|
|
|
|
مدنی جمعیت و بیز!
1- مدنی جمعیت نه دیر؟ مدنی جمعیت فئودالیزمین داغیلماسی و کاپیتالیزم سیستمین اقتصادی گوجونون، تکنیکی نین و ایده آل لاری نین انکشافی نتیجه سینده یارانیر. بو جمعیتتین دیققت مرکزینده انسان یئرلشیر. انسان جمعین ایچینده "فرد" ه چئوریلیر و آزاد بیر موجود اولور. او کیمسه نین قیمومیتی آلتیندا یاشامیر. نه اربابین رعیتی ساییلیر و نه ده دین عالم لری نین تقلیدچیسی. اومستقل بیر انسان کیمی، عاغیل ، علم و تجربه وسیله سیله اؤز مقدراتی نین صاحبی اولور. انسان حقوقلارینا سؤیکه لنه ره ک ، بوتؤ انسانلارین اجتماعی سعادتینی طلب ائدیر. جمعیتده صنفی - دینی امتیازلارین آرادان قالدیریلماسینی ایسته ییر. مدنی جمعیتده انسان اؤزونو دولت حاکمیتی نین اصل صاحبی بیلیروجمعیتی اداره ائده ن حکومتینی هر جوره متافیزیکی دگم لاردان آزاد ائتمک اوچون دیندن آییر. مدنی چمعیتده بوتؤ انسانلار قانون قارشیسیندا برابر اولور. بو جمعیتده هئچ بیر انسان معین بیر اجتماعی طبقه یه و یا معین بیردین ، مذهب ، ایرق، جنس و دیلینه گؤره قانون طرفیندن آیری – سئچکی لیه معروض قالمیر. مدنی جمعیتده قانون حاکمیت ائدیرو اجتماعی حاکمیت خصوصی ملکیّته چئوریلمیر. مدنی جمعیتده، سؤز، فیکیر، مطبوعات، دیل ، دین و پلورالیزم آزادلیغی برپا اولور. انسان اؤزونو فاتالیزمین قارانلیق دونیاسیندان قورتاریر و داها آلین یازیسینا اینانمیر. او جبر ایله اختیار آراسیندا اختیاری سئچیر وبئله لیکله اؤز مقدراتی نین تانریسی اؤلور...
2- بیز هاردایق؟ ایران تاریخینده حال حاضیرکی دؤوره قده ر اوچ دولت فورماسی موجود اولموشدور. بیرینجی فورما مطلق پادشاهچیلیق دیر کی ، 20 – نجی عصرین اوّللرینه قده ر دوام ائدیب. ایکینجی فورما 1906 – نجی ایلده ن 1979 – نجی ایله قده ر دوام ائده ن مشروطیت پادشاهچیلیغی و نهایت اوچونجو فورما اسلام جمهوروسو- ولایت فقیه دؤورو دیرکی، ایندیه دک داوام ائدیر. مطلق پادشاهچیلیق دؤورونده شاه "السلطان ظلّ الله " اولاراق، دولت حاکمیتی نین یگانه باشچیسی اولور . اومطلق حاکم کیمی قانون وئریجی، اجرا ائدیجی و عدلیّه حاکمیتی نی اؤزونده بیرلشدیریر. بو دؤوروده، شاهین مطلق حاکمیتی ایله اهالی نین ان بؤیوک عاجز و حقوقسوز حصصه سی قارشی – قارشیا دورور. سراین ، طایفا آریستوکراتلارین، ایری مولکه دارلارین و یوکسک دین خادملری نین ظولمونون نه درجه ده دهشتلی اولدوغونو بو دؤورون سوسیال تاریخی آیدین گؤستریر. شرق دسپوتیزمین حکم سوردویو بو دؤورو حقیقتا حاقسیزلیق و یوخسوللوق تاریخی آدلاندیرماق اولور. بو قورولوش ایراندا 19- عصرین اورتالاریندان باشلایاراق، اوروپانین ، خصوصیله انگلستان و روسیه نین اقتصادی و اجتماعی ساحه لرده تاثیرلری نتیجه سینده دئیشیلمه یه باشلاییر و نهایت مشروطه حرکاتینی عمله گتیریر. دولت حقوقو باخیمدان ، ایران اؤلکه سی 1906- ایلدن 1979- نجی ایله قدر پارلامنتار اساسلی مشروطه پادشاهچیلیغی اعلان اولور. اونون اساسینی 1906- نجی ایل ایران آنایاساسی و 1907- نجی ایل "اساس قانونا علاوه" سی تشکیل ائدیر. دیگر حقوقلارلا یاناشی ایران اساس قانونو اهالیه آشاغیداکی اساس حقوقلاری وئریر : - قانون قارشیسیندا برابرلیک - مطبوعات آزادلیغی - سؤز و ییغینجاق آزادلیغی بوتون بونلار: عنعنه لریندن ، 1799- ایل انسان حقوقلاری بیاننامه سیندن و 1831-ایل (Magna Charta, Bill of Rights) بلژیک اساس قانونون اساس حقوقلار کاتولوقوندان گؤتورولور. غربین دموکراتیک اساس قانونلاری، خصوصیله 1831- نجی ایل بلژیک اساس قانونو اساسیندا حاضیرلانمیش ایران اساس قانونو ، حاکمیتین بؤلونمه سی پرنسیبی اساسیندا تشکیل ائدیلیر. بو او دئمکدیر کی، شاهین 1906- نجی ایلدن اوّلکی مطلق حاکمیتی ، پارلامنتین موجود اولماسی نتیجه سینده محدودلاشیر. حکومت بوندان سونرا پارلامنت قارشیسیندا مسئولیت داشیان ناظیرلر واسیطه سیله اداره اولونمالی اولور. شاه سلطنت ائدیب آمما حکومت ائتمه مه لی اولور! آنجاق انکار ائدیلمز بیر حقیقتدیر کی ، پهلوی سلاسه سی نین سونونا قدر اساس قانونون نظریّه سی و اساس قانونون تطبیقی بیر- بیریله اویغون اولماییر و عکسینه ، لازیم تمیزلیکلردن سونرا اساس قانون داها چوخ کیچیک بیر حاکیم طبقه نین امتیاز و منافعی نین قانونلاشدیریلماسی اوچون بیر وسیله یه چئوریلیر.
نهایت بهمن انقلابی باش وئریر. ایراندا یاشایان میللت لرین بوتون طبقه لرینه منسوب اولان میلیونلار انسان، شرق دسپوتیزمین بیر فورماسی یعنی "توتالیتیر پادشاهچیلیق" سیستمه غلبه چالیب ، آزادلیق و اجتماعی عدالتین برپا اولماسینی طلب ائدیر. لاکن : ایران اسلام جمهوروسو- ولایت فقیه رژیمی تاسیس ائدیلدیکدن سونرا ، تئزلیکله معلوم اولور کی ، یئنی سیاسی سیستمین رهبرلری آنجاق اؤزلرینین سیاسی – اقتصادی ماراقلاری نین قؤرونماسینی ایسته ییر. بو مقصده چاتماق اوچون یالان شعارلار " ما میخواهیم مملکتمان مال خودمان باشد و مستقل و آزاد باشیم. مطبوعات ما و قلم های ما آزاد باشد. ما میخواهیم ذخائر مملکتمان خرج مملکتمان بشود، گرسنه ها را سیر کنیم، برهنه ها را لباس دهیم، بی خانه ها را خانه دار کنیم " ( از مصاحبه خمینی با خبرنگاران ژاپنی – 6 آذر 1357 ) ، دماگوژی ، خرافات، کؤتله نین دین اعتقادیندان سوُ استفاده ائتمه و نهایت مختلف جنایتلرباش وئریر...
