گونی آذربايجان گروهلاری
و
تئوری، پلان و پروگرام يوخسولوقو
هر پارتی و يا بير گروه اگر بو گون دونيادا دوزگون و آيدين پروگرام و پلانی اولماسا اونون آرادان گئتمه سی حمتی و بليدير و آذربايجان گروهلاريدا بو مساله دن کنارا دئيللر. کئچن ايلرده ن بری ديشاريدا و ايچريده چوخلو آذربايجان اوغروندا چاليشان پارتی و گروهلار تشکيل تاپييب و آذربايجان يولوندا چاليشماقا باشلايبلار و بونلارين تشکيل تاپمالاری اوزلوقوندا بير اوغور سانيلسادا، ولی بو گروهلار هله يولون باشلانيشنداديرلار و لازيمدير کی چوخلو مسائلری و مشکلاتی حل ائتسينلر تا بير حرفه ای گروه و پارتييا چئوريلسينلر.
ايلک باخيشدا بو گروهلاردا تئوری يوخسولوقو گوزه چارپير و چوخلاريدا هله بيلمير کی نه ايستير و نجور ايستير؟ آنجاق آخشام ياتيب سحر دورور ايستيقلال بايراغين قالديرير! بونلارين بوجور برنامه سيز و زمانه ني و اتموسفئری ياخشی و آيدين شکيلده درک اتمه مکلری بيزی ايچريده سارسيلدير و يوخ گوجوده بيزدن آليرلار و بيزده ن حمله فورصتين آليرلار. نييه کی پان آريانيستی گروهلار و بو تفکر صاحيب اولان تورکلر و آذربايجانليلاردا بو فورصتدن ايستفاده ائديب و بيزيیم اليميزده اولان آغاجی آليب و بيزيم باشيميزا وورورلار. بجای اينکه بيز اونلاری متهم ائده ک اونلار بيزی تجزيه طلب ليگه متهم ائديرلر و آذربايجان گروهلارينيندا پروگراملارين بيزه اورنک اوچون ميثال وورورلار. و ايچريده سياسی فعاليتين هزينه سين يوخاری آپاريرلار و بئله فيکير ائديرلر کی بيز کی ايچريده فدراليسم و برابرليک(فرهنگی، زبانی، سياسی، ايقتصادی...) دن ديفاع ائديريک قورخوروق و اوزلرين شوجاعتلی و قورخماز آداملار گوستريرلر. لازيمدير کی دييه م بو گون شوجاعت يعنی سياست و سياست ده یعنی رئال اولماق و مومکون ايشلری گورمک و زمانه نی دوزگون شکيلده درک ائتمه ک. يئکه داش گوتورمه گين معناسی وورماماقدير. و پان آريانيستلرده بو گروهلاردان اصلا و ابدا قورخمورلار نييه کی بيلرلر بيزده بو ايشه ايندی گوج يوخدور و منطقه و بين المللی وضعييتی ده بو ايشه يول وئرمز و فقط پان آريائی و فاشيستی گروهلارين الينه بهانه وئرمکدير. لازيمدير بير ميثالينان بو مساله نی آيدينلادام : چوخلو پان فارسيست گروهلار اوز پلاتفورمولاريندا ايران دا ياشايان ميلتلره حق تعيين سرنوشت(اوز مقدراتلارين اوز اللرينن تعيين اتمک) تا آيرلماغادا گتيريبلر ولی بو گروهلار او زامان کی فدراليسمين آدين ائشيديرلر اوزلرين ايتيريب و فدرال ايستيينلری ضد ايرانی و ضد ميلی آدلانديرلارنييه؟ نييه بو گروهلار ايرانين فدرال اولماغيندان بئله قورخورلار؟ فدرال مساله سی اونلارين عوامفربليگين و پلاتفورمالارينين يالان اولماسين آشکار ائديب و اونلار بوندان سونرا ايران ميتللرين آلدادا بيلمزلر و هميده فدرال مساله سی بيزی ايچريده و ديشاريده و بين المللی وضعيتده گوجلنديريرو بيز هر يئرده فدراليزمدن دفاع ائده بيلريک اودور کی ايران اصلاح طلبلری و فارس گروهلاری فدراليزميدن قوخورلار. من بوردا ايتستقلالی رد ائتميرم و اونو ايستينلره قارشی دئيلم ولی رئال اولماق و زمانه نی و بين المللی وضعيتی درک ائتسه ک بو مساله نی ايندی قاباغا چکمه ريک. هر ايشين يئری و واقتی واردير!
