|
|
|
|
محمد قاضی نین خاطره سی اوره کلریمیزده یاشایاجاقدیر! تبریزدن آلینان آجی خبر
تبریزدن آلینان خبره گؤره، گؤزل انسان، وفالی دوست، عدالت و آزادلیق عاشقی، تواضعکار یازیچی و شاعر محمد قاضی ممقانی جمعه گونو ( تیر آیی نین 15 ی) گوزله نیلمز بیر سانحه نتیجه سینده دنیادن گئتدی. یوخسول عائله ده بویا باشا چاتان محمد قاضی عمرونون جاوان یاشلاریندان برابرلیک، آزادلیق و انسانیته کؤنول وئره ن؛ استثمار، استبداد و حق سیزلیک لیگه قارشی مبارزه ائدن اینجی لردن ایدی. صمد بهرنگی نین معلم اولدوغو ماماغاندا یاشا دولان ممد، تبریز محیطی نین 50- نجی ایللرده یئتیردیگی گؤزل سیمالاردان بیری ایدی. او حیاتی بویو اوخویوب اویره نمکدن دایانمادی. ممد قوینوندا یاشادیغی آذربایجان خلقینین ملی وارلیغینین قایغی کشلریندن اولموش و اونون دموکراتیک انکشافی اوغروندا قلم چالانلاردان بیری ایدی. اونودولماز یولداشیمیز محمد قاضی نین وفاتی، بیز ائلیندن- اوباسیندان، سئوگیلی تبریزیندن اوزاقلاردا یاشاماقا مجبور اولان مسلکداش و یولداشلارینی دا اولدوقجا تاثرلندیردی. 20 ایلدن آرتیق محمد قاضی نی گؤر مک امکانیمیز اولماسادا، اونون انسانلیغی و خلقینه صداقتی بیزی هر زامان سئویندیریب، روحلاندیرمیشدیر. بو آغیر ایتگی مناسبتی ایله اونون عائله عضولری، دوستلاری و مسلکداشلارینا باش ساغلیغی دئیریک. ساده، ادعاسیز، انسان سئوه ر و عدالت پرست ممدین گؤزل خاطره سی بیزیمله دی. او بیزیم اوره کلریمیزده یاشایاجاقدیر.
یولداشلاری: سیروس مددی- احد واحدی- محمدعلی حسینی آلمان- کؤلن شهری شنبه 16 تیر 86
|
||
|
|
|
Materiallardan istifadə zamanı qaynağa istinad
vacibdir |