ندن بيزيم سسيميز دونيايا چاتمير؟

بي بي سي سايتيندا درج اولموش "ب. م . ت. نين ايراندا انسان حاقلاري دورومو قونوسوندا بوراخميش قطعنامه سي" خبر يازيسيندا اوخوروق:*

" اين قطعنامه به اعراب، کردها، بلوچها، مسيحيان، يهوديان، مسلمانان سنی مذهب و بهائيان به عنوان گروههايی که به دلايل مذهبی، قومی و زبانی مورد تبعيض قرار می گيرند اشاره کرده و از دولت ايران خواسته است تا به نقض حقوق بشر عليه اين اقليتها، "در قانون و در عمل" پايان دهد".

گؤردويونوز كيمي بو قطعنامه ده ايران دا ياشايان توركلرين حاقلارينين پوزولماسيندان هئچ بير سوز گئتمير اما كوردلر ، عربلر و بلوچلارين آدين گؤرمك اولور. بو بيريمينجي دفعه دئييل كي بيزيم سسيميز دونيا قولاغينا چاتمير.  كئچن قطعنامه لر ده ده ميلتيميزين سسي و دردي اؤز يئرين تاپابيلمه ميشدير. حركتيميزين خبرلري ايسه دونيا خبراژانسلارينا چاتمير، چاتسادا ياييلمير.

مثال اولاراق اسلام اينقلابيندان سونرا ايراندا باش وئرميش ان بؤيوك و دگرلري توپلانتي اولان بابك قالاسي قورولتايي دونيا كوتلوي اينفورماسيا واسيطه لرينين گؤزوندن سهو يا عمد اولاراق اوزاق قاليبدير.

تهرانين بو ايلكي ستارخان مزاري اوستونده مين نفرله ياخين كئچريلميش آنما توؤرنين خبري يالنيز ايكي غير آذربايجانلي خبري سايتدا ياييلدي: بيريمينجيسي باشقا فارس سايتلارينا گوره آز چوخ انصافلي اولان  اخبار روز سايتي و باشقاسي بي بي سي نين آذري بؤلومو كي بو بؤيوك خبري تكجه بير نئچه سطرده يايدي:

"تئهراندا ستارخانين آنيم مراسيمي اونون روحونا دعا اوخوماقلا باشلادي. اونون حاققيندا شعرلر اوخوندو. ستارخانين قبري اوستونده شمع لر يانديريلميش, مزاري قرنفيل گوللريله بزديلميشدي.
مراسيمين سونوندا ايشتيراکچيلارا ل-اله وئريب "آند اولسون" شعيريني ايفا ائتديلر."

يقين كي تهران دانشگاهينين قاباغيندا بير نئچه اؤيرنجينين داغينيق توپلانتيسي ايران-فارس و دونيا خبرلرينده بيزيم حركتين خبرلريندن داها گوجلو ياييلاجاقدي!

اما بوگونلر 21 آذرين آنما تؤرنلرينين آمريكا سسينين آذري بؤلومونده **دوزگون شكليده ياييلماغي بير استثنا اولاراق بيزي چوخ سيوينديريب و بيزه بير اوغور قازانماق كيمي ساييلابيلر. اوماريق كي بو حادثه بير استثنا قالماييب و دونيانين خبر شبكه لرينه نفوذ ائتمه سيرلارين اؤيره نه بيلك.

آمما ندن بيزيم دردلريميز و حركتيميزين سسي دونيايا چاتمير و ندن بيزدن نفوسلاري آز اولان كورد و عرب ميللتلري بو قونو دا داها موفق ديرلر:

1-   هله ليك بيزيم سسيميزي اؤز ميلتيميز ائشيتمه ييب. دونيا دا بوسسين ائشيديلمه مه سي چوخ دا شاشيرديجي بير موضوع دييل. سيزجه آذربايجان ميلتي نين نئچه فاييزي شونيسم دئيه بير سؤز ائشيديب؟ يا ميلتيميزين نئچه فاييزي اؤز آنا ديلي مكتبلرده درس ويريلمه مه سي نه گؤره معترضدير؟ اروپا ميلت وكيليندن نئجه انتظار گئدير كي تبريزده دانشگاه اوستادي بيلمه ين درديمي مندن داها ياخشي بيلسين؟!  

