|
آرشيو ا
ادبيات ا
اوشاق ا
قادين
ا
رئداكتوردان
|
شاختا بير گونون خاطيرهسي
ساعت اون بير ده كيتاب بوخچامي، داغيرجيغا اوخشار بير موشامبانين
اوزهرينه آچيب سرميشم. گون بويو چتين بئش يوز آل-وئريم اولور.
شوكر اولسون. آتامين گئنيش دامداشي اولدوغونا گؤره، خانا بكيرهليك
چكمهميشم. آرا-سيرا "معجوزون ديوانين"،"پيشهورينين خاطيرهلرين"
و بو چئشيد كيتابلار اليمه كئچير منده قورخومدان بوخچامدان چيخاريب
سرگيلهمهييرم. اوكيتابلاري يانليز "اليوه دوشموش يئني كيتاب
نهورادير؟" دئيه سوران تانيديغيم موشتريلريمه ساتيرام.
قيش مؤوسيملري گليريمين چوخونو ياناجاغا قوللانيلاجاق،ميوه قوطو
لارينا خرجلهييرم. او قوطولارين، ياخشي دئسهم اودونلارين، كرهني
خانادان بورا كيمي سورتلهمه سي ائله اؤزو بؤيوك بير ايش دير!
شاختا دير. گل –گئت آزاليب. اركين اؤنو، قوزئي اولدوغو اوچون،
يازين اورتاسينا تك سويوق اولور.
دليك دئشيك پورتلوخ سوْبامين باشينا فير-فير فيريلداييرام. كيتاب
سئون بيريسييم، ائلهكي اليمده كي كيتابي قورتارماديغيمدا،
موشتهريسي باشيندا اولماسي بئله، مني كيتابين بيتمهمهسينه
آلداتمير.
ساعات بير اولوب،سانيرام، هله يوخدور! شاختا حكم سورور. آخي هر گون
دوز ساعات اونبير ده گلردي! بس نئجه اولدو؟!.
اؤزهل بير موشتهريمدن دانيشيرام. ايستيثناسيز اولاراق هر گون
ساعات اونبير ده اونونلا گؤروشوب سلاملاشاريق. پولو اولدوغوندا
بوخچا آلتي كيتابلاردان بير نئچه سين آلار. آمما چوخلو كيتاب
ساتار، ائويده ساعات مئيدانينا گئدهن يولون ساغ الينده اولار.
قاپيسيني دا،منيم دؤشهديگيم يئردهن گؤرمهك مومكون دور.
آلتميشا ياخين ياشي وار. سوْن دؤنهملرده مادي دورومونون ياخشي
اولماديغيني ائو اشيالارينين، آرا-بره، بول- بول ساتماسيندان
دويوردوم. منه تايسيز كيتابلار ساتار؛ لاپ اؤز آراميزدا قالسين
منده اونو گئچينديرهرهم. چرچيخيرداسي اولدوغوما باخمايين،
كيتاب آل وئرچيسي اولدوغومودا بير دوشونون!.
گونلرين بير گونو "كاشغرلي ماحمودون" ديوانين گتيريب منه
ساتدي،كيتاب ايستامبولدا باسيلميشدي، ديرلي بير كيتاب ايدي،
كيتابا بير گؤز دولانديرديقدان سنرا بير اؤيرنجي موشتهريمه
ساتديم. او آغ ساققال دان آلديغيم كيتابلارين چوخونو گنج
اوخوجولارا ساتارديم. ائله اونلاري دا گئچينديرهرديم.
دونهن منه بير ميدال گتيردي. فرقهنين، باجاريقلي فدائي
باشچيلارينا وئرديگي ميداللاردان بيري ايدي. "دايي من عتيقه
آلمارام، كيتاب گتير" دئيه آلماديم آمما داها سونرا پئشمانليق
حيسسي كئچيرديم. "بوتون كيتابلاريمي ساتميشام، داها ائوده كيتاب
قالماييب" دئدي منه...
بو گون يوخدور. اورهگيميده غريبه بير چيرپينتي وار. ساعات بيردهن
نهقدهر سووشوب بيلميرهم. قونشو كيتاب ساتان يولداشيم "عسگر"
دهن ساعاتي سوروشورام.(ساعات تاخارام، باشي سويوق دئييلم.آنجاق 5
گون اؤنجه، اللريمين سويقدان كئييديگينه گؤره، اليمي ايستي
پورتدوغون ياريسينا كيمي اوزالتديغيمدا، هله اليمه ايستي ايشلهمه
ميشدي كي، بيردهن ساعاتيمين شوشهسي پارتلادي.) عسگر ايكي ياريم
دير دئدي. "آيين نئچه سيدير؟" سوروشدم اوندان؛ "ايگيرمي آلتي
سي..." هله سؤزو ياريمچيليق قالميشدي، خياواننين اوتايينا دؤندو.
منده دؤندوم. لا اله الا الله سسي گليردي.آياقلاريم تيترهدي،
باياقدان بري اوشومهديگيمي بيرآن اوشودم.اؤزومدهن خبرسيز بير
آدديم گئرييه آلتديم. بيردهن بيره عسگر باغيردي...! نه ايش
گؤردون...! آياغيمين آلتينا بير باخيب، پورتدوغون دؤندوگونو،
ائلهجهده كؤزلرينين كيتابلاريمين اوزهرينه جالانديغيني گؤردوم.
پورتلوغو چؤويره بيلهجك گوجوم قالماميشدي.
لا اله الا الله سسي ياخينلاشيردي ... آجي بير يانيق قوخوسو
بورنومو اينجيديردي ... آغ ساققال قهرمان فدايينين مئييدي چيگين
لرده گزيردي... كيتابلار يانيردي...
چاغداش تبريزلي
تبريز 1386/10/27
|
||