|
|
|
|
گونتاي جاوانشيرين " رقص فلسفه سي" مقاله سينه ائلئشتیرَل (تنقيدي) باخیش بير تاريخي اولقو و يا بير صنعت نؤوعو اوزرينه فلسفي تحلیل ايستر-ايستمز اساسن اؤزنَللييه (ذئهنیلییه) داياناجاقدير. چونکو او اولقونون اولوشوموندا، يا دا شکيللنمه سورجينده دَيَرلنديريجي نين قاتقيسي بولونماماقدادير. دَیَرلندیریجی اولوشموشو آنلامادا قاتقیدا بولونور. بو ندنله ده اولايين ماهييتيني قاوراديغي قدر آناليز ائدجکدیر. بو قاوراييش سورجينده تاريخيليگين ائتکيسي اولسا دا، آنجاق گئنلليکله (عمومییتله) يوزوم(تحلیل) اؤزنلليک ايچَره جکدير. اؤزنلليک ايچَرمک ائلئشتيرل (تنقیدی) يوزوملاردا بير قوصور مودور؟ دئييلدير، کسينليکله بير قوصور دئييلدير. قوصور دئييلدير، آنجاق بيليمسل ده دئييلدير. بير اولايي، بير اولقونو بیلیمسل اؤزومسه یيش اؤزومسه يه نين اؤز ايچ دونياسي نين اؤزلليگيني ده اولايا يوکله ميش اولور. اصلینده تاريخده کي بعضي اولايلارين دَييشيمه اوغراماسي نين ندنلريندن بيريسي ده بودور. يعني بعضي شخصيیيتلرين اؤز اؤزومسَمه تجروبه لريني هانسيسا بير تاريخسل اولايا يوکله مه سي او اولايين ترانسفورماسيونا اوغراييشيني ساغلاميش اولور. لاکين بو، هر زامان اولوملو(مثبت) سونوچ دوغورماماقدادير. بير اولايين، يا دا بير اولقونون آنلامسالليق آچيسيندان تام سويسوزلاشديريلماسي ياخشي بير ايش دئييلدير. حتّی بو سويسوزلاشديرما ائيله مينده فلسفي يؤنتم قوللانيلسا دا، ائديم(عمل) اؤزو(ماهییتی) اعتيباري ايله دوغرو دئييلدير. فلسفي يؤنتم قاپساملي اولدوغو اوچون آنلامين ساپتيريلماسينا، چارپيق دوروما دوشمه سينه داها دا گئنيش ائتکي گؤسترميش اولور. بو آچيدان باخاراق گونتاي جاوانشيرين "رقص فلسفه سي" مقاله سيني دَيَرلنديرمکده فايدا وار دئيه دوشونمکده يم. اؤنجه شونو بَليرتليم(معین ائده لیم) کي، بير يازار، بير صنعتچي، يا دا بير ائلئشتيرمَن (تنقیدچی) کندي ذئهينسل بيريکيملريندن يارارلاناراق بير صنعت نؤوونون اولوشومونو ساغلايير، يا دا ائلئشتيريده بولونور. بير بيرئيين آناليزي تاريخيليک باغلاميندا گليشسه ده، آنجاق تاريخين کنديسي دئييلدير. بيليمسل يؤنتمده تاريخيليک چوخ اؤنمليدير. لاکين بيرئيين تاريخي بيلگيلري نين نه قدر گئرچکچي اولوب- اولماماسي اوندان دا اؤنمليدير. کندي ذئهينسل بيريکيملريني فلسفي بير بيچمله ائلئشتيرل(تنقیدی) ياپيتا(اثره) يوکله مک اولايين بيليمسل آلقيلاييشي(ایدراک ائدیلمه سی) آنلامينا گلمز. گونتاي جاوانشيرين بير اولوسون اورتاق تاريخي-معنوي محصولو اولان صنعت ياپيتيني دَيَرلنديرمه بيچيمي اولايي تاريخييت ساحه سيندن ديشلاييب و بيليمسل اولمايان "فلسفي" اوصلوبا حبس ائتمه يه چاليشماقدادير. يعني مورککب قاوراملارين، تئرمينلرين ايچينده حاديثه نين