کيم افشار سليماني دگيل؟
"ايراندا ياشايان آذربايجانليلارين آذربايجان مکتب لري آچماق آرزوسو يوخدور" بو سؤزلري ايرانين آذربايجاندا کي سفيري افشار سليماني مطبوعات کنفرانسيندا بيان ائديبدير. بئله بيانات بيرينجي دفعه دگيل کي سسلنير. بونا اوخشار سؤزلري باشقا آذربايجانلي دؤولت آداملارينداندا ائشيدميشيک. رهبرين اؤزو تورک اولاراق باشقا فيکيري وارمي؟
هر دفعه بئله سؤزلري ائشيدنده من اورکدن ناراحت اولوب و بو اينسانلارا ان پيس گونلر آرزولاييرام. سونرا اؤزومو ساکيت ائده ره ک آرزو ائديرم کي بئله سؤزلرين حقيقتي اولماسين.
سؤز گله سي دييريک کي بيز اوتوز ميليونلوق بير ميللتيک؛ اگر بو ميللتين اوندا بيريسي ده اؤز ديللريني ايسته سيديلر، اوندا دونيانين ان گوجلو اوردوسودا بو ايستين قاباغيني آلا بيلمزدي.
عادي ميللتدن غير عادي ايستکلري اونماق اولماز؛ نيه کي بو عادي ميللت هله ميللتلشمه ييبدير. ميللتي جوره به جوره معنا ائده بيلريک؛ آنجاق ميللتلشمه اوچون بير ميللت اؤزوم-اؤزگه ائله مه ليدير. بيز تورکلره گلنده اؤز-اؤزگه تانيميريق. پهلوانلاريميز چوخ اولوبدور، آنجاق قهرمانلاريميز آز اولوبدور. يوزلر تاريخي فاکتلارا ايشاره ائتمک اولار کي آذربايجانلي تورک ضيياليسي و يا حکومت آدامي اؤز الي ايله اؤز منافعه سينه يادچيليق ائديبدير. مقايسه ده سيز باخينيز آوروپالي دؤولتلرين جنوب شرق آسيادا باش وئرن زلزله موقعلرينه. هر دؤولت بيرينجي نؤبه ده اؤز وطنداشلارينين فيکيرينده دير؛ خاطير خالا قالماسين بئش اون قيراندا زلزله ده ويران اولان شهرلره يارديم ائديرلر. حتتا ميليونلار دولار خرج ائتمکله اؤلولريني آختاريللار.
اينسان او زامان پهلوان آدلانار کي زورو چوخ اولسون. قهرمان او اينساندير کي جيسمن، ساواددان ضعيف اولسادا عاغلين ايشه ساليب عاغيللي اينسانلار ايله مشورت ائدر! بونا پارلاق نمونه مشروطه اينقلابينين قهرماني ستارخاندير: سؤز حيدرخانين دير!
شبهه سيزآذربايجانليلارين قورتولوشو اونلارين اؤز الي ايله رقم وورولماليدير. قونشو يا اميدي اولان شامسيز قالار. شيخ محمد خياباني دئميشکن: "اؤز ترقي سينه علاقه سيز ميللت هلاکته محکومدور!" اولا بيلسين کي بو گون ارتجانين قلينجي ايتي گورونوب اميد يوللاري گؤزه چاتماسين؛ آنجاق صمد دئميشکه هر ايشيق نه قدر ضعيف اولسادا يئنه بير ايشيقدير.
سون ايللرده بيز دورنا درگيسينده بير شعارا چوخ تاکيد ائتميشيک: "ائلينه ديلينه يانمايان بير کس، توتاق کي سلطاندي خاندي نه فايدا."
آذربايجان آدينا گروپ و پارتييا ياراديب، آنجاق آنا ديليني ايکينجي ديل ساييب تحميلي ديله قوللوق ائتمک نه فايدا!
