|
|
|
|
آذربايجان ملي قياميندان سونرا كي دوروما قيسسا بير باخيش
بير كاريكاتور اسكي يارالاري دئشدي و بؤيوك اعتراضلارا سبب اولدو. بئله دوشونولور كي بو حركت بيزيم ميلي حركتده بير دؤنوش نقطه سي اولاراق يئني باشلانان بير مرحله يه آياق باسميشيق. كئچميشي تحليل ائتمك و گله جگه پلان لاشما بيزيم اينديكي وظيفه ميز دير. آذربايجاندا باش وئرن اعتراضلارين مثبت و منفي نتيجه لري اولدو. اونون اؤنملي اولان مثبت نتيجه لريندن بئله سايماق اولار: 1- آذربايجان مسئله سين خالقيميزا ، ايران و دونيانين باشقا خالقلارا تانيتديريلماغينا امكان يارانماسي. 2- مركزطرفيندن آذربايجان ملتينين گوجون گؤروب دويولماسي. 3- فعاللار طرفيندن آذربايجان ملتين اويانيش سويه سين اؤلچوب اؤگرنمه سي 4- شونيستلرين اميد سيز ائديلمه سي. 5- ملي حركتين قاييدا بيلمز بير سويه يه يئتيرلمه سي 6- دولت ده يئر آلان آذربايجانلي لارين تپكي لري و آذربايجانا آرتان دقت لري 7- ايللر بويو آذربايجان مسئله سي حاقدا سوسان اپوزيسيونون (مثبت يامنفي اولاراق) تپكي گؤسترمكلري 8- آذربايجان بير ميلي گوج كيمي ايران ، منطقه و دونيا آلانيندا ثبت اولماسي آنجاق اونون منفي نتيجه لرين ده بئله يازماق اولار: 1- اونلار انسانين شهيد اولماسي و يوزلرلره انسانين ياخالانماسي 2- مركزين ملي حركتين قارشيسندا آرتيق كؤبود داورانيب ، داوراناجاغي 3- ميلي درگي لر و قزئت لرين تعطيل اولماسي نتيجه سينده ميلتيميزله ايليشگي يوللارين دارالماسي. 4- ميلتيميزين محافظه كار قسمين آرتيق محافظه كار اولا بيلمه سي .مثال اولاراق گنجلريميز داها آرتيق عايله لر طرفيندن سياست ميدانيندان اوزاقلاشيلاجاقلار.
سون قياملارين مثبت و منفي طرقلرينه ده باخماق لازيمدير: مثبت لر:
منفي لر:
بو منفي جنبه لر نتيجه سينده ايدي كي بعضي چاليشقان لار اعتراضلارين ادامه سيندن داها آرتيق مثبت نتيجه آلابيلمه سينه اينانميرديلار . ضررلر آرتاراق ، منفعت لرين آرتماياجاغي اينانيليردي. بو قياملاردان سونرا پلانلاريميز نه اولاجاق ؟ سؤزسوز كي بو قياملارين مثبت و منفي اثرلري مدتلر جامعه ده قالاجاق. بيزيم وظيفه ميز ايسه مثبت تقطه لريندن آرتيق استفاده ائتمك و منفي نقطه لرين خنثي ائتمك اوچون چاليشماق دير. بو اساس دا بيزيم گله جكده حركتيميز كئچميشده اولدوغو كيمي دورد اصله داياناجاقدير:
بيريمينجي و ايكيمينجي فعاليته گوره مديالار ياراتماغيميز لازيمديرو اول اوچ اصل ده ال وئريشلي بير اوغورلاما يا چاتمادان، هر بير كوتلوي قيامين نتيجه سيز و خسارت وئريجي اولماغي گوز اونونده دير. دوردونجو موضوع آذربايجان قياميندان سونرا اهميتي آرتاراق يئني جه آچيلان قاپي لاردان ساييلا بيلر. آذربايجان حركتي اله گلن فرصتده و بو حكومتين عومرو بويو اؤز رسمي وارليغين ثبته يئتيره بيلر. بو دؤرده آلديغيمز ان كيچيك امتياز گله جك اوچون بؤيوك بير سرمايه و تمل دير. يازيلان كيمي تاسف له ملتيميز آراسيندا بير سرحد وار . ميلتيميز ايكي طبقه يه بؤلونور ميللي شعورا چاتان لار و چاتمايان لار. ملي شعورا چاتان لار اطلاعاتي منبع لري تانييب و گونو گوندن اونلارين ملي بيلگي لري آرتاراق ايكينجي طبقه دن اوزاق لاشيرلار. ميللي شعورلاري اويانمايان طبقه ايسه بير دسته سي مسئله لره تفاوت سيز فالماق ايسته ين آداملارديلار.