|
آرشيو ا
ادبيات ا
اوشاق ا
قادين
ا
رئداكتوردان
|
گونتاي گنجالپ
داروينيست موسلمانلار
داروين اؤزو ديندن
علمه
گلميشدي. اؤنجه دين کولتورو ايچينده بؤيوموش و بو يولدا گليشمک
ايسته ميشدي. آنجاق کئشيشليکدن علمه اوز توتدو و اونون علمی نظرييه
سی ايله
بيليم دونياسيندا چوخ بؤيوک يئنيليکلر اورتايا چيخدي. داروي نين ان
اونلو و بؤيوک کيتابي "نؤوعلرين کؤکه ني" اولاراق بيلينمکده دير.
داروين بير چوخ آراشديرمالارا داياناراق ائوريم (تکامول) نظرييه
سيني اورتايا قويدو. داروينين آراشديرمالاري بيوائوريم (تکامل
زیستی) اوزَرينه دايانماقدا ايدي. بو آراشديرمالار گئرچکدن ده
اينسانلارين ذهنينده و علمده دئوريم ياراتدي. داروينين
آراشديرمالاريني داها سونرا لئنينيستلر و آتئيستلر منيمسه ديکلري
اوچون اونا بؤيوک ضربه ووردولار. اصلینده ايسه داروين ائوريم
سيرلريني چؤزمه يه يؤنه ليک بير آراشديرما باشلاتميشدي. آنجاق داها
سونرا بسيط ايدئولوژیلر دارويني علم دونياسيندان اوزاقلاشديرماغا
باشلاديلار. سانکي داروين آتئيستلرين ايدئولوقو ايميش کيمي بير
پروپاقاندا ائديلدي.
ايسلام
عالمي ايسه هر زامان اولدوغو کيمي هئچ بير نظرييه اورتايا
قويماييب، اورتايا آتيلان نظرييه لرله ساواشديغي کيمي، يئنه ده
دارويني آنلامادان، حتّی اوخومادان اونون تانري دوشمني اولدوغونو
ساووندولار. کيتابلاري نين اوخونماسيني موسلمانلارا ياساقلاديلار.
بير چوخ ايسلام اؤلکه سينده داروينين کيتابيني اوخوماق سوچ
ساييلير، اوخوجو داروينيست آدي ايله توتوقلانير. تورکييه
جومهورييتي دئموکراتيک بير اؤلکه اولسا دا تاريخيندن گلن ديني
دورتولر (تحريکلر) اونون توپلومسال پلاندا سئکولارلاشماسينا،
دئموکراتيکلشمه سينه مانع
اولور. هر
دفعه ديني
خورافاتدان خوشلانان خالق کوتله سي دينچيلري ايقتيدارا گتيرير و
سونرا دا اوردو و يا آناياسال قوروملار طرفيندن بو حؤکومتلر
دوشورولور. بئله آنلاشيلير کي، دينچي خالقين ترجيحي هئچ بير زامان
دوغرو اولمور و گئرچکدن ائله دير. تورکييه ده دئموکراسي ميللت
ايراده سينه دئييل، سيلاح گوجونه و اوردويا دايانديغي اوچون ايسلام
اؤلکه لرينده ان ياشانيلير اؤلکه اورادير. بو اوزدن ده غربين
دوشونجه لرينين و بيليم آداملاري اثرلري نين ترجومه سينه ايمکان
وار. تورکييه ده کي
دينچيلرده سربستدیر و بو سربستليکلريندن فايدالانيب علمه قارشي هر
تورلو بؤهتانلار آتيرلار. اؤرنه يين فتح الله گولن ده ايران
موللالاري کيمي ياغيشين ياغماماسيني اينسانلارين سوچلو اولدوغو
ايله ايلگيلنديردي. ايقليمده کي
دَييشيکليک اونلار اوچون بوش بير شئي. او زامان آداما
سورارلار: اسکانديناوييا اؤلکه لرينده بو
قدر ياغيشين
ياغماسي اونلارين سوچسوز اولماسي سببي ايله مي؟ يا دا عومومييتله
آوروپادا و هينديستاندا. تورکييه ده کي دينچيلرده، ديگر ايسلام
اؤلکه لري نين فاناتيکلري کيمي آرديجيل اولاراق علمين داروينيزمي
اينکار ائتديگيني و ائوريم نظرييه سي نين ايبطال
ائديلديگيني يازيرلار.
دارويني
اوخومايان دينچي آدام ايسه بو تبليغاتا اينانير. چونکو دينچي کسيمه
دوشوندورن بيلگي لازيم اولماز، اينانديران بيلگي لازيم اولار.
آنجاق
داروينه قارشي ايسلام دونياسيندا نه قدر بيليمسل اولمايان
بؤهتانلار آتيلسا دا ايشين ايلگينج ياني بعضي موسلمان بيليم
آداملاري نين ايسلامي، داروينيست بير بوجاقدان باخاراق تحلیل ائتمه
لریدیر. بونلار ظولمتده پارلايان
ضعيف
اولدوزلار کيمي گؤرونورلر. بو بؤيوک
بيليم
آداماريندان بيري ايران وطنداشي اولموش و تئهراندا وفات ائتميش
يدالله سحابيدير.
