|
|
|
|
|
هارای، هارای من تورکم، بیر میلتین هایکیریشی و اویانیشی دیر
ایرانین گنیش جغرافیاسیندا، فرقلی دیل، دین، توره و تاریخا صاحب میلتلر اوزون ایللر بیر آرادا یاشاماقدا اوز ئولکه لرینی بیرلیغدا قوروماقدا و قارداش کیمی یاشاماقدالار. نه وارکی سون ایللرده بو وضیعت قاریشیب، بو ملتلرین انکشافی، دگیشیک آنتریکا و اویونلارلا انگلنیب، بیرلیگ آدی آلتیندا، اقتصادی، سیاسی و حقللی ایستکلری تاپتالانیب، تحقیره معروض قالیب، کیملیک( هویت) بحرانی یاشییب، ورولوپ، دویلیپ نتیحه ده سوسدورولوبدور. دگیشیک و فرقلی اولان ملتلری، اصلی اساسی اولمیان، یالانجی و اویدوروق فیکیرلرله بیر یره توپلاماق و او ملتلری اوزلریندن آییریب، اساسلاریندان اوزاقلاشدیرماق بللی بیر دیلی، ایرکی( نژاد) و نظامی اوستون توتماق فاشیست ذهنیتین اوزی دیر و بللی باشلی هدف لر ایچون اجرا ادیلیر. چوخ ملتلی ئولکه لرین، ایش بیرلیگی( همکاری)، حقوق بیرلیگی، اقتصادی و اجتماعی گلیشملری، او ملتلرین بیربیرینه سایغی و حرمتی ایله انکشاف الییب و دایمی قالیبدیر. باشدا آمریکا بیرلشیک دولتلری اولماق اوزره، کانادا و گلیشمیش صنایع ئولکه لرینده کیشی( فرد) حق و حقوقونا سایغی ایله بیرلیکده، فرقلی دیل، دین و کولتورلره قارشی سایغی اساس دیر. بو ئولکه لرین اقتصادی و اجتماعی گلیشملرینده بو وضیعت و دوروم بویوک رول اوینامیشدیر. آمریکا دا ایلک باشدا دوقوز ایالتین حقوق و ایشبیرلیگی( همکاری) آنلاشماسیله بیر یره ییغیشماسی، داها سورا انسان حقلری بیلدیرجه سی و آمریکا آنایاساسی( قانون اساسی) چوخ ملتلی بیر دولتی قبول ایلمسی تازا بیر دورون باشلاماسینی مژده لدی و گوستردی. گرچه داها قاباق جا سویس ده و باشقا یرلرده چوخ ملتلی دولت لر قورولموش و باشاریلی نتیجه لر ورمیشدی. گچن یوز ایل، میللی دولت لرین گوجلنمسی ایران دا اوزونو مرکزی بیر دولت و باسکیگی بیر رزیمله گوستردی، بو آرادا سویت( شوروی) انقلابی روس چارلیغینی داقیدی و شمالدا ینی و مستقل دولت لر اورتایا چیخدی، بو کیچیک دولت لر داها سورا سویت ترکیبینده یر آلدیلار ، گینه ده بو یوز ایل ده فاشیست دولت لر اورتایا چیخدی، سوسیالیزم یاییلدی، کولونی ئولکه لراستقلال قازاندی و نهایت سوسیالیزم ییخیلدی و سویت ترکیبینده اولان ئولکه لر ینیدن استقلالیت قازانذی و بو آرادا کیچیک دولت لر اوتایا چیخاراخ بیرلشمیش میللتلر( سازمان ملل) تشکیلاتی عضو ساییسی ایکی یوزو آشدی. بو وضیت گوستریرکی دنیادا ینی بیردوره باشلییر و هر میلت کندی قدرینی تعیین حقینی الده الییر. بو آرادا گلوبالیسم میللی دولت لرین گوجونو ضعیف لدیر، بین الملل دگرلر، دمکراسی، انسان حقلری، دگیشیک دیل و دین و کولتورلره قارشی سایغی گونن گونه گوج قازانیر. بو گلیشمه لره قارشی چیخان لار واردیر، اسکی نظامی یاشادماق، بیر میلت نژادینی، دیلینی، کولتور و نظامینی اوسنتون گورن کور ذهنیت لر وار، یازیخ کی بو ذهنیت لر تاریخین ایچینده دگیر، تاریخین اشیینده و قرنلیگینده یاشییرلر. ئولکه میز ایران دا یوز ایل دن چوخدور، واحد ملت، واحد نژاد و واحد دیل سوداسی بویوک فاجعه لره سبب اولوب ئولکه ده یاشیان میلتلرین اقتصادی، اجتماعی و کولتور انکشافینین قاباغین آلیب، نتیجه ده گلیشمیش و مدنی ئولکه لردن دالی قالیب، 21 انجی یوز ایلده خرافات و گری قالمیشلیغین پنجسینده توتساق قالمیشدیر.