|
آرشيو ا
ادبيات ا
اوشاق ا
قادين
ا
رئداكتوردان
|
گونتاي گنجالپ
گونئي آذربايجان ميللي حرکتي اوزرينه فئنومئنولژيک ياناشما
"
گونئي آذربايجان" سؤز بيرلشمه سي آرتيق قبول ائديلميش بير
آنلاييشدير. بو آنلاييشين تاريخي، جوغرافي، سياسي بويوتلاري وار.
بو آنلاييش اطرافيندا بير سورو(sürü)
سورو (soru- سوال)- يانيت (جاواب) بيلگيلري اورتايا چيخميشدير. بو
سورو- يانيت ديالئکتيگي باغلاميندا ايستر-ايستمز اوسسال (عقلي)
اولاناقلار (ايمکانلار) دا گئنيشله ميشدير. اصلینده ايسه ارَيه
(هدفه) چاتانا قدر بو دوغرولتودا تاريخي، جوغرافي، ادبي،
سوسيولوژي، فلسفي و سياسي قاوراملار او قدر زنگينلشمه ليدير کي،
اونون ائتکيسيندن (تاثيريندن) کناردا قالماق مومکون اولماسين.
بونون اؤرنگيني بيز ايران ميقياسيندا، حتّی دونيا ميقياسيندا
گؤرموشوک. سويوق ساواش زامانيندا سولون قاوراملاري او قدر
زنگينلشميشدي کي، ايستر-ايستمز بير جاذيبه مرکزينه دؤنوشموشدو. بو
قاوراملارين بير چوخونون سوللا هئچ بير ايليشکيسي نين اولماماسينا
باخماياراق، اونلار طرفيندن منيمسنميشدي. لئنينيست سولون تملي
اولماديغي اوچون اؤز ايچيندن چؤکموشدور. آنجاق اولوسال ارکلرين
(هدفلرين) و ايستکلرين تمللي اولدوغو قانيتلانميشدير (ايثبات
ائديلميشدير). اولوسال حرکتين بوتون بو قاوراملارلا زنگينلشمه
سی
نين ياني سيرا گئنيش بويوتلو
بيلگي بيريکيمي ايچريسنه گيرمه لي و بيريکيلميش بيلگييه گؤره ده
توپلومسال داورانيش سرگيله مه ليدير، دئيه دوشونورم. بورادا
تروتسکي نين بير فيکرينه داياناراق گؤروشلريمي داوام ائده جه
يم.
تروتسکي دئيير: "توپلومسال دئوريم گئرچکلشديرمک اولاناقسيزديرسا،
او زامان اويقارليقدا (مدنييتده) دئوريم گئرچکلشديرمک گره کير."
تام بيزيم تاريخسل ستاتوسوموزو بليرله ين بير گؤروش. بو گون
بللي ندنلردن دولايي اولوسال يؤنده يوردوموزون ايچينده دئوريم
گئرچکلشديرمک اولاناغيندان يوخسونوق. آنجاق اؤنوموزده کي زامان
ديليمينده اويقارليق
پلانيندا دئوريم گئرچکلشديره بيلمزسک، شوبهه سيز کي، او توپلومسال
دئوريمين گئرچکلشمه سي و اولوسال
حاقلاريميزين
حیاتا کئچمه سی ده چوخ زور اولاجاقدير. بو باخيمدان هم ديکئي (عمودي)
هم ده ياتاي (اوفوقي) گليشمه لري حياتا کئچيرمک جيدي گرکسينيمدير (ضرورتدير).