ماهييتيني، خلقيليگيني اؤرت- باسدير ائتمک. بير حالدا کي، خوصوصن زحمتکئش خالق کوتله سي نين ياراديجيليغي اولان اولوسال صنعت نؤوعلرينده فلسفيليکدن داها چوخ ميللي حيات دويغولاري آراشديريلماليدير. مثلن داها چوخ امَک مئيدانيندا بيچيملنميش اولان رقصلرده زحمتکئش کوتله نين امه يه اولان موناسيبتي اله آلينماليدير. چونکو حيات دويغولاري امکله ايچ-ايچه اولان بير اولقودور. ان بؤيوک اخلاق ايسه امکدير. صنعت اثري سادجه حياتين بقاسيني ساغلايان امَکله ايليشکيده دئييلدير، صنعت اؤزو ده بير امه یين سونوجودور. بير اولوسون موختليف طبقه لري نين اورتاق مالي اولان رقص هر شئيدن اؤنجه اورتاق حيات دويغولاريني تَرَننوم ائتمه آچيسيندان چوخ اؤنمليدير. بئله ايسه رقص کيمي حيات دويغولاري ايله زنگين اولان بير صنعتي حياتدان قوپوق و ايچه دؤنوک تصوووف فلسفه سي ايله تحلیل ائتمک تامامي ايله يانليش بير مئتودولوژيدير. گونتاي جاوانشيرين مئتودولوژيسي خطاليدير. هانسي حاديثه يه هانسي مئتودلا ياناشماغي بيلمک اؤزو- اؤزلوگونده بير علمدير. اولايا هانسي آچيدان باخماق گره کير؟ اؤنجه بو سورونون (سوآلین) يانيتي (جاوابی) وئريلمه ليدير. يوخسا هر اولايا ايسته ديگين و سئوديگين مئتودلا ياناشديغيندا، او زامان هر شئي بير-بيرينه گيرميش اولور و مثلن حيات دويغوسو ايله زنگين و انگین اولان خالق ياراديجيلغي ايله، حيات دويغوسوندان يوخسون (محروم) و قوپوق اولان تصوووف ياراديجيليغي عئيني معيارلا دَيَرلنديريرلير. بئله اولدوغو زامان اولايين معناسي و ماهييتي ايتيريلميش اولور. بیر مئتودولوژیک خطا هم قاورام(واژه) قارغاشاسی(ایغتیشاشی) یارادیر، هم ده عاغلین گئرچه یی قاوراییجیلیق اولاناقلارینی(ایمکانلارینی) آزدیریر. رقص حياتا و حيات دويغولارينا ساريلمانين نتيجه سي ايکن، تصوووف بو ايستکدن تامامن محرومدور. تصوووف بونون ترسينه اولاراق اينسان دويغولاريني، آرزولاريني سؤندوره رک، سينيرلانديراراق اينساني تانرييا قوووشدورماني هدفله مکده دير. بو گونه قدر ده هئچ بير تصوووفي جريان اينسانليق اوچون توپلوسال بیر فلسفه اورتايا قويماميشدير، قویماق ایسته مه میشدیر. حتّی بئله ده سؤيله مک موکوندور: زحمتکئش خالق طبقه سي نين اينسانليق مدنييتينه سوندوغو مدني دَيَرلر قدر تصوووفي آخيملار اويقارجا(مدنیجه) بير اولاي گئرچکلشديرمه ميشلر. چونکو تصووفده گئنیش میقیاسلی امَک سؤزقونوسو اولمامیشدیر. تصوووف بلکه اؤز نفسيني زورلايان نيسبتن گوجلو فردلر يئتيشديرميشدير، لاکين بو گوجلو فردلرين توپلوما هئچ بير ياراري اولماميشدير. چونکو ذاتن تصوووفي ايستکلر توپلومدان تجريد ائديله رک اولوشموشدور. آنجاق رقص نؤوعلري توپلومسال ايليشکيلرين اورتاميندا و اورتاسيندا بيچيملنميشدير. او زامان ندن فرقلي آماجلاري و ايرتيباط نؤوعلري اولان بو جريانلاري بير- بيرينه قاريشديرماليييق؟ يعني خلقي بير موحيطده شکيللنميش اولان بير اولقونو، غئيري- خلقي بير موحيطده شکيللنميش اولان ديگر بير اولقونون مئتودو ايله تحلیل ائتمک آنجاق خطالار و یانلیش آنلامالار دوغورا بيلر. گونتاي جاوانشير تصوووفون کوبروي طريقتينده يايغين اولان 7 عشق مقامي فلسفه سي ايله آذربايجانين رقصلريني تحلیل ائتمه يه چاليشميشدير. اؤنجه شونو بيلمه ليیيک کي، تصوووف عموم ايسلام شرقي نين اورتاق آختاريشلاري نين محصولودور. آنجاق آذربايجان ميللي رقصلري صيرف بو جوغرافييادا ياشايان زحمتکئش طبقه لرين اورتاق تاريخي ماليدير. بعضي رقصلري ده دئيک کي، ديگر اولوسلارين رقصلريندن آز- چوخ ائتکيلنميشدير. رقصين آماجي اينسانين روحونا حيات دويغولاريني يوکله مک، تصوووفون آماجي اينساندان حيات دويغولاريني آلماقدير. يعني بو 7 عشق مقامي آدلانان حاديثه تاريخ بويو اينسانلارا موتلولوق گتيرمه ميشدير. بير نؤوع خوليادان باشقا هئچ بير شئي اولماميشدير. اونا گؤره ده عاغليني، خياللاريني بو 7 مرحله يه حبس ائدن اينسان هم اؤزونو، هم ده منسوب اولدوغو اولوسونو بدبختلييه سوروکله ميشدير. بير حالداکي رقص خوشبتلييه کوللئکتيو شکيلده يؤنلمه صنعتيدير. یعنی رقص صنعتینده، سادجه اوینایانلار دئییل، باخانلار دا موتلو اولورلار. 7 عشق مقامي نين رقصله نه علاقه سي اولا بيلر؟ گونتاي جاوانشيرين سماع- زنليگي رقص گروپونا داخيل ائديب و سماع- زنليگين فلسفه سي ايله بوتون رقص نؤوعلريني تحلیل ائتمه سي، اصلینده بوتون رقصلري تصوووفون تخييولاتينا محکوم ائتمکدن باشقا بير شئيه خيدمت ائتمه مکده دير. سماع- زنليک رقص دئييل کي. اورادا رقصه عايد اولان هئچ بير ائلاستيکليک و هیجان يوخدور. آدامين بوينونو چيينينه ساللاييب و دونيادان کوسرجه سينه فيرلانيب دورماسي رقص صنعتي نين فلسفه سي ايله هئچ بير علاقه ده دئييلدير. سماع- زنليگين دونيايا کوسکونلوگو ايله، رقصين دونيايا و حياتا ساريلماسيني قاريشديرماق، بو ايکي اولايين ماهييتيندن خبرسيز اولماق آنلاميندادير. گونتاي جاوانشيرين بو مقاله ده يازديغي سماع- زنليک حاقيندا دوغرو اولا بيلر، لاکين رقص فلسفه سي ايله ايرتيباطي چوخ ضعیفدیر. رقصين فلسفه سي، بلکه بوللوجا دويغو ائنئرژيسيني ياراتماق اولا بيلر. گونتاي جاوانشيرين بو مقاله سيندن آنلاشيلان اودور کي، اونون ذئهني نين بير گوشه سينده تصوووفه بير مئيلليليک وار و بو تمايول ده اؤزونو بو دَيَرلنديرمه سينده گؤسترمکده دیر. لاکين هر هانسي بير تمايوله گؤره بير اولايي اؤز اصل ماهييتيندن يايينديرماق دوغرو دئييلدير. گونآل آیقار www.yenises.org/?p=867#more-867
|
||
|
|
|
Materiallardan istifadə zamanı qaynağa istinad
vacibdir |