آذربايجان گروهلاری اوز تکليفلرين چوخ مساله لرينن آيدين شکيلده و جزئی صورتده بللی ائتمييبلر مثال اوچون ايچريده اولان گروهلارين بيرينين آدين چکملييم کی اوزلرين "روشنفکر" آدلانديريبلار(طيف شمس تبريز). روشنفکر گروهلار دونيادا معمولا قدرته چاتماغا چاليشمازلار بلکه جامعه ده اولان مشکوللری آراشديرارلار. ولی هله بو گروه اوز تکليفين چوخ مساله لرينن مشخص ائتمييبلر مثلا نظرلری قادين حاقلاری( ديه برابرليگی، ارث برابرليگی، جنسی لذتلر برابرليگی، قيزليق و بکارت مساله سی، حئجاب مساله سی...) باره سينده ندير؟ نييه بو مساله لری آراشديرميرلار ؟ و هميده اوز تکليفلر دين، دولت، قدرت، حکومت باره سينده ده مشخص ائتمييبلر و بونلارکی اوزلرين "طيف روشنفکر" آدلانديرلار نييه اوز نظرلرين هئموسئکشوعاليزم باره سينده، زنا باره سينده، اعدام، رجم(سنگسار)... آيدين صورتده بيان ائتميرلر؟ روشنفکر گرک بو مسائلری آراشديريب و اوز نظرين اگر ده دولتينين مخالف ده اولسا بيان ائتسين ولی شمس تبريز گروهو ساده ايشلره اوزون مشغول ائديب و اوزونده روشنفکر آدلانديرير!
آذربايجان گروهلاری دموکراسی باره سينده هله ده کلی دانشيرلار و ايقتصاد باره سينده کی اصلا دانيشميرلار و هيچ برنامه لرينده بو مورده نظرلری يوخدور. آيا ايقتصاد بازار ايستيرلر يا سوسياليستی ايقتصادا اعتقادلاری واردير؟ و اجتماعی مشکلاتين باره سينده کی بيز آذربايجان گروهلاريندان بير برنامه اينديه جان گورمه ميشيک. بونلارين برنامه لری اعتياد، فحشا... باره سينده ندير؟ بو گروهلار نييه بو باره لرده هئچ طرح و برنامه بری يوخدور؟ بير پلات فورم يازماغينان و کلی صورتده مشکلاتدان دانيشماغينان اونلار حل اولالار؟
"گاموح" کی ادعا ائدير 24 تمثيلچيسی واردير و چوخلو عضوو واردير نييه سايديغيم مشکلاتين باره سينده هئچ بير آراشديرمالاری يوخدور؟ گاموح کی اوزون بير سياسی گروه آدلاندير آيا آذربايجان دشمنلرينين باره سينده کاميل اطلاعاتی واردير مثلا گاموح ون بير کادری واردير کی "کوردشناس" اولسون و کوردی ديلی باجارسين و اونلارين پارتيلارين تانيسين؟ و يا "ائرمنی شناس" اولسون جامعه سين و ديلين و دياسپوراسين و ايقتيصادين تانيسين؟ گاموح او زامان اوز هدفلرينه چاتا بيلر کی بو 24 تمثيلچيسی هره سی بير موضوعو و بير کشور باره سينده ايش بولن(کارشناس) اولسونلار. مثلا بيزيم دشمنلريميز باره سينده کاميل اطلاعاتلاری اولسون. روسيه، چين، ائرمنستان، فارس تشکيلاتلاری، عرب اولکه لری، کورد، اروپا... باره سينده کارشناسی اولسون. و گاموح لازيمدير کی بير گوجلو آراشديرما مرکزی قورسون.
و يا فدرال – دموکرات تشکيلاتی لازيمدير کی جزيی صورتده آذربايجان و ايران مسائل و مشکلاتی باره سينده اوز نظرين بيلديرسين و کلی صورتده دانيشماق و بيانيه وئرمک هئچ مشکلی حل ائتمز. و اگر بو تشکيلات ايسته سه گوجلو شکيلده آذربايجاندا حضورو اولا لازيمدير کی بير وب سايت و راديوسو اولسون(راديو فردا و بی.بی.سی کيمی) نييه کی بيزيم ميلتيميز قديمدن راديو خبرلرينه چوخ اعتمادلاری واردير و چوبانيميز و فرش توخونويانيميزدا، راننده ميز... راحاتجاسينا راديو برنامه سينه ايشين گوره گوره قولاق آسا بيلر. هميده بونلاردا گره ک بير آراشديرما مرکزی قورسونلار نييه کی بو گون دونيانين سياستلری و برنامه لری بو آراشديرما مرکزلرينده عمله گليرلر جمهوری اسلامی ده مينلر آراشديرما مرکزينده ن فايدالانير و اوز سياستلرين قاباغا آپارير ولی گونئی آذربايجانين بير دوزگون آراشديرما مرکزی يوخدور. ايراندا مينلر آرشديرما مرکزی دولته اقوام و ميلتللری اريتمک اوچون يول گوسترير مثلا( مرکز مطالعات ملی، مرکز ايران شناسی، مرکز مطالعات خاورميانه، مرکز مطالعات رياست جمهوری...). و هميده آمريکا دولتينين سياستلری آراشديرما مرکزلرينده طرح اولار و اوندان سونرا عميلاتی اولار.
آرشديرما مرکزی قورماقدا فقط "آذبيلتوپ" چوخ موفق عمل ائديب و "آبتام" اينديه جان نئچه گوزه ل و اوزه ل سايی ياييب و چوخلو مسائلري تئوريزه ائديب مثلا فدراليزم باره سينده، عراق ساواشی باره سينده....
اوميد کی آذربايجان گروهلاری گله جده آذربايجان مسائل باره سينده آيدين شکيلده اوز برنامه لرين ميلته تقديم ائتسينلر تا بحث اولونسون و ضعفلری مشخص اولاندان سونرا و برطرف اولاندان سونرا عمل اولونسون.
سرينگول باش يوردلیMishovli@yahoo.com