اونلار هر بير جامعه ده و حركتده وارديلار. اونلارا فرمان كيمين الينده اولماغيله ماراقلانميرلار و حركت اونلارسيز دا قاباغا گئده بيلر. بو طبقه نين ايكينجي دسته سي ده ملي حركت يولوندا حركت ائتمگه ياخشي پتانسيللري وار اما سانسور ، بايكوت و بللي باشقا دليللره گؤره بيلگي قايناقلاريندان اوزاق قاليبلار. بو دسته يه ، بيرينجي طبقه نين نين سؤزلري باشا دوشمك راحات دئيل. تبريز قياميندان سونرا ميللتيميز آراسيندا ائله آدملارا راست گلمك اولور كي سوروشور لار: ايران گونده ليگين تعطيل ائله ديلر داها بونلار( منظور اعتراضچيلار!) نه ايسته يير لر؟! يا دا شورون چيخارتديلار ، تئز فيرتينا ياتسين گئدك زندگانليغيميزين باشينا و بئله نچي سوزلر. يقين آذربايجانين سون قياميندان سونرا آرتيلاجاق سانسور لار نتيجه سينده ايكي طبق نين ايليشگي لري داها زورلاشاجاق . آما دوشونجه لرده يارانان حساسيت، ملي شعورون اويانماغينا مناسب بير فرصت ياراديب. بو ايكي طبقه نين ملتيميزين نئچه فاييزين اولوشدورماسي بللي دئييل . امما سون قياملار گوستردي كي بيريمينجي طبقه يه قاتيلماغا پتانسيلي اولان بويوك بير رقم آذربايجاندا ياشايير. بو بيزيم گؤزله دييميز كيمي و تخمين ووردوغوموز كيمي دئييلدي. ايكينجي طبقه ني بيريمينجي طبقه يه قاتماق اوچون چوخ احتياطلي اولمالييق. لاپ اولده آشيري آرمانلار ايرلي سورمك له بو پتانسيلي قاچيردا بيليب و فاصله ني درين له شديره بيلريك.
ايندي يازيلاريميز موافق و مخالف لر طرفيندن داها آرتيق اوخونور. بو فرصتدن سسيميزي دونيا خالقلارينا ، خصوصيله فارس ميلتينه چاتديرماق اوچون استفاده ائلر كن چوخ دقت ائتمه لييك. فارسي سايتلارا مقاله گؤندرمكله ميلي مسئله نين چيراغين يانيق ساخلامالييق . يازديقلاريميزدا و دانيشيقلاريميزدا حقوقي مسئله لر و علمي-تاريخي مسئله لري آييرد ائتمك لازيمدير. بيز حقيميزي آلماق اوچون اؤز ديليميزين و تاريخيمزين كؤكون اثبات ائتمگه احتياجيميز يوخدور. ايستر 7000 مين ايلليك ايستر سه 7 ايلليك كؤكوموز اولسون ، ايسترآنا ديليميزين آدي آذري ، ايستر سه ده توركجه اولسون ، آنا ديليميزده تحصيل آلماق و ايراندا ياشايان باشقا خالقلارلا برابر اقتصادي ، سياسي و اجتماعي حقوقلار بيزيم حقيميزدير. كؤكوموزو اثبات ائتمكله حقيميزي آلماق يولو بيزي هدفدن اوزاقلاشديريب و مخالف لرين الينه بهانه وئرير و اونلار دا قارشيليق اولاراق تاريخي فاكتلار گتيرمكله مؤضوعنو اوزالدا بيلر لر. پس بيز تاريخي يازيلاري ندن يازيريق: 1- آسيميله اولموش خالقيميزي ، اؤزلرينه ايناديرماق اوچون 2- خالقيميزا اولان تحقير لر و ظلملري اثبات ائتمك اوچون 3- تاريخدن درس آلماق اوچون.