ديکئي گليشمه دوشونجه،
بيلگي و داورانيش پلانيندا گئرچکلشيرکن، ياتاي گليشمه ايسه
اؤرگوتلنمه و مللي گؤروشلري توپلومون ايچينده يايماقلا مومکون اولا
بيلر. داها دوغروسو ديکئي ائوريم (تکامول) دوشونسل و ياتاي ائوريم
ايسه سياسي پلاندا باش وئرر. ديکئي گليشمه لري دوشونجه آدامي
اورتايا قويار. چونکو هر عصرده بير نئچه کيشي دوشونر و قالانلار
ايسه دوشونجه آداملاري نين دوشوندوکلريني يا دوشونرلر، يا دا
اويقولارلار (تطبيق ائدرلر). بؤيوک فرانسا اينقيلابي وولتئر،
روسسو، و ديدئرو کيمي دوشونورلرين پروژه سي ايدي. ديکئي ائوريمي
ذهني باخيمدان بير چاغدان ديگر چاغا کئچيش کيمي آنلاماليييق.
بوراداکي چاغ تقويم آنلاميندا دئييل، دوشونجه آنلاميندا
آنلاشيلماليدير. شوبهه سيز کي، بونون تملينده اينديکي زاماندا
چاغداشلاشما ائيله ملري (فعالييتلري) دورماقدادير. اينديکي زاماندا
چاغداشلاشماني ساغلاماق چوغونلوغون گؤرَوي دئييلدير، ياراديجي
آزينليغين گؤرَويدير. بوگونکو ميللي حرکتده عکسيک اولان بودور،
يعني چاغداشلاشماني ساغلايان ياراديجي آزينليق عکسیکلیگی وار.
تاریخین ده یارادیجیسی و یؤن وئریجیسی بو یارادیجی آزینلیقدیر.
باشقا ديللرده اوخونسا دا، اؤز ديلينده جيدي ياپيتلار (اثرلر)
ياراديب و و بو وسيله ايله ميللي ايدئياني کيتابلاشديرماق احتیاجی
مؤوجوددور. بو سورجي
مدني اينقيلاب اولاراق تانيملاييريق.
بو دوغرولتودا شوبهه سيز کي، بعضي چاليشمالار گؤزه چارپماقدادير.
آنجاق بو چاليشمالارين چوخو مئتوديک و يا سياسيدير. فلسفي
چاليشمالارا راست گلميريک. اويسا فلسفي ائتکينليکلر (فعالیتلر)
دَيَرلر و پوليتيک ائتکينليکلر مئتودلار اوزرينده دورورلار.
دَيَرلر قالارغي و مئتودلار دَييشکندير. و يا مئتودلار داها تئز و
دَيَرلر ايسه اوزون زاماندا ترانسفورماسيونا اوغرارلار.
هر کس بيلير کي، بيز اولوس اولاراق ايسلام اورتا چاغيندا
ياشاييريق. بوگونکو ايراندا فرد او قدر دَيَرسيزلشديريلير،
کيمليکسيزلشديريلير کي، اونون اؤزونه اعتيباري، گووه ني و اؤز
نفسينه اينانجي قالمير. دئهومانيزه ائديلن (شخصیتسیزلشدیریلن)،
دؤولتين بؤيوک ماددي ايمکانلاري،
پسیکولوژیک تبلیغاتی
واسیطه سی ایله حیثیتسیزلشدیریلن اينسان اؤزونو دايما سوچلو و
آشاغيلليق کومپلئکسي ايچينده حيسس ائتمکده دیر. ديني ايستيبداد
بوتون دؤنملرده اينساني دئهومانيزه ائده رک، اونون تانري اوچون
ياشاديغي دوشونجه سيني تلقين ائتميشدير. بئله بير توپلومدا و
بيرئيده البتته کي، شخصي حئیثييتین، ميللي کيمليگین بيچيملنه سی
چتین مسئله دیر. بو باخیمدان اوزون تاریخ بویونجا
کیملیکسیز یاشاماغیمیزین سببلریندن بیری دینی ایستیبداد
اولموشدور. سلجوقلو، عثمانلی، صفوی دؤنملرینده کی دینی ایستبداد
میللی حیاتیمیزی دینی اینانشلارا یئم ائتمیش، تورکلویو عرب- فارس
کیملیکلری یولوندا قوربانلیق ائتمیشلر. بئله بير توپلوم عوضولري،
حتّی بير- بيرينه سايقيلي داورانماقدا
دا چتینلیک چکیرلر. چونکو کؤکو تاریخین درینلیگینه
اوزانان
میللی دایانیشما اؤرنه یوخدور، دینی دایانیشما اؤرنه یی وار.