2-   بيريمينجي بحثنين تكميلينده دئمه لييك بيزده هله ميللي شعور عرب ، كورد ، بلوچلار كيمي گليشمه ييبدير. شوان قادري ماجراسي آذربايجان شهرلرينده باش وئرسه ايدي ، بيزلر ده كوردلر كيمي توكان بازاريميزي چكيب باغلارديق؟ مجلسده اولان تورك و كورد وكيللري ميللترينه گؤره فعاليتلرينين آغيرليقلاري بيردير مي؟  بؤيوك سرمايه سي اولان آذربايجانليلارين سرمايه دارلاري اؤز ميلتلرين انكشافينا گؤره اؤز ماللارينين بير بالاجا حيصه سيندن كئچه بيلرلر مي؟

3-   بيزيم سسيميزي دونيايا چاتديران گوجلو بير تشكيلاتيميز يوخدور و موجود اولان تشكيلاتلار دا بير بيرلرين قيناماقلا اؤز انرژي و اعتبارلارين اوزورلر.

4-   خبري بير آژانس  اؤزليگينه ماليك اولان گوجلو و اعتبارلي بير تشكيلات و حتي اينترنت سايتيميز يوخدور و گؤزلوروك كي پيمان پاكمهر لر تبريز نيوز آديله ضررلي و هدفلي خبرلرين يايسينلار! بيزيم خبرلر داها چوخ آذربايجان فعاللاري اوچون ياييلير و اؤز ميللتيميز و باشقا ميللتلري اونوتموشوق.

5-   بيزيم حركتيميز مدني بير حركت اولاراق بير ميللتين اويانيش و قورولوش تمل  كؤكلرين تؤكمكده دير. آنجاق بئله نچي كؤكلو و اساسي حركتلر دونيا خبري آژانسلارين ماراقلارنديرمير. اونلار كوردستاندا و يا خوزستاندا اولان كيمي توپ توفنگ سسين ائشيديلر! گرچي من مدني يولوموزدان چاشيب يايينماغي تكليف ائله ميرم امما مدني چرچيوه ده چوخلو ايشلر گوره بيله جگيميزه اينانيرام.

6-   يوخاريدا يازيلان كيمي مخبرلرله ياناشي ، توجه لرينه محتاج اولدوغوموز (!؟) دونيا سوپرگوجلري و بو گوجلرين كؤلكه سي آلتيندا فعاليت گؤسترن  اولوسلار آراسي تشكيلات ايسه مدني حركتلره چوخ ماراق گؤسترميرلر. ندن كي اونلارا شرقده بير ميلتين اويانيب انكشاف ائتمه سين گؤرمك خوشا گلن دئييل، اونلار ميلتلرين قانلي دؤيوشلريندن آرتيق فايدالانابيلرلر.

7-   ميلتچي دياسپورا ميزين اينديه دك گؤردوكلري ديرلري ايشلرينين قيمتين اونوتماق اولماز امما اونلاردان اولكه ديشينين آچيق جو و امكانلاريندان استفاده ائتمك اوچون آرتيق انتظار گئدير. اروپا ديللرينده يازيب پوزوب دردلريميزي دونيا قولاغينا چاتديرماغا يئترلي اولاراق چاليشيرلار مي؟ بؤيوك گوج و سرمايه يه ماليك دياسپوراميزين غير ميلتچي بؤيوك حيصه سين ميلي حركته طرف چكمگه چاليشيرلار مي؟ و....

8-   بيزيم ميللت نفوسجا ايراندا چوخلوق اولوب و ايراندا يايقين شكيلده داغيلماغينا گؤره گؤزلردن گيزلي قاليبلار! بو بير ظرافت اولماقلا ياناشي بير حقيقت دير. توركلر هم جغرافيايي باخيمدان ايراندا ياييليب پايتخت سر حد لرين ده آشيبلار ، هم ده سراسري اجتماعي ، سياسي و اقتصادي موقعيتلرين مختلف قاتلاريندا يئر تاپيب لار. رهبر، رييس جمهور، وزير، سرمايه دار اولابيلن تورك ميلتينين باشينا گتيريلن سايسيز و غير انساني ظلملري نئجه دونيا افكارينا آنلاتماق اولار؟! بيز توركلر اؤز اليميزله ، اؤزوموزه قارشي اولان آپارتايد سيستئمين سوردورمكده ايك! اما دونيا يا نئجه قانديرماق اولار كي ايران قدرت سيستئمينه يول تاپان توركلر بو سيستئمه تابع اولاراق اوز ميلتينه قارشي عمل ائله يه جكدير يا تهراندا قالانان تورك سرمايه سي آذربايجانا يوخ مركزه خدمت ائتمكده دير؟

