بیزیم داشیمیز آغیردیر!
ائلخان تورک اوغلو
آوروپا بیرلیگی اتمی دانیشیقلاریندا ایسلام جمهوریتینن، ممالک محروسه ده یاشایان قوملارین بشر حاقلارینین مساله سین و اونلارین پوزولماسینی بیر قیرمز کارت کیمی ایسلام جمهوریتینه نیشان وئردی. ولی آوروپا بیرلیگی بیر زرنگلیگ ائدیب و فقط ایکی قوومون آدین چکیب، کوردلردن کی اونلاری 9 فایز ممالک محروسه نین جمعیتی حئساب ائدیب و عربلر کی اونلارین نئچه فایز اولماقلارینی قئید اتمه ییب. ولی ممالک محروسه ده یاشایان آیری میلتلردن بو قطعنامه آد چکیلمه ییب. نه تورکمنلردن، نه تورکلردن، نه بلوچلاردان... بونلارین هئچ بیرینین آدی چکیلمه ییب. و بونلارا اولان غیر انسانی و چوخلی تضییقاتلاردان دانیشیلماییب. نییه؟
آیا بیزه، تورکمنلره و بلوچلارا مگر آز تضعییقلر یاپیلیر کی بیزیم میللته اولان تضعیقاتلاری اونلار گورمورلر؟ یا اونلارین آیر نقشه و پلانلاری واردیر؟ نییه کوردلری 9 فایز گوسته ریرلر حال بو کی اونلار بو قدر دئیللر!؟ آوروپا بیرلیگینده اولان پولیتیکلرین و سیاستچی لرین نقشه لری ممالک محروسه یه ندیر؟ نییه آیری میللتلره اولان غیر انسانی عمللری اونلار اوز قطعنامه لرینده گتیرمه ییبلر؟
آوروپا بیرلیگی قومیت مساله سیندن بیر کارت کیمی تورکیه باره سینده ده فاریدالانیب و ایندی ایستیر بو کارتدان ممالک محروسه اوغروندادا فایدالانسین ولی هله بو کارتدان ناقص شکیلکده فایدالانیب و ایستیر ایسلام جمهوریتین قورخودا ود ئییه کی اگر منیم سوزومه باخماسان بو مساله نی و بشر حاقلارین قاباغا چکه جه ییک. و هامی دا بیلیر کی ایسلام جمهوریتینی لاخلادان بیر شئی واردیر و اودا میللتلر و ممالک محروسه ده یاشایان قومیتلر مساله سیدیر. اوروپالیلاردا بیلیرلر کی ممالک محروسه ده حاکمیتده اولان حکومتلرین هامیسینین "آشیل دابانی" قومیت و بورادا یاشایان میلتلر مساله سیدیر. اودور کی هر حکومت اونلارین سوزونه بویون قویماسا و اونلارین منافعی اساسیندا داورانماسا و اونلارا ایمتیاز وئرمه سه ، اونلار بو کارتینان، اونلارینان اوینویاجاقلار. ولی نییه هله ایندی ایستیرلر چوخ کورد کارتیینان اویناسینلار و کوردلرین مساله سین قاباغا چکیبلر و عربلریده کامیل شکیلده هله اویونا قاتماییبلار و اونلارین نفوسلاریندان سوز آچماییبلار؟ اونلار بیلیرلر کی کوردلرین ایستکلری اونلارین ایستراتئژیک منافعلرینن اویغون و اونلارین منافعین خطره سالان دئیل. و کورد کارتیینان ائیلیه بیلرلر تورکیه و سوریه ده باسقی یاپسینلار، اودور کی اونلار ایستیرلر کوردلری چوخ گوز اونونه قویسونلار. ولی بیزیم حاقلاریمیزدان و اونلارین پوزولماسیندان بیله بیله سوز آچمیرلار.
ممالک محروسه ده تورک و گونئی آذربایجان مساله سی هامی میللتلردن سونرا گتیریله جک و اودا ناقص شکیلده اونلارین طرفیندن طرح اولوناجاق، نییه کی تورک میللتی بیر عدالت سئور بیر میللتدیر و گونئی آذربایجاندا تورک دونیاسین بیر بیرینه یاپیشدیران نوقطه دیر و بیزیم ایستکلریمیز اونلارین ایستراتئژیک منافع سین خطر سالاندیر. اونلاردان علاوه روسیه و ائرمنستانین منافعسینده لاپ آیدین شکیده خطره سالیر و اونلاری یاخین دوستلاریندان آیری سالیر اودور کی آوروپالیلار بیزیم حاقلاریمزین پامال اولماسینا و ازیلیب آرادان گئتمه سینه اعتراض ائتمیرلر. ولی کوردلرین حاقلارینین ازیلمه سین شیشیردیب و بویودورلرو نفوسلارینین نقدر اولماسینادا ایشاره ائدیرلر!
بو قطعنامه کوردلره بیر یاشیل چیراغ کیمی تعبیر اولونا بیلر کی اوزونوزو حاظیرلایین و ده ییشیکلره حاظیرلاشین و کورد گروپلاریدا تانریدان بونو ایستیردیلر کی آوروپا سیاستینه گیرسینلر و اونلارینان ایش بیرلیگه باشلاسینلار و آمریکانیدا کی اوز یانلاریندا گورورلر. ایندی کورد گروپلاری سیاسی و نظامی نظردن گوجلو شکیلده حاظیرلاشاجاقلار تا اوز رولارین دوزگون اویناسینلار و اوزلرینه لاپ چوخ توپراق و اراضی ایسته سینلر و همیده لاپ چوخ پست و مقام ایسته سینلر و سوپر گوجلرینن دیالوقا گیره جکلر. ولی بیز هله سیاسی نظردن بیر آز قاباغا گئتسه کده ولی نظامی نظردن هله هئچ ایش گورمه میشیک و اوز میللتیمیزین ذهنینی ده ییشیشکلره هله حاظیرلامامیشیق. بولگه ده هر زامان بیر قدرت خلاء سی یارانیب او گروهلار چوخ قازانیبلار کی نظامی گوجلری چوخ اولوبدور.
تورکون یولداشی تورکدن سونرا هئچ کیم اولا بیلمز سوزو بوندان سونرا لاپ بیزیم گره ک شاه بیتیمیز اولسون و بولگه ده و دونیادا یولداشلاریمیزی و دوشمانلاریمیزی تانییاق. بودا بیزه آیدین اولسون کی هیچ کیم بیزیم منافعمیزدن اوترو چالیشمایاجاق و بیز اوزوموز گره ک اوز حاقلاریمیزی آلیب . گوجلو شکیلده بولگه ده بیر گوجه چئوریله ک. حاقی دیلنمه ک اولماز، حاقی بیر اوزگور کیمی آلمالییق هر دولت و حکومت اولور اولسون. قدیمی دوشمانلاریمیزدان بیزه یولداش چیخماز و اگر بیر زاماندا بیزه یاردیم ائتسه لراوز استراتئژیک منافعلری اوچون بیزه یاردیم ائدیبلر نه انسانیت اوچون و بیز حاقمیزا چاتماق اوچون. آوروپالیلار بیر گونده اگر بیزدن حیمایت ائتسه لر گره ک احتیاطلی اولاق نییه کی اونلار بیزیم پیس گونوموزده بیزیم دوشمانلاریمیزینان دوستلوق ائدیبلر ولی اونلارینان لازیم جاسینا دیالوق ائتمه لییک نییه کی بیزده گره ک اوز منافعلریمیزین دالیسینجا اولاق.