چونکو داورانيش اوزون بير
تجروبه نين محصولودور. بو اورتامدا مودئرنيته نين بيزيم
يارديميميزا گلديگيني صؤحبتیمین آخيشي ايچينده آنلاتماغا
چاليشاجاغام. يالنيز بئله بير
وضعييتده موهاجيرتين اورتايا چيخيشينا تانيق اولوروق. يعني بو
ايستيبدادين اليندن قورتولماق اوچون موهاجيرت ائتمک، قاچماق
باشلاییر. گؤزوموزون اؤنونده داوام ائدن و اؤز ياشاميميزدا دا
تانيق اولدوغوموز اوزره موهاجيرت 3 يؤنده داوام ائدير: 1.
بئيينلرين قاچيشي. اؤلکه ميزده اؤز داورانيشلاري و بيلگيلري ايله
توپلومو
ائتکيله يه بيله جک اينسانلارا ائله شرایط ياراديرلار کي، اؤلکه ني
ترک ائتمک زوروندا قالسین. بو نؤوع موهاجيرتلرين وئريملي
اولدوغونون دا بيلينجينده اولماليييق. چونکو دونيادا بير چوخ
دئوريملرين تمليني موهاجيرلر آتميشلار. روسييانين آيدينلانماسي
موهاجيرلر طرفيندن گئرچکلشميشدير. تورکييه نين آيدينلانماسي
عوثمانلي ظولموندن و ايستيبداديندان باتييا قاچان آيدينلار طرفيندن
گئرچکلشميشدير. الجزايير اينقيلابي نين دوشونجه اؤزه گيني يئنه ده
موهاجيرلر شکيللنديرميشدي. بو اؤرنکلره تاريخده چوخ راستلانيريق.
2. ايکينجي فرار نؤوعو
توپلومدان و توپلومسال ياشامدان قوپوب، ايچه دؤنوک بير حياتا
قاتيلماقدير. صوفيليک، خانيقاهلارا سؤوق ائديلمه، خياللارا سيغينما
کيمي حيات شکلي بونون آچيق اؤرنگيدير.
3. اويوشدوروجويا،
ايچکييه سيغينما. بو اوچ نؤوع فرار شکليني گونوموزده گونئي
آذربايجاندا گؤرمکده ييک. هر اوچونون ده سببی اولان فارس
ميللييتچيليگي مرکزلي شيعه رئژيمي نين اؤلکه ميزده اويقولاديغي
ايقتيصادي، سياسي پوليتيکادان قايناقلانماقدادير. بو وسيله ايله
فارس شووينيزمي بيزيم ميللي ائنئرژيميزي دئژئنئراسيونا
اوغراتماقدادير (ایچینی بوشالتماقدادیر). بو باغلامدا گونئي
آذربايجان ميللي مسئله سيني توپلومسال بير حرکت کيمي اله آلماق
گرَکسينيمي (ائحتيياجي) اورتايا چيخير. توپلومسال حرکتلرين بعضي
اؤزلليکلری وار. اؤنجه بونو بليرتمک گره کير کي، توپلومسال حرکت
ايقتيدارلا ميلت ايرتيباطيندا اورتايا چيخيان بير فئنومئندير. بيز
ايران ميقياسيندا بونو چوخ تجروبه ائتميشيک. داها اؤنجه بئله بير
گؤروش حاکيم ایدی گونئي آذربايجاندا کي، ايران ميقياسيندا گئنيش
چاپلي و قاپساييجي حرکتلري تشکيل ائتمک و باشا چاتديرماقلا سوسيال
عدالت احتيياجيني برطرف ائده بيلريک. آنجاق بوتون بونلاردان بير
نتيجه آلينمادي و بيز هم ايقتيصادي، هم مدني، هم ده سياسي باخيمدان
يوخسوللوغا اوغراتيلديق، آلداتيلديق. آلداتيلديق، چونکو توپلومسال
حرکتلرين اونورقاسيني اولوشدوران ميللي مفکوره دن محروم ايديک. بو
ميللي مفکوره ني بيزه مودئرنيته و قلوباللاشما ارمغان ائتميشدير.