حقوقي مسئله لري ياخشي اؤيره نيب و اونلاري اؤز يازيلاريميزدا ايشله تمه لييك.( مثال اوچون اولوسلار آراسي سويه سينده اولان انسان و خالقلار حاقلاري بيانيه لر و ايران اسلام جمهوريسينين آنا ياساسين و....) بونو دا بيليمه لي و بيلدير مه لييك كه بو قانون لار بيزيم ايستكلريمزين حدي وسونو دئييل بلكه تام ترسينه ان آزي اولا بيلر. دولتلر و ايران دولتي متعهد اولوب كي بو قانونلاري رعايت ائله سين . آما سؤز وئرمه ييب كه اوندان چوخونون قارشيسين آلسين. خالقيميزا اؤز كؤكون تانيتديرماق اوچون تاريخي حقيقت لري يازماقدان چكينمك اولماز ، آنجاق فارسلاري اسكيلدن موضوعلاري اؤز يازيلاريميزدا يول وئرمه مه ليك. تام ترسينه فارسلار و باشقا ملتلرله دوستلوق و برابر ليگيميزي وورغولاييب و يازمالييق كه بيزيم مسئله ميز ميللتلرله يوخ بلكه يالنيز يانليش دوشونجه لر ايله ديرو بيز فارسلار دان اوستون دئييليك و اوستون اولماق دا ايسته ميريك بيز يالنيز حاقلاريميزي ايستيريك. فارس –سراسري پارتي لردن گلن مثبت نشانه لره مثبت ياناشيب و اوزوموزدن چوخ دا باريشماز بير اوبراز ياراتماياق.آمما منفي لري ده افشاء ائتمه لييك. گرچي بيز اونلارين مثبت و منفي تپكي لرين داليندا اولان نيت لري ياخشي تانيريق، آنجاق سياست حؤكم ائلير كي اونلاريق بير ظاهري گولومسه لرين بير ظاهري گولومسه ايله جواب وئرمه لييك. كورد ميلتيندن گلن مثبت تپكي لري ده نظر ده آلماق لازيمدير و اونلارا مثبت ياناشمالييق. گئرچي اونلارين نيت لرين ياخشي تانيريق اما مسئله لريميزين حلينده اونلارايله يالنيز پوليتيك يوللار آختاريب ، تاپمالييق. دونيا ائتنيك ساواشلاري تحمل ائله يه بيلمز وبو نوع ساواشلار لا بير يئره چاتماق اولماز (باخين قاراباغ مسئله سينه). پس كورد ملتيندن و بعضي كورد پارتي لردن گلن حمايه لري مثبت بير آدديم ساناراق ، اونلارا اوز تشكروموزو بيلديرمك لازيمدير. خبرلريميزي دونيايا يايمالييق و بو يولدا خارجي ديللر دن استفاده ائتمه لييك . بيزيم يازديقلاريميزين ان آزي 10% انگليسجه اولماليدير . خبرلريميزه رسمي و اعتبارلي بير هويت وئرمه لييك . رسمي خبر آژانسلاري ياراتماق بيزيم اوچون ممكن دئييلسه ان آزي خبر يارادان لار اينترنت محيطينده بير آرايا گليب و بير سيرا خبري آژانسلار ياراتماليديرلار. خبر لرين سونوندا آژانسين آدي و مخبرين آدي يازيلماليدير. طرفسيز و دوزگون خبر لر يارانماليدير. ستارخان يا بايبك كيمي آدلاربير خبري ايماژ ياراتمير. دونيا سويه سينده تانينان آدلار دان استفاده ائتمه لييك. (News agency و...) اينگليزجه يازماق و رسمي و غير رسمي خبري آژانسلار ياراتماق حركتين چوخ اؤنملي و حياتي مسئله لريندن دير. هزينه سي آز ، امما نتيجه سي چوخدور.