3- ولایت فقیه سیستمی و مدنی جمعیت ایللر بؤیودور ایران آدلانان اؤلکه ده مدنی جمعیتین قورولوشو اوچون لازیم اولان عینی و ذهنی شرایط یارانیب دیر. بو گون ایرانین مختلف شهرلرینده چوخلو علم مرکزلری دائر دیر. داخیل و یا خارج اؤلکه لرین اونیورسیته لرینده تحصیل آلمیش بیر نئچه میلیون انسان ، مختلف اجتماعی ساحه لرده فعالیت ائدیر. میلیونلار ایشچی مختلف صنایع کارخانالاریندا ایشله ییر. مملکتین 70 میلیون نفوذونون 60% - دان چؤخو شهرلرده یاشاییر. شهرلر ایله کندلر آراسیندا گئت – گل چؤخالیب . اینترنت، ساتلیت، رادیو – تلویزیون ، مطبوعات ، اتوبان لار، اوچاق، گمی، قاطار و کؤرپولر انسانلارین آراسیندا علاقه لری چوخالدیب. جمعیتده یئنی سوسیال قوروپلار عمله گلیب و کهنه قوروپلاردا یئنی سیاسی شعور اویانیب. باشقا سؤزله دئسک ، مملکت نسبی اولورسادا هر ساحه ده مدرن لشیب. آیدیندیر کی هربیر سیاسی سیستمین مشروعیتی همین سیستمده چوخ سایلی قوروپلارین اشتراکیندان آسیلی اولور. مدنی جمعیتده بو، آزاد سئچکی لر، پارلامنت لر و سیاسی حزبلر واسطه سیله تامین اولور. ایراندا ایسه ولایت فقیه سیستمی بو تاسیساتلاری قاداغانلادیر و یا مجبوری اولاراق فعالیت لرینه فورمال شکیلده اجازه وئریر. ولایت فقیه سیستمی مذهبی – سیاسی بیر ایدئولوژو دور. بو سیستم ذاتینا گؤره توتالیتر بیر سیستم دیر وکؤکوندن غرب دموکراتیاسینا ضدّ دیر. ولایت فقیه سیستمده انسانین وجدان آزادلیغیندان (شخصی آزادلیقلار، مذهب و فیکیر آزادلیغی، یازماق، سؤز و دانیشماق آزادلیغی) علاوه، اونون خصوصی حیاتی نین حتّی ان کیچیک ساحه سی مثال اوچون نه یئییب ، نه ایچیب و نئجه گئیینمه سی ده سیستمین کنترولو آلتیندا اولور. ولایت فقیه سیستمی اؤز مشروعیتی نی قرآنین تعلیماتیندان ، پیغمبرلیک فلسفه سیندن و شیعه مذهبی نین امام شناسلیق نظریّه سیندن آلیر. بو ایدئولوژویا گؤره ، قانون وئریجی حاکمیت آنجاق اللها عاید اولور. بورادا انسانین و حتّی پیغمبرین قانون قؤیما حاقّی اولمور. انسان آنجاق الله طرفیندن قؤیولان قانونونلارین اجرا ائدیجی سی اولور. بو سیستمین باخیشینا گؤره اسلام دینی نین قانونلاری ابدی اولاراق معتبر و بوتؤ زامان و مکانلارا عاید اولور. بو قانونلارین اجرا ائدیلمه سی پیغمبرین و اونون آردینجا اماملارین واونلاردان سونرا فقیه لرین (دین عالم لرینین) وظیفه سی ساییلیر. قانونلارین اجرا اولماسی آنجاق دین عالم لری طرفیندن سیاسی حاکمیتین اله کئچمه سیله امکان پذیر اولور. دین عالم لری طرفیندن سیاسی حاکمیتین اله کئچمه سی غرب اؤلکه لرینده "تئوکراتی" وشیعه اسلامی اؤلکه لرده "ولایت فقیه" آدلانیر.