بيز"سوسيال عدالت"
کيمي آنلاييشلاري ميللي ذهنين و بيلگي نين ايشيغيندا آيدينليغا
قوووشدورماميشديق. ائله بير آيدينلانما سورجيني يئني باشلاميشيق.
توپلومسال حرکت او زامان اورتايا چيخير کي، بير تشکيلات و يا
سئچکين اينسانلار توپلومدا بعضي عونصورلري رئفورم يولو ايله
دَييشديرمک
و يا دئوريم يولو ايله تامامي ايله اورتادان قالديرماق ايسته
ييرلر. بيزيم ان بؤيوک سورونوموز(موشکولوموز) تاريخ بويو بو "بعضي
عونصورلر"
اولموشدور. بيز نه يي دييشديرمک و نه يي بوتونو ايله اورتادان
قالديرماق ايسته ييريک سوالينا بو گونه قدر يانليش جاوااب
وئرميشيک، یانلیش تشخیص ائتمیشیک و بو
يانليشليق بيزه چوخ باها باشا گلميشدير. ميللي کيمليگيميز گؤز آردي
ائديلميش و بير چوخ ائنئرژيلي گنجلريميز بو يولدا بوشونا جانلاريني
فدا ائتميشلر. فارس شووينیزمي نين ايسه حاکيمييتي بيزيم دوشونجه
ميزه، دويغولاريميزا و جوغرافيياميزا داوام ائتميشدير. توپلومسال
حرکتلر
بير ارَک (هدف) دوغرولتوسوندا باش قالديران آکسيوندور. بو آکسيون
ايستر غاليب، ايستر مغلوب اولسون سوسيال دَيَرلري و قوروملاري
دريندن ائتکيلر. اؤرنه يين م.ا. رسولزاده مغلوب ائديلدي، آنجاق
اونون سياسي فلسفه سي آذربايجان تاريخي نين باغرينا يازيلدي. و يا
بابک
قالاسينا يوروش انگللنميشدير، آنجاق عئيني گونده ميلتين عاغليندا و
دويغولاريندا بابک قالاسينا يوروش ايدئياسي ياشايير.
بيزيم ميللي ايچريکلي سوسيال حرکتيميز فارس ايقتيداري نين و بو مين
ايلليک تاريخين سورغولانماسي
ايله عئيني زاماندا دوشونجه حياتيني سوردورمکده دير. چونکو بورادا
يالنيز بير سوچلو يوخدور، تک فارس شووينيزمینی سوچلاماق یئترلی
دئییل. بيزي فارسلارا تسليم ائدن اؤز دَيَرلريميز ده
يارقيلانماقدادير. بيزيم جهالتيميز اوزَرينه
اینشاء ائدیلن بوگونکو
فارس شووینیزمینین مشروعيتيني ايکي اولقوسوال آلتينا آپارماقدادير:
1. مودئرنيزم. 2. گونئي آذربايجان اهاليسي نین
اویانان میللی ویجدانی.
