میرزه حسن روشدیه و یئنی اؤیتیم سیمینارينين صدری ياشين حسينی ايله مصاحيبه

ساولاردا اوخودونوز کی دی آی نین سگکیزینده آذربایجان گنج لر ائوی نین تشبوث ایله تهراندا میرزه حسن روشدیه و یئنی اؤیتیم سیمیناری گئچیریلدی.بو طنطنعه لی سیمینارین دبیری و گنج لر ائوینین یوکسک مرتبه لی اویه سی خانیم یاشین حسینی دیر.
خانیم حسینی عرب دیل علملر نامیزدی دیر،تئهرانین علامه بیلیم یوردوندا تحصیلات آلمیشدیر.
آذساو اوخوجولارین بو مدنی تشکیلات و اونون حؤرمتلی صدری خانیم یاشین حسینی نین دوشونجه لری تانیش اولماق اوچون اونلا آپاردیغی قیسا دانیشیغی یاییر.
1-آذربایجان گنجلر ائوین آرتیق تانیداسینیز؟
آذربایجان گنجلر ائوی (خانه فرزندان آذربایجان) چرشنبه گونو 26/6/1382 بانو مدنیت اوجاغیندا ( تهراندا ) اوز چالیشماقلارین باشلادی بو NGO نون ایشلریندن آذربایجان اوچ مین ایلیک ادبیاتی اوتورومولاری و اونلارین چاپ اولونماغی، تبریز دانشگاهیندا « آذربایجان شناسی»  اوجاغی ایش بیرلیگ ایله ایدی. اویرنجی درگی لریندن(سس، ائل سسی ویول) حمایت ائتمک، بهمن مدنیت ساراییندا کئچیریلن آذربایجان هفته سینین برنامه لرینه قاتیلماق، فرهنگی – تفریحی اوردولار قورماق، داخلی خبرنامه یاییلماغی، مین بئش یوز جیلد کیتابین اؤیه لره سونولماغی، گنج یازیچی لاردان تقدیر ائتمک، ماراغا شوعبه سینین قورولماسی و چئشیدلی فرهنگی چالیشماقلاری، فوتبال تیمینین قورولماسی وایکی یاریش دا ایشتیراکی،"اندیشه نو" یایین ائوینین زحمت لریندن تقدیر، آراز موسسه سی ایله 29 بهمن شنلیگینی کئچیرمک اوچون امک داشلیغی، تهران دانیشگاهلاریندا درس اوخویان مرندلی لرین توپلانتیسی، قزئتچی لیک کیلاسلاری، اؤیه لر اوچون قیسا فیلیم لرین نمایشی، نثر کیلاسلاری،  گنجعلی صباحینین آغیرلاما تؤره نی کئچیرمک اوچون امکداشلیق و میرزه حسن روشدیه و یئنی اؤیرتیم سئمیناری.
۲- ایندیه دک آذربایجان شخصیت لرینین آدیلا قورولان سئمینارلار معمولا «آغیرلاما تؤره نی» کیمی کئچیریلیب، میرزه حسن روشدیه آدیلا قورولان بو سئمیناری تام علمی بیر سئمینار گوردوک بو سونت سیندیرماغینیزین عیلتی نه دیر؟
آغبرلاما توره نی قورماق ، بعضی شخصیت لره محوریت وئرماق، تاریخی مسأله لرده سیر ائتمک و اؤزوموزو کئچمیشده آختاریب تاپماماق ایندی  ایسه بو زامانلاردا یارارلی بیر ایش اولا بیلمز. هر دؤنه نین اؤزونه عایید بیر پارا اؤزه للیکلری وار و بیزلر بوتون گوجوموزله او اؤزه للیکلر اساسیندا داورانمالییق. کئچمیشدن گؤز اؤرتوب ایندی کی زامانا فیکیرلشمک کسکین لیکله چوخ زادلاری الده ائدر. یوکسک اینسانلارین ائتگیسین اینکار ائتمه دن اونلاری قوتلاماق ،تاریخی بیر اولای، تاریخی بیر شخصیت بیزه یئنی پنجره لر آچماقا یاردیم ائتمسه داها نه ایشه یارار.
3- گنجلر ائوی بیر غیر دوولتی تشکول اولاراق بئلنچی بیر گئنیش و علمی سئمینار قورماقدا چوخلو مانیع لر ایله اوز به اوز اولموشدور بو مانیع لر نه ایدی و سیز اونلاری نه جور آرادان قالدیرا بیلندینیز؟
غیر دوولتی تشکوللر نئجه کی آدلاریدا یانسیتیر هئچ یئره باغلی اولمادان اؤزونه آرخالانمالیدیر اؤزه للیکله اویه لرینه. آنجاق  NGOلارین ماهیتی بودور. مادی چتینلیکلر هر نه دن اؤنجه گؤزه چارپیر حتی سالون حاضیرلامایا عایید. بو تشکولون آدی آذربایجان گنجلر ائوی اولاراق بو گنجلرین اسیرگمه دن یاردیملاری چتینلیکلری آرادان گوتوردو.
4- بوگول بیزیم میللتیمیزین اؤنملی دردلریندن بیری دیل مسأله سیدیر. تأسفله بیز بو درده و مسأله یه سیاسی آچیلاردان باخدیغیمیزا گؤره بو درد هله میللتیمیزه عینی لشمه ییب. نظرینیزه بو دردی نه جور میللتی میزه عینی لشدیره بیلریک؟
عومور بویو منیمسه نیلمیش مسأله لری میللتین بینیندن قازدیرماق بیر ایکی گون ایشی دئییل. دوزو بیلمک و دوشونمک دردینی باشا دوشمه هرکیمسه لردن گؤزلنیلمیر. آذربایجاندا او قدر ایقتیصادی و ایجتیماعی گرگینلیک وار هله میللتیمیز بئلنچی بیر مسأله لره اؤنم وئرمه دن ایعتیناسیزلیقلا بو مسأله ایله یاناشیر. مسأله نین علمی اورتاملاردا آچیقلانماسی و اوشاق باغچالارینا (اوشاقلارا) اؤونم وئرماق و همن ایقتیصادی و ایجتیماعی گرگینلیک لر دن قوللانماق چوخ ائتگی بوراخابیلر.