ولایت فقیه سیستمی و وطنداشلار ولایت فقیه سیستمده یاشایان وطنداشلار دین، دیل ، میللیت، ایرق، جنس و مذهب لرینه گؤره مختلف یاخشی – پیس قوروپلارا بؤلونور. ان یاخشی وطنداشلار 12 – اماملارا اینانان و ولایت فقیه سیستمی نین طرفدارلاری اولان شیعه لر حساب اولور. شیعه لر ایکی قوروپایا بؤلونور: 1- مطلق حقوقا صاحب اولان دین عالم لری (فقیه لر و مجتهد لر). 2- شیعه امّتی مطلق حقوقا صاحب اولان دین عالم لری( فقیه لر) شریعت شناس و اسلام دینی نین حکم لرینی یاخشی تانیان انسانلار حساب اولور. ولایت فقیه سیستمده مهم دولت اورقانلاری (خبرگان شوراسی، رهبرلیک مقامی، عدلیّه حاکمیتی نی رئیسی، شورای نگهبان و ...) آنجاق بو طبقه نین انحصاریندا قالیر. بو ممتاز طبقه نین ایچیندن سئچیلمیش " ولی فقیه" اؤلکه نین مذهبی – سیاسی رهبری کیمی عمرونون سونونا قدر هم میللتدن و هم قانوندان اوستون ساییلیر. شیعه امّتینه گلدیکده، اونلار فقیه و مجتهد اولمادیقلارینا گؤره ، بوتؤ سیاسی – مذهبی مسئله لر ده مجتهد لردن آسیلی قالیر و اونلارین تصمیم و میل لری نین تقلید چیسی اولور. امّت اوزو جنسیت لرینه گؤره ایکی قوروپایا بؤلونور: الف – کیشی لر ب – قادینلار ولایت فقیه سیستمده کیشی جنسیّتینه گؤره قادیندان اوستون ساییلیر. قادینلار هم فقیه و مجتهد لیک درجه سینه چاتماق حقوقوندان محروم قالیر و همده ورثه لیک، عائله و جنایت حقوقو باخیمدان کیشی ایله برابراولمایان و اونون یاریسی اولان حساب ائد یلیر. اسلام جمهوروسو رژیمده ، قادین و اونون مقامی جنسی آلت مقامینا اندیریلیر، او ساچلارینین گؤرونمه سی اوچون شاللاقلانیر و زوراکیلیقلا چادرا آلتیندا ساخلانیر. بو رژیمده قادینلارین سنگسار اولونماسی شرعی وظیفه تلقی اولونور. مجلس شورای اسلامیه سئچیلمیش قادین نماینده سی ارین اجازه سی اولمادان ائودن ائشیگه چیخماغا و یا اؤلکه دن خارج اولماغا حاققی اولمور... اسلام جمهوروسو - ولایت فقیه رژیمینده سنّی مذهبینده اولان 15 میلیون وطنداشلار ایکینجی درجه لی مسلمانلار حساب اولورلار. بو سنّی مسلمانلارین (عربلر، بلوچ لار، تورکمن لرو کوردلر) حتّی دین عالم لری اسلام جمهوروسو دولتی نین اساس اورقانلاریندا اشتراک ائتمه حقوقلارینا مالیک اولمور. بو گون 12 – میلیونلوق تهران شهرینده سنّی مذهبلی انسانلارا نمونه اوچون بیر مسجد یوخدور. ولایت فقیه رژیمده کتاب اهلی ساییلان غیر مسلمان وطنداشلار(یهودیلر، مسیحی لر ، زرتشتی لر) اوچونجو درجه لی انسانلارکیمی حساب اولونورلار و قانون قارشیسیندا مختلف آیری – سئچکی لیک لره معروض قالیرلار. ارتش ده اولماق ، قاضی لیک ائتمک و مملکتین مهم اورقانلاریندا ایش صاحیبی اولماق حقوقوقوبو وطنداشلارین الیندن آلینیر. بوندان علاوه مسلمان قادینی نین غیر مسلمان کیشی ایله ائولنمه سی، شهادت، قصاص و