گونئي آذربايجان ميللي حرکتي نين دونيادا تک موتفيقي وار، او دا
مودئرنيته دير. گونوموزده فارس شووينيزمی مرکزلي شيعه رئژيمي ایله
بيزيم حسابلاشماميز نئجه اولا بيلر؟ بير سيايسي دوزَن بئش بؤحرانلا
قارشيلاشديغيندا اورتادان قالخميش اولور. نه لردير بو بئش بؤحران
نؤوعو؟
1.مشروعيت
بؤحراني. يعني حاکيم دؤولت ايدئولوژیسی و دونيا گؤروشو توپلوم
طرفيندن قبول ائديلمير. دؤولتين رسمي دونيا گؤروشو اوزَرينه فرقلي
تفسيرلر اورتايا چيخير. فارس رئژيمي نين ايراني يالنيز فارسلاردان
عيار اوراق گؤرمه گؤرشو و گونئي
آذربايجاني کیملیک باخیمیندان باغيمسيز بير اولقو اولاراق قبول
ائتمه مه سي و یا اوست کیملیک اولاراق بَلیرله نن ایرانی کیملیک
ایچینده گونئی آذربایجانی آلت کیملیک کیمی گؤرمه سی بیزیم
آچیمیزدان شيددتله ردد ائديلير. رئژيمين ديني موقدساتا سيغنياراق
قازانديغي اعتيباري دا دريندن سارسيلميشدير. بو آرادا تاريخي،
فلسفي و ديني پلاندا رئژيمين مؤوجودلوغونو سوال آلتينا آپاران ان
اؤنملي شخصييتلردن بيري
سوروشدور. سوروشون اؤزلليکله سون يازيلاري فارس شووينيزمي نين ديني
اساسلاريني و دینی مشروعیتینی دريندن سوآل آلتینا آپاریر. صفويلردن
گونوموزه قدر بيزي فارسلارلا بير اينانج ايچينده توتان مؤوجود
اينانيش سوروش طرفيندن گئنيش فلسفي پلاندا سوروشدورمايا تابع
توتولموشدور.
بو
باخيمدان سوروشون اثرلري بيزيم ميللي حرکته ائنئرژي
قازانديرماقدادير. سوروش و ناصير پورپيرار اؤزلري ايسته مه سه لر
بئله، ايراندا ياشايان ميلتلرين ميللي موباريزه لرينه يارديمدا
بولونماقداديرلار.
2- قاتيليم بؤحراني. بيليرسينيز کي، رئژيم هر دفعه
فورمال دا اولاراق کئچيرديگي سئچکيلرده قاتيليم بؤحراني
ايله قارشيلاشير. گونئي آذربايجاندا اهالي نين سئچيملره
قاتيلماماسي بير رئژيم دَييشيکليگي اوزوندن دئييلدیر،
اولمامالیدیر. بير کيمليک اينشاسي دوغرولتوسوندا فارس شووينيزميني
ردد ائتمک آنلاميندادير. گونئي آذربايجان اهاليسي نين رئژيمين
سئچکي کومپانييالارينا قاتيلماماسي دؤولت طرفيندن چوخ انديشه ايله
قارشيلاشير. چونکو اؤرنه
يين
بو قاتيلماما فارسلارين قاتيلماماسي ايله عئيني دَيَرده دئييلدير.
3- تطبيقات و چؤزوم بؤحراني. بو، او آنلامدادير کي، رئژيم گؤز
اؤنونده بولونان بير چوخ ايقتيصادي،
ايجتيماعي
سورونلارين چؤزومونده چاره سيز قالير.
گونئي آذربايجانداکي ايقتيصادي بؤحرانا رئژيمين سئييرجي
قالماسي، آيريجا اولوسلاراراسي ائنئرژي خاصييتي داشييان بو
يوردلارين يئر آلتي، يئر اوستو زنگينليکلريني تالاماسي چوخ
دوشوندوروجو بير گئرچکليکدير. اولوسوموز گئت- گئده بو ايقتيصادي
سؤمورولمه نين بيلينجينه وارماقدادير.
4- کونترول بؤحراني. کونترول بؤحراني گئنيش آنلاملي بير
آنلاييشدير: 1. حاکيمييت ايچي ضيدييتلر اورتايا چيخير و رئژيم اؤز
ايچيندن بؤلونمه يه و قوطوبلشمه يه دوغرو گئدير. 2. رئژيم اؤز
موخاليفلري نين تشکيلاتلانمالاريني انگلله يه بيلمز دوروما گلير.
بونلار بير رئژيمين سوقوطونو ساغلايان بؤحرانلاردير. آنجاق نه
مشروعيت، نه قاتيليم، نه ده تطبیقات و چؤزوم بؤحراني بير رئژيمي
ييخابیلمز. بونلار رئژيمين وارليغينا تخريب ائديجي ضربه لر وورا
بيلرلر، آنجاق رئژيمي ييخاجاق ان جيدي بؤحران کونترول بؤحرانيدير.
