مدنی چاليشمالاريميزدان دالی اوتورمامالييق
مدنی چاليشمالار بوگون دونيادا اوزونه بير اونملی يئر توتوب و مينلر غير دولتی و خصوصی اورگانلار بو ساحه ده چاليشيرلار، کئچه ن اوچ ايلده بو مدنی اورگوتلرين و درنکلرين چاليشمالاری نتيجه سينده نئچه اولکه ده بويوک دئييشيکلر اولوب و دموکراسينين ياييلماسينا يارديم ائديبلر.
صئربئستاندا اوتبور گروپو(مقاومت)، گورجئستان کمارا گروپو(بسدی)، اوکرايندا پورا گروپو( وقتی چاتيب) بو مدنی چاليشقانلار و مدنی درنکلر اوز قدرتلرين گوسترديلر و اوز ايستکلرين قدرتله بيان ائديب و قدرتين و حاکميتين قاباغيندا دايانديرلار. و همچنين قومی چاليشقانلار اسپانيادا و اوروپانين ساير اولکه لرينده بويوک بير مدنی مجاديليه گيريب و اوز آماجلارينين چوخونا چاتيبلار.
ايراندا خاتمی گلنده ن سونرا بير ياخشی آتمئسفور ياراندی کی غير دولتی اورگانلار بير يئنی اورتامدا(فضا) اوز قدرتلرين گوسترسينلر ولی دار باخيشلار و غير حرفه ای باخيش لار بو يارانميش فضادان بيلمديلر نجور فايدالانسينلار.
همچنين ايراندا هر مدنی ايشی و چاليشمانی سياست باجاسيندان باخان دارگوز سياستچيلر و اونالار کی لياقتلری اولمايان پستتا چاتيبلار و مدنی فعالاری اوزلرينين رقيب کيمی گورورلر و اونلار کی قورخورلار مدنی چاليشانلار اونلارين اووچلارين آچسينلار، بونلار مدنی فعاليتلره کئچن نئچه ايلده بويوک مانعلر توره ديبلر.
آذربايجان مدنی چاليشقانلاری بو نئچه ايلين عرضينده ايچريده اوزلرينين گوجلرين حاکميته گوسترديلر و حاکميتی و يالانچی دموکرات کوينگی گيين رئفوميستيلری چاليشه چاغيرديلار و اونلارين يالانچی اولماقلارين و يالاندان دموکراسيدان و بشر حاقلاريندان دانيشماقلارين عيان ائتديلر و بونو گوسترديلر کی بو يالانچی دموکراتلار کونولدن دموکراسی و بشر حاقلارينا ايناملاری يوخدور و بو گوزه ل کلمه لردن بير تاکتيک کيمی فايدالانيرلار. حاکميت، آذربايجان مدنی چاليشقانلارينين بير درنکينی ده تحمل ائده بيلمه دی و اونون فعالارينا فيشار گتيردی کی اوز ايشلريدن ال چکسينلر، "آسمک" بير مدنی اورگوت کيمی حاکيميتی چاليشه چاغيردی و آذربايجان ميللی حرکتينه بير بويوک تاثير باغيشلادی. "آسمک" حاکميتين "ايسفنديار گوزون" نيشانه توتوب قاباغا يورودو بيليندی کی مدنی فعاليتلر ايستييبدادين دووارينين نمدير و نقدر مدنی چاليشمالار چوخالسا ايستيبدادين ائويده تئز ييخيلاجاق.
مدنی چاليشمالاريمزدان دالی اوتوورساق بير بويوک و تاثيير بوراخان سنگری اليميزدن وئرجه ييک و بودا بير آدييم حاکميتين قاباغيندا دالی اوتورماق معنا وئره جک و اونلاری بيزی دالی اوتورتماغا آلقيشلاياجاق، ولی اگر بيز بو ايشدن دالی اوتورماساق اونلار بير آديم دالی اوتوراجاقلار و بيزيم گله جک آديميميزا يئر آچيلاجاق.
سرينگول باش يوردلی