آذربايجان آدينا ايللر بويو کانون يارادانلار آنا ديللرينده بير اثر يارادا بيلمه سه لر نه فايدا.
قوياق کي فلان کيمسه ائله وزنه برداردير کي 18 تايارلي تريلي ني گؤيه قووزايير؛ آنجاق بئله پهلوان ديلينين ياساق اولماسينا اعتراض ائتمه سه نه فايدا!
قوياق کي فلان کيمسه فوتبال اويونلاريندا ويتناما، کامبوجا، بحرينه 100 گل ووروبدور انجاق بئله فوتبالچي ديلينين ياساق اولماسينا اعتراض ائتمه سه نه فايدا!
نه گؤزلدير بارماق ساييسي حجت الاسلاملارين ملي حرکتيميزه قوشولمالاري. هر بئله بير ماللانين ديرناغي مين پهلوانا دگير!
سياسي قدرتده ايشتراک ائتمه يوللاريني آختارماق ايله برابر بو گون آنا ديليميزده يازيب پوزمالييق. قوي داهي ائشيتميره ک کي فلان يازاريميز اؤلومدن نئچه گون اؤنجه آنا ديلينده يازماماسيندان روحي عذاب چکيردي!
ميرزه خزر دئميشکن: "ايراندا ياشايان 30 ميليونا ياخين آذربايجانلينين اؤز آنا ديلينده تحصيل آلماغا حوقوقو وار. ايراندا ياشايان 30 ميليون آذربايجانلينين اؤز اراضيلرينده ايش ايله تامين اولماغا احتياجي وار. و ايراندا ياشايان 30 ميليون آذربايجانلينين 6 نوع ايستقلاچيلار، 4 نوع فدرالچيلار و 3 نوع ايرانچيلار و يا خود آيري آيري شخصيتلر آراسيندا تورکون سؤزو اولماسين سربست سئچيم ائتمه يه حاققي واردير. آنجاق يادلارينا بير شئي سالماق ايستيريک کي آنا ديلينده مکتبي اولمايان خالقا اولجه ايستقلال يوخ بلکه مکتب لازيمدي!"
ميرزه خزرين سون جمله سي هئچ زامان مني راضي سالا بيلمه دي تا بير گون کي فلسطين ملتينين معاصر تاريخينه باخارکن ميللتلشمه ده ديلين رولونو و اؤنميني آنلاديم. بيلديينيز کيمي سون 50-40 ايلده اسراييل باشارديقجان فلسطينليلري يئنجيبدير؛ آنجاق فلسطينليلرين ديل ايستيني نظره آلاراق، بين الخالق فيشاري آلتيندا اسراييل قبول ائتميشدي کي ايشقال اولونموش منطقه لرده مکتبلر عربجه اولسون. بو عرب ديللي مکتبلرين واحد نتيجه سي مايوس و داغيلميش ميللتده ميللي روحيه ياراتماق ايدي. بير ميللي روحيه کي ياخين گلجکده باريني وئره جکدير!
سياستده ديلين اؤنملي رول اويناماسيني ايران اقتداريدا ياخجي آنلاييبدير. اونا گؤره ده مين بير باهانا ايله آذربايجان ديلينده کلاسلارين يارانماسينين قاباغيني آلير. تبريزده مين زحمت ايله يارانميش تورک ديللي کلاسلارينين هاميسي سون بير ايلين عرضينده قاپالانيبدير.
سون سؤز
هر بير آذربايجانلي فرد و يا قروپ کي ادعا ائدير افشار سليمانينين روحو اونلاري قبضه ائتمه ييبدير اونو عملده گؤرستمه ليدير. يعني ان آزي تحميلي ديل ايله خداحافظ لشيب، آنا ديليني تبليغ ائتمک ايله برابر آنا ديليميزده يازيب پوزماق ايله ايران اقتداريني و اونا باغلي اولان افشار سليماني تکين مانقورتلاري عملده افشا ائتمه ليدير!
داود ائلدنيز
1 yanvar 2005