سون ضربه
ني ووران کونترول بؤحرانيدير. بو گون گونئي آذربايجاندا ميللي
حرکتين موباريزه سيني رئژيم بوغاراق، اؤلدوره رک، زيندانا سالاراق
کونترول ائده بيلير. آنجاق زامانين آخيشي و گونئي آذربايجان
اهاليسي نين فيکرن، حيسسن و اؤرگوتلنمه اولاراق داها دا حاضيرليقلي
دوروما
گلمه سي و فارس شووينيزمينین دونيادا اينسان حاقلارينا سايقي
گؤسترمه ين دؤولت کيمي تانينماسي ايستر-ايستمز کونترول مشروعيتيني
ده درينله مه سي ايله مئيدانا چيخاراجاقدير. بوندان سونرا البتته
کي، گونئي آذربايجان ميللي حرکتي ده يئني بير ائوره يه کئچه جکدير.
شووینیزمین کونترول بؤحرانی دا اورتایا چیخدیغی زامان بیزیم سؤیله
ملریمیز دَییشه جکدیر.
گونئي آذربايجاندا نوفوس آرتيشي و شهرلشمه حياتي اولوسال بيلينجين
گليشمه سينه تاثير گؤسترن ائتکنلردن بيريدير. اينسانلار شهر حيات
سيستئمينده ماددي حياتي کشف ائديرلر. مالدارليق و تاريم کيمي
ايقتيصادي سيستئمده ماددي حيات آيرينتيلي شکيلده کشف اولونمور.
ماددي
حياتين کشفي بير شهر اولقوسودور و تيجارتله، صنايعلشمه و شهر
کولتورو ايله باغلانتيليدير. شهرلرده صينيفلرين اورتايا چيخيشي و
اهالي نين آرتيشي دونياداکي حاديثه لره کوللئکتيو موناسيبتلرين
فورماسيني و مضمونونو دَييشديرير. داها اؤنجه کي
دؤنملرده ان چوخ تبريز بؤيوک اولايلارين مرکزي اولوردو.
آنجاق آرتيق گونئي آذربايجانين بير نئچه شهري کئيفييت اوغرونا
موباريزه آپاراجاق کمييته يوکسلميشدير. کند و کؤچري حياتدا بو
فورصتلر مؤوجود اولمور. اسکي حرکتلريميزين مغلوبييتلری
شهر حياتي نين چوخ ضعيف اولماسي و شهر اهاليسي نين آز اولماسيندان
دا قايناقلانمیش اولا بيلر. شهر حيات سيستئمينده اؤزلليکله
پرولتاریا (فعله) صينيفي نين ميللي موباريزه يه قاتيلماسي چوخ
اؤنمليدير. ميللي ايقتيصادييات و سوسيال عدالتدن يانا اولان ميللي
موباريزه نين اوغورو بو گئنيش طبقه ني اؤز ايچينه آلماسي ايله
کسينلشه
بيلر.
آنجاق
بوتون صينيفلري ايچينه آلا بيله جک بير حرکتين گئنيش فلسفي، ادبي،
سياسي قايناقلاري اولماليدير کي، بو گون بيزده ان جيدي عکسيکليک
اولاراق گؤزه چارپماقدادير. 1905- جي ايلده لئنين دئييردي:
"سوسياليست اينقيلابي گئرچکلشديرمک اوچون ادبيياتيميز يئتره لي
دئييلدير."