9-   بيزيم ميلت بير زامان لار اينقلاب لار و دؤيوشلرين اؤنونده گئديرديلرسه امما ايندي بيز آرتيق كانسرواتيو و قورخاق اولموشوق. بو دا كئچن تجربه لريميزه داياناراق طبيعي بير رئفلئكس دير و چوخ دا قيناماغا گركمز. بيزيم ميلت آرتيق هزينه وئرمكدن يورولوبدور و عصيرلر بويو ساواش ، انقلاب و قيتليق صحنه سي اولان آذربايجان ميللتي آرتيق دينجليك و تهلكه سيزليك آختارير. مدرسه ده فارس ديلي اؤيرنمك ، دوستاقدا عؤمور سورمك دن داها راحاتدير! تهرانا كؤچوب توستو ده ياشاماق آباد و آزاد آذربايجان يولوندا دؤيوشمكدن داها راحاتدير! بو آجي گرچك ميلت دردين درينجه سينه دوشونن لرين بؤيوك بير قايغيسي دير. اومودسوز ميلتي نئجه ميدانا چكمك اولار؟

10- بيزده هله ليك دموكراتيك دوشونوب داورانماق فرهنگي گئري ده قاليب. چيشيتلي دوشونجه لري قبول ائتمك و بو دوشونجه لري بيرگه بير آماج اوغروندا بيرله شديرمك بيزلره بير چتين ايشدير! بيزه تاي دوشونمه ين لري آذربايجان ميللي حركتيندن اخراج حؤكمون وئريريك سانكي بو حركت آتاميزين ارثيدير و آچاري دا بيزيم اليميزده دير! آذربايجاني دوشونن يالنيز بيزه تاي دوشونمه ليدير! بئله دوشونن بيزلرنئجه بيرله شيب و دونيادا بير تورك-آذربايجان گوج مركزينه چئوريله جه ييك؟!

11- بيزيم حركت اقتصادي باخيمدان ضعيفدير. تلويزيون قورماغا پولوموز يوخ ، درگي چيخارتماغا پولوموز يوخ ، اينترنت اوزره فضا آلماغا پولوموز يوخ ، سمينار لار قورماغا پولوموز يوخ ، بؤيوكلريميزه آغيرلاما تؤرنلر قورماغا پولوموز يوخ . بو بير حالدادادير كي خارجده ياشايان آذربايجانلي لارين سرمايه سين 500-400 ميليارد دلارا ياخين تخمين وورورلار. ايرانداكي لار هله قالسين. بئله بير سرمايه ميز اولاركن آمريكا يا باشقا بير اؤلكه يه ال اوزاتماق نه دئمك دير؟! استقلال و شرافت دئيه ايده آليستيك شعارلار وئرمك ايستميرم ، ندنكي قارشيميزدا اولان صداقتسيز و شرافتسيز شونيسم قوه سي قارشي سيندا بو شعارلاري وئرمك چوخ دا منطقي دييل! بو قوه نين قاباغيندا سياسيتميز اولماليدير امما سورو بودور كي سايديغيم بو بؤيوك سرمايه ني ملي حركتيميزله يؤنله شديرمه يه اينديه جن چاليشميشيق مي؟

12- غربين توركلرلره تاريخي قارشيچيليغي و بو گوجلو پتانسيلين فعال اولماغيندان قورخوسوندا گوزدن قاچيرتمامالييق.