زنا مسئله سینده بو وطنداشلار گؤبود نابرابرلیک لره معروض قالیرلار. (باخ قانون اساسی جمهوری اسلامی ایران ، اصل 144، 167، 152 و قانون مدنی جمهوری اسلامی ایران ماده 1059، ماده 494، ماده 207، ماده 121 و ماده 88). ولایت فقیه رژیمده دوشونجه و دونیا باخیشینا گؤره کافر و مشرک آدلانان انسانلار و همچنین بهائی لر و اسلام دینیندن چیخانلار پیس وطنداشلار کاتوقوریاسیندا ان مهم یئر آلیرلار. بو انسانلار هم مدنی - اجتماعی حقوقدان محروم قالیرلار و همده قتله یئتیریلمه لری واجب و شرعی وظیفه ساییلیر. اسلام جمهوروسو – ولایت فقیه رژیمده مملکتین رسمی دیلی فارس دیلی اولمالیدیر. بورژیمه گؤره، ان یاخشی انسان فارس دیللی انسان وان یاخشی اتنیک فارس اتنیکینه منسوب اولان انسان دیر. مختلف اتنیک لرین دیل و کولتورونو یوخ ائتمک و اونلاری فارسلاشدیرماق ولایت فقیه رژیمی نین باشچیلاری نین اصل هدفی دیر. بو سیستمده غیر فارس اتنیک دن اولان و میللتی نین زنجیره چکیلمیش دیلی نین ، کولتورونون آزادلیغینی نی ایسته ین انسانین پایی اؤلوم ، زندان و اشگنجه دیر. بو گون جمهوری اسلامی رژیمی نین زندانلاریندا یوزلرجه ملی مبارزلر زنجیرده دیر. آذربایجان خالقی نین قهرمان اوغلو جناب عباس لسانی نین ولایت فقیه رژیمی نین جلّادلاری الینده اسیر دوشمه سی و اونون چکدیی اشگنجه و عذابلار بو ادّعا اوچون بیر نمونه دیر.
نتیجه ولایت فقیه رژیمی دموکراسی و مدنی جمعیته قارشی اولان و داها دوغروسو اورتا عصرلره یاراشان بیر رژیم دیر. بو رژیمین سایه سی آلتیندا جمعیتده سیاسی دیکتاتورلوق ، وطنداشلار آراسیندا آیری – سئچکی لیک ، میللی ظولم ، گئنیش یوخسوللوق ، اعتیاد، فاحشه لیک ، آجلیق، سوادسیزلیق ، جهالت و خرافات حاکمیت ائدیر. حکومت ملّتین نفت گلیریندن میلیاردلار دولار آقازاده لرین ، آیت الله لارین و بین المللی تروریست تشکیلاتلارین بانک حسابلارینا تؤکور. قؤنشو اؤلکه لرده ایران اسلام حکومتی نین جاسوسلاری میلیاردلار دلار پول خرج اتئمکله بو اؤلکه لرین ساکت لیک و صلحونو تهلکه آلتینا سالیر. انسانلاریمیزایش سیزلیک، آجلیق و یوخسوللوق ایچینده چابالیرکن ، حمس تشکیلاتی، حزب الله تشکیلاتی ، عراقدا اولان مقتد الصدرین تشکیلات و قوشونو نفت گلیریمیزدن میلیاردلار دولار یاردیم آلیرلار. تجاوزکار ارمنستان دولتی ایران حکومتی طرفیندن هرجوره مادی – معنوی کومک لیک لرله حمایه اولونور و ... ولایت فقیه پرده سی دالیندا گیزلنن فارس ناسیونالیزمیندن جمعیتده یاشان انسانلارا رفاه و آزادلیق گؤزلمک ، بوش یئره واخت ایتیرمکدیر. ایراندا یاشایان میللت لرآنجاق یاخالارینی بو اورتا عصردن یادگار قالمیش سیستمدن قورتارماقلا مدنی جمعیته بیر پنجره آچا بیلیرلر. احمد یزدانی
|
||
|
|
|
Materiallardan istifadə zamanı qaynağa istinad
vacibdir |