بو وضیعت اوزون مدت دوام ادرسه ، میلت یوخسولوک، ایشسیزلیک و فلاکت و نتیجه ده بویوک سوسیال بحران لارلا قارشی قارشیه قالاجاقدیر. ایرانین هر یرینده اولدوقی کیمی آذربایجان وطن پرورلری بو وضیت دن قورتولماق ایچون هر فرصت دن استفاده الییب، دنیا مدنی جمعیت لر کیمی یاشاماق ایسندیغینی گوستریبدیر. اونا گوره ده اورتایا چیخان هر فرصت، تحریک و یا تحقیر بویوک عصیان لارا سببیت وریر. نچه آی قاباق، ایران روزنامه سی( ارگان رسمی خبرگزاری ایران) چاپ الدیغی چیرکین یازی و کاریکاتوری ایله حادثه یاراتدی و آذربایجانین بوتون شهیر، قصبه و کدلری ایاغا قالخدی. بیر آندا هر شی دگیشدی، رئیس جمهور آذربایجانا گلدیغینده ، شهریارین حیدر باباسیندن تورکجه شعرلر اخودی، رهبر بیر ییغینجاکدا تورکجه شعار وردی، ئولکه ده بیردم بیره تورکلوک هواسی اسدی، امما چوخ قیسا سوردو تکرار زندان لار آذربایجانلی جوانلارلا دولدی ، ظلم و شکنجه آغیر شکیلده دوام الدی. گینه نطامین کنترل اینده اولان و پروپاگاند وسیله سی ساییلان رادیو و تلویزیون فارس دیلینی اوستون گوسترماق ایچون الینن گلنی اسیرگمدی، گینه خبر پروگرامیندا فارس دیلیلره سلام وریلدی، ایران دا یاشیان میلیون لارجا تورک، تورکمن، کورد، عرب و بلوچ دگیر، افغانستان و تاجیکستان دا یاشیان فارس دیلیلره عشق و سوگی گوندریلدی. اوزونو بوتون ایران لیلارین رئیس جمهوری سایان آقای احمدی نژاد فارس دیلینی ایران لیلارین اورتاک روحونون تجلی سی گوستردی و وردیغی بیر دستور ایله فرهنگستان زبان فارسیه ددیً او استقامت ده حرکت اولونمالیدیرکی فارس دیلی اورتاق تعصب و افتخارمیز اولسونً . بو بیانات چوخ دیللی بیر ئولکه ده بیر دیلی اوستون توتماق و دیگر دیللری ازماق و یوخ اله ماق معناسینه گلیر، بو سوزلر بیرلیک و برابرلیغی خطره سوخار، همکارایغی آزالدار و ئولکه اقتصاد و سیاستینه ضربه وورار. نه یازیخ کی بو رسمی مقام و دولت آداملارینین رفتار و داورانیشی دگیر، اوزونو آیدین سایان، دمکراسی کلمه سینی هیچ وقت یاد دان چیخاتمیان، باشقا میلتلرین آزادلیغیندان سوز ادنده آغزی کفلنن و بیهوش اولان لار، ایران دا یاشیان ملت لرین حق و حقوقوندان و آزاد سچیمیندن سوز ادنده یا قاشقاباق سالیب دانیشمیرلر و طفره گدیلر یا دا اونجه ایران دا دمکراسی یرلشسون سونرا ملتلر سورونو گوروشولسون دییرلر. بو سوزلر چوخ اشیدیلدی ، مرکزی حکومت لر هیچ بیر زمان قدرت و امکان لارینین بولونمسینی ایستمزلر، رضا شاه دوری بیله باشلادی و دوام الدی، اونجه استبداد سونرا دیکتاتورلوک و نهایت آنایاسانین( قانون اساسی) ایالتی و ولایتی ماده سی رفه قالدیریلدی. آرتیخ بیلینملیدیرکی، ایران دا دمکراسی مرکز دن دگیر، میلتلرین اراده سیله قوردوقلاری تشکیلات لارلا مرکزه گیتملیدیر و مرکز ده گنیش و چوخ میلتلی بیر دولت قورولمالیدیر. بو وضیت قیسا زمان دا گنیش ایش بیرلیغی( همکاری)اورتامی یارادیر، نتیجه ده اقتصادی و اجتماعی گلیشمیه زمین حاضیرلار. ایران بویوک بیر ئولکه و چوخ میلتلی بیر یاپییا( ساختار) صاحیبدیر، بو معقول دگرلیندیریلسه چوخدا مثبت بیر وضیت دیر. اوزونو سولجی گورسدیب پان ایرانیست ذهنیتی داشینلر، ساغجی، لیبرال و دمکراسی یانلیسی گورسدیب دمکراسینی باشقا یرلره ایستینلر و یا امت جی اولوب بوتون مسلمان امت نی بیر یرده ایستینلر بیلملیدیرکی ایران دا فرقلی ملت لر یاشییر و بو ملتلری بیر یرده توتماق زورلا دگیر، تشویق، حمایت و بیرلیک و برابرلیک( برابر حقوق و داطلبانه) سیاست و تدبیرلرله ممکوندور. نچه آی قاباق آذربایجان دا باش گوسترن حادثه لر و قیسا زماندا بوتون آذربایجانا یاییلن و مینلرجه انسانین هارای، هارای من تورکم هایکیریشی ایللرجه باسدیریلمیش، زورلا تک دیل، تک ملت و تک ایرکا(نژاد) قارشی بیر دیرنیش دیر . اوش بش ماجراجو جوانین کوچه گوستریسی دگیر بیر ملتین عصیانی و هایکیریشی دیر... سوئد . دکتر محمد حسین یحیایی |
|
|
|
|
Materiallardan istifadə zamanı qaynağa istinad
vacibdir |