يدالله سحابي نين
ايسلام اوزَرينه ايکي اؤنملي کيتابي وار. بو کيتابلاردان بيري نين
آدي "اينسانين ياراديليشي"
و ديگري ايسه، " قورآن و ائوريم(تکامول)" آدلانير. بو
کيتابلاردا يدالله سحابي ايسلام دونسينا ليشلماميش بير
مئتودلا دين اوزَرينه يوزوم گتيرير. يازار بيولوژي منطيقله دَييشيم
و ترانسفورماسيونلاري آراشديرير و داروينيست بير ياناشما ايله
توپلومسال، تاريخي، ديني کيمليکلر اوزرينه ياناشير.
يدالله سحابي اؤز
کيتابلاريندا "
اينسان " و
" آدم "
قاوراملاريني بير- بيريندن آييرير. قوران آيه لريندن ده اؤرنکلر
گتيره رک بو ايکي قاورامين تماما فرقلي ائوريم دؤنملرينه
عآيد
اولدوغونو ساوونور. قوراندا "آدم"ين " طين"دن، بيشميش گيلدن
ياراديلديغي
وورغولانير.
يئنه ده سحابييه گؤره قوران "آدم"
و "اينسان"
آراسيندا فرق گؤرمکده دير. "آدم" پئيقمبر اولموش، آنجاق اينسانلار
"آدم"دن داها اؤنجه، اوزون زامان يئر اوزونده ياشاميشلار. داها
دوغروسو "آدم" ايلک اينسان دئييلدير. "آدم""
اينسان"ين اوزون زامان ائوريمي (تکامولو) نتيجه سينده يئتيشميشدير.
"آدم"دن داها اؤنجه "اينسان" اولاراق ياشانلار و داها سونرا "آدم"ه
دؤنوشنلر " هئموساپين" لر اولموشلار. ايراندا بير چوخ دين
بيلگينلري قوراندان آيه لر گتيره رک يدالله سحابي نين بو منطيقيني
ساوونموشلار. يدالله سحابي ياراديليشلا باغلي افسانه يه (fiction)
قارشي تدريجي دَييشيمي
(transformation) قويور. عاليم اؤز گؤروشلريني ساوونماق اوچون
قوراندان آيه لر ده گتيرير. اعراف
سوره سي نين 11-جي آيه سينده دئييلير: "سيزي ياراتديق و
سونرا صورت
وئرديک و
ملکلره دئديک سجده ائتسينلر." يدالله سحابييه گؤره بوراداکي بو
سونرا ياراديليش تاريخيني ايکي مرحله يه آييرير.
بيرينجي مرحله ده جانلي وارليق اولاراق "اينسان"ين ياراديلماسي،
ايکينجي مرحله ده ايسه، يعني سونرا بو اينسانين
ائوريم نتيجه سينده شعور
قازانمسي و
"آدم"ه چئوريلمه سي. يعني تانري نين ياراتديغي اينساندير، آدم
دئييلدير.
بورداکي پئيقمبرلیک آنلايييشي گونومومزده کی معناني داشیماز. چونکو
بو آنلامدا پئيقمبرلیک اینسانین اوزون تکامول پروسئسی نتيجه سينده
آدمه دؤنوشمه سيدير.
آدم ائوريم (تکامول)
نتيجه سينده اورتايا چيخميشدير. يعني اينسان طبيعتله اوز-اوزه
گلرک، يئر کوره سيني تانيياراق، ائورَنه باخاراق
" شعور
" صاحيبي اولموش و
آدمه دؤنوشموشدور.
سحابييه
گؤره، بوراداکي "
سونرا " چوخ
اوزون تاريخي تکامولون گؤستريجيسيدير. آنجاق بو تکامولون نه قدر
زامان ايچريسينده گئرچکلشميش اولدوغو بللي دئييل و علمين گؤروي
بونو بللي ائتمکدن عيبارتدير. آنلاشيلديغي کيمي ايلک گوندن شعورلو
بير وارليق ياراديلماميشدير، بو شعورلو وارليق تکامولون و طبيعته
اويغونلوغون سونوجوندا وار اولموشدور. قوراندا قئيد ائديلن سجده
" اينسان"ا دئييلدير، "آدم" اوچوندور. تکامول نتيجه سينده
ان اويغون و ياراديجي ششکلينه وارميش و "آدم"لشميش اينسانا ملکلر
سجده ائدير. يدالله سحابي بو گؤروشونو، يعني تکامول نظرييه سيني
ايثباتلاماق اوچون سادجه بير قوران آيه سي ايله يئتينمير. آل عمران
سوره سي نين 59- جو آيه سيني ده اؤرنک اولاراق گتيرير. بو آيه ده
دئييلير: "عیسي مسئله سي تانري يانيندا آدمين تورپاقدان
ياراديلماسي کيميدير. اونا دئدي: "اول" او دا اولدو." عيسي نئجه
يارانميشدير؟ عيسادان اؤنجه اينسان وار مي ايدي؟ آنجاق عيسانين
ياراديليشي فرقلي شکيلده اولموشدور. يعني نئجه کي، عيسادان اؤنجه
اينسان وار ايدي، آدمدن اؤنجه ده اينسان مؤوجود اولموش.
يدالله سحابي نين بو
داروينچي ياناشماسي البتته کي، بير چوخ دينچيلر طرفيندن ردد
ائديلميشدير. او زامان قورآننين ائوريمله باغلي اولان آيه لريني
نئجه تحليل
ائتمک لازيمدير. تاريخ بويو سياسي ايقتيداري الينده توتان دينچيلر
بو آيه لرين اوزَرينه
گئنيش آناليز گتيرمگي ياساقلاميشلار.
15.06.08
|
 |
|