چئرنيشئفيسکي کيمي سوسياليستلرين و اؤزلليکله ماکسيم قورکي کيمي
يازارلارين ميلتی
حرکته گتيرمک اوچون چوخ تاثيرلري اولدو. بو گون بيزيم توپلوموموز
اوچون ده بو ساحه ده کي
محرومييت اؤزونو آچيقجا گؤسترير. هر شئي سيياستله
آنلاديلماز. گونئي آذربايجانين اؤز ايچيندن فيشقيران بؤيوک درام
اثرلري، گئنيش ميقياسلي بيلگي بيريکيمي، یئنی موسیقی اثرلری
گرکمکده دير. البتته کي، بو اولايلار مدني پلاندا گئرچکلشرکن،
سياسي پلاندا دا خيالي رئاليزمله گئرچک رئاليزمين سينيرلاريني بللي
ائتمک گرَکه
جکدير. بو آچيدان توپلومون روحونا خيطاب ائدن سؤيله ملرله ديش
دونيايا خيطاب ائدن سؤيله ملرين مضمونو اوزَرينه درين- درين
دوشونمک لازيمدير. بير توپلومون ايچ ياشامي نين دَييشمه سي، الده
ائتديگي بيلگيلر و بو بيلگيلرين داورانيشلارا يانسيماسي ايله
مومکون اولور. بو گونه قدر تاريخيميزده اينشا ائديلن بيلگيلرين
بيزدن داها چوخ فارسلارا فايدا ساغلاديغينا تانيق اولماقداييق.
اؤزلليکله ده بو بيلگي بيريکيمينین فارس ديلينده گئرچکلشمه سي بير
شکيلده ميلت اولاراق بئينيميزي فارس اسارتينه سوخموشدور. بو اوزدن
بو دَيرلرين
يئنيدن دَيَرلنديريلمه سي و گؤزدن کئچيريلمه سي گره کير. مين ايلدن
آرتيق
زامان آخيشي ايچينده اورتايا قويولان بيلگيلر و اينانيش شکليميز
بيزي فارسلارلا بير يئرده ياشاماغا زورلاميشدير. مودئرن دونيا و
اونون بيلگيلري بو تاريخه " دور!"
دئمکده دير. آنجاق مودئرنيته نين بيلگيلريني گونئيده
يانسيتاجاق اثرلر لازيمدير. بير سؤزله بيلگيلريميزين چاغداش
آنلامدا کيتابلاشماسي ضروريدير. بو ايستک گئرچکلشرسه
اينسانلاريميزين بئيني و دونيايا باخيشي کئچميشين اسارت دوغوران
چوروک دَيَرلريندن قورتولموش اولور. حياتيميزدا ائتکين اولان پاراديقمالارين
يئريني يئني پاراديقمالار آلماليدير. ايرانداکي ايقتيصادي چتينليک،
ميلتين يوخسول ياشاماسي اينقيلابي حرکت اوچون تکان وئره بيلر.
لاکين بو تکان دوشونجه موحيطي يارادا بيلمز، ميللي کادرلار و ليدئر
يئتيشديره بيلمز.
دوشونجه تک باشينا ميللي ايراده نين گئرچکلشمه سينه سبب اولا
بيلمز. ميللي ايراده زورلا و پولاد ايراده ايله گئرچکلشير.
آلمانييانين بوتونلوگونو آرزو ائدن هئگئل دئييردي: "آلمانييا اؤلکه
دئييلدير. بير اينسان توپلولوغو اؤز اراضي بوتؤولوگونو بيرليکده
ساووندوغو زامان اؤلکه يه صاحيب اولور. آلمانييانين بيرلشمه سي هئچ
بير زامان دوشونجه نين محصولو اولماياجاق. آلمانييا زورلا و
قطعييتين حسابينا بيرلشه جک. آلمان خالق کوتله سي فاتئح بير ايراده
نين تطبیقاتي نتيجه سينده ميلته دؤنوشه جک، آلمانييا اؤلکه
اولاجاقدير"*
گونئي آذربايجان ميللي حرکتي اؤز ائوريم (تکامول) ائوره لري (مرحله
لری) ايچينده البتته کي، اؤز بيسمارکيني و يا آتاتورکونو
يئتيشديرمه ليدير. بوتون بوچاليشمالار او ميللي فاتئحين اوردونون
ايچيندن اورتايا چيخماسي اوچون حاضيرليقدير.
26.06.08
|
||