بو مسئله لرين هاميسينين چؤزوم يولون تاپماق چوخ دا راحات دئييل امما گوره بيله جگيميز ايشلري بئله سايماق اولار:

1-   ميلي اويانيشي يئيينله تمك لازيمدير . بئله نظره گلير كه ميلي حركتين انكشاف و روشدو يالنيز ميلي فعاللارين چرچيوه سينده محدودلاشماقدادير. فعاللاريميز سرعتله قاچاراق ميللتيميزي گئري ده بوراخيبلار. فعاللار و  خلق كوتله سينين ايليشگيسي كسيلمه كده دير. ميلي حركتين روشدو خلق ايچينه قاييتماليدير. منجه بيزلر موجود اولان وسيله لردن ده يئترلي قدر خالقيميزين ميللي شعورون اوياتماق اوچون استفاده ائله ميريك. مثال اولاراق اينترنت سايتلاريميزين خبرلر و يازيلاري آرتيق ملي فعاللارين معلوماتين آرتماق ايشينه گلير.

2-   اختلافلاري بير قيراغا بوراخيب ، بيرله شمه لييك. اختلافلاري آرتيق بؤيودوب و اختلاف موضوعلارين اوزالتماقدان واز كئچمه لييك. آذربايجان بيرليك گروپو بوتوو آذربايجان قوه لرين بيرله شمه سيله ان ياخين زاماندا قورولماليدير. بيرليك گروپون ايشي يئني بير سؤز دئييل آمما عملده چوخ دالي قاليبدير. بلكه كورد لر و عربلرين ايرلي گئتمكلرين گؤروب بير آز اوياناق.

3-   سسيميزي دونيايا چاتديرابيلن اعتبارلي و گوجلو خبرآژانسلاريميز اولماليدير. تاسفله اينديكي اينترنت سايتلاريميز بو ايشي ياخشيجا يئرينه يئئتره بيلمه ييبلر. بو قونودا گله جكده آرتيق يازماق ايسترديم. دونيا حقوق مدافعه تشكيلاتلارلا علاقه قوروب و مداوم اولاراق رسمي مكتوبلار گوندرمه لييك.

4-     حركتين اقتصادي جنبه سينه آرتيق توجه يئتيرمه لييك.

5-   سياستدن قورخوب كوسموش ميللتيميزي آرتيق سياست له باريشديريب ، صحنه يه چكمه لييك. عملي هدفلر و آدديملار تعريفله مكله خالقين اوره يينده يئني دن اومود ياراتمالييق. حركتيميزي بيربويود دان(بعد) نئچه بويودلوغا ساري يؤنه لتمه لييك. گرچي ديل و مدنيت مسئله سي بيزيم تمل مسئله لريميزديلر ، امما بو مسئله لر خالق اوچون چوخ دا اوستونلويو يوخدور. ميللي حركتيميز ميلتين باشقا مسئله لرينه خصوصا اقتصادي مسئله لرينه ، ايش سيزليگه ، باهاليغا ، .... دا اؤنم وئرمه ليدير.

يوخاريداكي بئش فعاليت شونيسمين مانع لرينه باخماياراق قاباغا گئده بيلر. بو يولدا بير قيسيرليق اولموشسادا آرتيق بيزيم اؤز تنبل ليگيميزدن ايرلي گليبدير. بيزيم حركت مدني قالماليدير.منجه  مدني اولماق ايران اؤلكه سينين قانونلارينا يوخ بلكه انسان حقوقلارينا اويماق دئمكدير. حركتيميزين راديكال لاشماغينا ميللتيميزين يئترلي پتانسيلي يوخدور و حركتيميز خلق طرفيندن يئترلي اولاراق حمايت اولمور . مدني چرچيوه ده گئتمه دييميز يوللار و گؤرمه ديگيميز چوخلو ايشلر وار و راديكال حركت لره بير دليل يوخ. باشقا طرفدن ايسه مدني و راديكال حركتلرين مرزي تعريف اولمادان ملي حركته يول گؤسترمك تهلكه لي اولابيلر.

منطقه ده بير گوج مركزينه چئوريلمه ييميز اوموديله

ياشار تبريزلي 19 دكابر 2005

http://www.bbc.co.uk/persian/iran/story/2005/12/051218_sm-human-rights.shtml*

**http://www.voanews.com/azeri/21-AZer-60-yesrs.cfm