب. بیر رسمی سایتدا گره ک انسانی اوصولار و اخلاقی پرینسبلر رعایت اولونا و غیر رسمی وئبلاگلاردا و غیر رسمی سایتلاردا کی آدیمیز تانینماسین بعضی سوزلری یازماق اولار. نئجه کی آیری اولکه لرده بوجوردور. آمریکا "بن لادن" نین علیهینه چوخلی کاریکاتور و انیمییشن دوزه لدیب ولی بونلارین چوخو غیر رسمی سایتلاردا یاییلیب نه رسمی بیر حزبین و یا بیر سیاسی گروهون سایتیندا.
آذربایجانلی گروهلاردا لازیمدیر کی زامانیه اویغون اولان شیوه لرینن و تاکتیکلرینن اوز مبارزه لرینی علمی و منطقی شکیلده قاباغا آپارسینلار، اگر منطقی داورانماسالار و قدیمی شیوه لرینین ایستسه لر بو گونکو دونیادا مبارزه لرینه دوام ائده لر آرادان گئتمه و اویوندان کنارا قویولما مجبوریتتینده قالیب و میللت طرفیندن سس قازانا بیلمییه جکلر. سیاسی گروهلاریمیز و اشخاصلاریمیز بیلسینلر کی هر ایشلری و هر سوزلر میللت طرفندن اینجه شکیلده گوز آلتیندادیر. هامیمیزین عملریمیز و دانیشیقلاریمیز میللت طرفیندن عیارلانیر.
ائلخان تورک اوغلو