ايچريده ياشايان بير عده اؤنجول چاليشقلانلاريميز ايندي مجلس نماينده لر ايله و حكومتي مقاملارلا و... لابي چيليگه باشلاييب لار . گرچي اونلار اؤزلري ده ياخشي بيلير لر كي بوتوو حاقلاريميزا بو يولدان چاتماق اولماز اما اونلار چوخ اؤنملي و دگرلي ايشه باشلاييبلار.اول بوكي يقين حق سوزوموزو ائشيدن انسان تاثير سيز قالا بيلمز. ايكينجي بو كي آذربايجان ميلي ايستك لريميز بير گيزلين يا غير قانوني ظاهيردن بير رسمي فورما تاپاجاق . اونا گوره ده اوز يازديقلاريمزدا و شعارلاريميزدا بو انسانلارين چاليشديغي زحمتلري پوزماياق. حركتيميزي بير مدني و قانوني حركت تانيتديرماقلا اونلارا دستك وئرمه لييك. بو مرحله ده چوخ بؤيوك ايستك لر ، امكاني اولمايان شعارلار يالنيز حركتين هزينه لرين آرتا جاق. بويوك هدفلر گوجلو پارتي لر ، گوجلو مديالار و دقيق هدفلر و بيرليك ايسته يير و بودا هله ليك بيزده يوخ.ان آزي آرخين نازيك آخيمين كسيلمه سينه سبب اولماياق. اؤز مقدراتين تعيين ائتمه حاققي هر ميلتين قانوني ، منطقي و انساني حقي دير . بو حق استقلال ، فدراليسم ، كون فدراليسم ، خود مختارليق ، ياريم سانتراليسم يا دا سانتراليسمه و....وارا بيلر. استقلال دا هر ميلتين دانيلماز حاققي دير ، آنجاق تاسفله آذربايجان ميلتينده بو حقه چاتماق اوچون يئترلي پتانسيل يوخ و بو زماندا آذربايجان ملتي اوچون استقلال يولونون ضررلري ، فايدالاريندان چوخدور. منجه حركتيميز ده استقلال بير هدف يا شعار اولماماليدير. بئله نچي شعارلار بيزيم جوان حركتيميزين هزينه لرين آرتاراق خطره سالير. آنجاق تئوريك جهتدن يازيلاريميزدا استقلالين دانيلماز بير حق اولوب ، تابو اولماماغين ، دؤنه دؤنه وورغولامالييق و گئرچك دموكراسي و حقلريميزه چاتماق اوچون زمينه ياراتمالييق. بللي بير پارتي لر ايسه استقلال آماجي اساسيندا چاليشماق ايسته يير لر سه ، فدرالچي لارين بير دستگي كيمي داورانماليديرلار.
خاريجده كي پارتي لر و چاليشقانلار دان ياراتديغي اينترنت سايتلاري و دونيا رسمي مقاملارينا يازديقلاري مكتوبلارا و قوردوغو يا اشتراك آپارديغي قورولتايلار و باشقا غير فارس ميللتلرله آپارديغي امكداشليق و دوستلوق پروسسينه گوره تشكور ائديريك. و اونلاردان بو يولو ادامه وئرمك لرين و ايكي اؤنملي شئي ايستيريك. 1- قوردوغوندا يوبانديغي آذربايجان واحد ميللي شورا سيندا داها آرتيق يوبانماسينلار. 2- ايچره ده ياشان سويداشلارين ايستك و دوروملاريلا آرتيق ياخين حركت ائتسينلر.
گله جك بيزيمدير ياشار تبريزلي 7 جولاي 2006
|
||
|
|
|
Materiallardan istifadə zamanı qaynağa istinad
vacibdir |